ಮೃದುವಾದ ಕೂದಲು ಪಡೆಯಲು ಮನೆ ಮದ್ದು

ಮೃದುವಾದ ಕೇಶರಾಶಿ ಹೊಂದಬೇಕು ಎಂಬ ಹಂಬಲ ಎಲ್ಲರಿಗೂ ಇದ್ದೇ ಇದೆ. ರೇಷ್ಮೆಯಂತೆ ಸುಕೋಮಲವಾಗಿರಬೇಕು ಎಂದು ಬಯಸುವವರ ಸಂಖ್ಯೆಯಲ್ಲಿ ಗಂಡು-ಹೆಣ್ಣು ಎಂಬ ವ್ಯತ್ಯಾಸವಿಲ್ಲ, ಹಾಗಾಗಿ ಎಲ್ಲರೂ ಕೂದಲು ಸ್ಮೂತ್‌ ಆಗಿರಲು ವಿಶೇಷ ಆರೈಕೆಯಲ್ಲಿ ತೊಡಗುತ್ತಾರೆ. ಹೆಚ್ಚಿನವರು ಜಾಹೀರಾತಿನಲ್ಲಿ ಬರುವ ಅನೇಕ ಬಗೆ ಶ್ಯಾಂಪುಗಳನ್ನು ಬಳಕೆ ಮಾಡಿ ಅನೇಕ ಸಮಸ್ಯೆಗಳನ್ನು ತಂದುಕೊಂಡಿದ್ದಾರೆ.

ಸಿಕ್ಕಾದ, ಒಣಗಿದ ಕೂದಲಿನ ಸಮಸ್ಯೆ ನಿವಾರಣೆ ಮಾರುಕಟ್ಟೆಯಲ್ಲಿ ಸಿಗುವ ಬಾಟಲ್‌ ಶ್ಯಾಂಪುಗಳ ಬಳಕೆಯಿಂದ ಅಡ್ಡ ಪರಿಣಾಮಗಳೇ ಹೆಚ್ಚು ಎನ್ನುವುದು ತಜ್ಞರ ಅಭಿಪ್ರಾಯ. ತಾತ್ಕಾಲಿಕವಾಗಿ ಉತ್ತಮ ಫಲಿತಾಂಶ ಕಂಡಂತೆ ಅನಿಸಿದರು ದೀರ್ಘಾವಧಿಯಲ್ಲಿ ನಕಾರಾತ್ಮಕ ಪರಿಣಾಮಗಳು ಕಾಣಿಸಿಕೊಳ್ಳುತ್ತವೆ ಎಂದು ಎಚ್ಚರಿಸುತ್ತಾರೆ. ರಾಸಾಯನಿಕ ಮಿಶ್ರಣಗಳನ್ನು ಒಳಗೊಂಡ ಶ್ಯಾಂಪುಗಳಿಗಿಂತ ನೈಸರ್ಗಿಕವಾಗಿ ಸಿಗುವ ಉತ್ಪನ್ನಗಳನ್ನು ಬಳಕೆ ಮಾಡಿ. ಇದರಿಂದ ಕೂದಲು ಮೃದುವಾಗುತ್ತದೆ. ಹೆಚ್ಚು ಕಾಲ ಸಧೃಡವಾಗಿ ಇರುತ್ತದೆ.

ಒಂದು ಬಟ್ಟಲಿನಲ್ಲಿ ತೆಂಗಿನ ಹಾಲು ತೆಗೆದುಕೊಳ್ಳಿ. ಅದಕ್ಕೆ ಕೆಲವು ಚಮಚಗಳಷ್ಟು ಆರ್ಗನ್ ಎಣ್ಣೆಯನ್ನು ಹಾಕಿ. ನಿಮ್ಮ ಕೂದಲಿನ ಉದ್ದಕ್ಕೆ ತಕ್ಕಂತೆ ಆರ್ಗನ್‌ ಎಣ್ಣೆಯನ್ನು ಮಿಶ್ರ ಮಾಡಿಕೊಳ್ಳಿ. ಮಿಕ್ಸಿ ಮೂಲಕ ತೆಂಗಿನ ಹಾಲು ಮತ್ತು ಆರ್ಗನ್‌ ಎಣ್ಣೆಯನ್ನು ಚೆನ್ನಾಗಿ ಮಿಶ್ರ ಮಾಡಿ. ತೆಂಗಿನ ಹಾಲು ಹಾಳಾಗಿಲ್ಲ ಎಂಬುದನ್ನು ಖಾತರಿ ಪಡಿಸಿಕೊಳ್ಳಿ. ಹಾಲು ಹಾಳಾಗಿದ್ದರೆ ಕೂದಲಿಗೆ ಹಚ್ಚಿದಾಗ ಕೆಟ್ಟ ವಾಸನೆ ಬರುವ ಸಾಧ್ಯತೆ ಇದೆ. ಈ ಮಿಶ್ರಣವನ್ನು ಕೂದಲ ಮೇಲೆ ಮಾಸ್ಕ್‌ನಂತೆ ನಯವಾಗಿ ಹಚ್ಚಿ. ಶವರ್‌ ಕ್ಯಾಪ್‌ ಬಳಸಿದರೆ ತೆಂಗಿನ ಹಾಲಿನ ಮಿಶ್ರಣ ಕೆಳಗೆ ಹರಿದು ಹೋಗುವುದನ್ನು ತಪ್ಪಿಸುತ್ತದೆ. ಸುಮಾರು 1 ಗಂಟೆ ಹಾಗೆ ಬಿಡಿ. ಹೆಚ್ಚಿನ ಸಮಯ ಬೇಕಿದ್ದರೂ ಬಿಡಬಹುದು. ರಾತ್ರಿಯೆಲ್ಲ ಕೂದಲ ಮೇಲೆ ತೆಂಗಿನ ಹಾಲಿನ ಮಾಸ್ಕ್‌ ಇದ್ದರೆ ಇನ್ನೂ ಉತ್ತಮ ಪರಿಣಾಮ ಬೀರುತ್ತದೆ. ನಂತರ ದಿನನಿತ್ಯ ಬಳಕೆ ಮಾಡುವ ಶ್ಯಾಂಪು ಮೂಲಕ ತೆಲೆಗೆ ಸ್ನಾನ ಮಾಡಿ. ಕಂಡೀಷನರ್‌ಅನ್ನು ಬಳಕೆ ಮಾಡಬಹುದು. ಕೂದಲು ಒಣಗಿದ ನಂತರ ಮೃದುವಾಗುವುದಲ್ಲದೆ, ಹೊಳಪಿನ ಮೂಲಕ ನಿಮ್ಮ ಕೂದಲು ಸುಂದರವಾಗಿ ಕಾಣುವಂತೆ ಮಾಡುತ್ತದೆ.