ಈ ವಿಷ್ಯ ಯಾಕೆ ಹೇಳುತ್ತಿದ್ದೇವೆ, ಅಂದ್ರೆ, ಹಿಂದಿನ ಕಾಲದಲ್ಲಿ ವಯಸ್ಸಾದ ಅಜ್ಜ - ಅಜ್ಜಿಯರು ಮಾತ್ರ ತಮ್ಮ ಮಂಡಿ ನೋವುಗಳ ಮತ್ತು ಕೀಲು ನೋವುಗಳ ಬಗ್ಗೆ ದೂರುತ್ತಿದ್ದರು.
ಆದರೆ ಈಗ ಕೇವಲ ಮೂವತ್ತು ವರ್ಷ ದಾಟಿದ ಮಧ್ಯ ವಯಸ್ಸಿನ ಪುರುಷರು ಮತ್ತು ಮಹಿಳೆಯರು ಕೂಡ ಮಂಡಿ ನೋವಿನಿಂದ ಬಳಲುತ್ತಿದ್ದಾರೆ.. ಆದರೆ ಇದಕ್ಕೆಲ್ಲಾ ದುಬಾರಿ ಖರ್ಚು ಮಾಡುವ ಬದಲು ಮನೆಯಲ್ಲಿಯೇ ಇದೆ ಪರಿಹಾರಗಳು
ಆಯುರ್ವೇದ ಪ್ರಕ್ರಿಯೆಯಲ್ಲಿ ಮಸಾಜ್
- ಮೊದಲಿಗೆ ಒಂದು ಕಪ್ ಅಕ್ಕಿ ಹಿಟ್ಟು, ಮೂರು ಟೇಬಲ್ ಚಮಚ ತುರಿದ ಶುಂಠಿ, ಒಂದು ಟೀ ಚಮಚ ಏಲಕ್ಕಿ ಪುಡಿ, ಒಂದು ಟೀ ಚಮಚ ಲವಂಗದ ಪುಡಿ, ಒಂದು ಟೀ ಚಮಚ ಕಲ್ಲುಪ್ಪು ಇವುಗಳನ್ನು ಒಂದು ಕಾಟನ್ ಬಟ್ಟೆಯಲ್ಲಿ ಗಂಟು ಹಾಕಿ ಒಂದು ಕಡೆ ಇರಿಸಬೇಕು.
- ಇನ್ನು, ಸಣ್ಣ ತಳಆಳವಿರುವ ಬಾಣಲೆಗೆ, ಒಂದು ಕಪ್ ಆಗುವಷ್ಟು ಎಳ್ಳೆಣ್ಣೆಯನ್ನು ಹಾಕಿ ಚೆನ್ನಾಗಿ ಬಿಸಿ ಮಾಡಬೇಕು. ಈಗ ಈ ಎಲ್ಲವನ್ನೂ ಮಿಶ್ರ ಮಾಡಿ ನಂತರ ನಿಮ್ಮ ನೋವಿರುವ ಮಂಡಿಗಳ ಮೇಲೆ ಇದನ್ನು ಹಚ್ಚಬೇಕು.
- ಮಂಡಿಗಳ ಮೇಲೆ ನಯವಾಗಿ ಮಸಾಜ್ ಮಾಡುವುದರಿಂದ ರಕ್ತ ಸಂಚಾರ ಉತ್ತಮಗೊಳ್ಳುತ್ತದೆ. ದೇಹದ ಯಾವುದೇ ಭಾಗ ಹಿಡಿದುಕೊಂಡರೂ ಕೂಡ ಅದಕ್ಕೆ ಪರಿಹಾರವಾಗಿ ಇದೇ ರೀತಿ ಮಾಡಬಹುದು.
ಕರ್ಪೂರದ ಎಣ್ಣೆ
- ಮೊದಲು ಕರ್ಪೂರವನ್ನು ಚೆನ್ನಾಗಿ ಕುಟ್ಟಿ ಪುಡಿ ಮಾಡಿ ಪಕ್ಕದಲ್ಲಿ ಇಟ್ಟುಕೊಳ್ಳಿ
- ಇನ್ನು, ಸಣ್ಣತಳಆಳವಿರುವ ಬಾಣಲೆಗೆ, ಒಂದು ಕಪ್ ಆಗುವಷ್ಟು ತೆಂಗಿನ ಎಣ್ಣೆಯನ್ನು ಹಾಕಿ ಬಿಸಿ ಮಾಡಿಕೊಳ್ಳಿ, ಆಮೇಲೆ ಇದಕ್ಕೆ ಕರ್ಪೂರ ಪುಡಿಯನ್ನು ಹಾಕಿ ಚೆನ್ನಾಗಿ ತಿರುಗಿಸಿ..
- ಇನ್ನು ಗ್ಯಾಸ್ ಆಫ್ ಮಾಡಿ, ಎಣ್ಣೆತಣಿದ ಬಳಿಕ, ನೋವಿರುವ ಭಾಗಕ್ಕೆ ಚೆನ್ನಾಗಿ ಹಚ್ಚಿಕೊಳ್ಳಿ.
- ಉಳಿದಂತಹ ಎಣ್ಣೆಯನ್ನು ಬಾಟಲ್ನಲ್ಲಿ ಶೇಖರಣೆ ಮಾಡಿ ಮುಂದಿನ ಬಳಕೆಗಾಗಿ ಇಟ್ಟುಕೊಳ್ಳಿ. ನೋವು ನಿವಾರಣೆಗಾಗಿ ಇದನ್ನು ಅನ್ವಯಿಸಬಹುದು.
ಎಳ್ಳೆಣ್ಣೆಯ ಮಸಾಜ್
ಚಳಿಗಾಲದಲ್ಲಿ ಕಾಡುವ ವಿಪರೀತ ಕೀಲು ನೋವು ಹಾಗೂ ಮಂಡಿನೋವಿನ ಸಮಸ್ಯೆಗೆ ಎಳ್ಳೆಣ್ಣೆ ಬಹಳ ಒಳ್ಳೆಯದು... ಅಷ್ಟೇ ಅಲ್ಲದೆ ಆಗಾಗ ಮಾಂಸಖಂಡಗಳ ಸೆಳೆತ ಕಂಡು ಬರುತ್ತಿದ್ದರೆ, ಎಳ್ಳೆಣ್ಣೆಯನ್ನು ವಾರಕ್ಕೆ ಒಂದು ಬಾರಿ ಸ್ವಲ್ಪ ಬೆಚ್ಚಗೆ ಮಾಡಿಕೊಂಡು ನೋವು ಇರುವ ಜಾಗದಲ್ಲಿ ಚೆನ್ನಾಗಿ ಮಸಾಜ್ ಮಾಡಬೇಕು. ಇದರಿಂದಲೂ ಸಹ ವಾತ ದೋಷ ಪರಿಹಾರವಾಗುತ್ತದೆ ಎಂದು ನಂಬಲಾಗಿದೆ.
ಅರಿಶಿನ
- ನಾವು ಅಡುಗೆಗೆ ಬಳಸುವ ಅರಿಶಿನ ಕೂಡ ನೋವನ್ನು ಶಮನ ಮಾಡುವ ಗುಣ ಲಕ್ಷಣಗಳನ್ನು ಹೊಂದಿದೆ. ಅರಿಶಿನವನ್ನು ಬಿಸಿಯಾದ ಹಾಲಿನೊಂದಿಗೆ ಸೇವಿಸಿದರೆ, ಕೀಳು ನೋವು ಸಂಧಿವಾತದಂತಹ ಸಮಸ್ಯೆಗಳು ದೂರಾಗುತ್ತವೆ.
- ಇನ್ನೊಂದು ವಿಧಾನಗಳೆಂದರೆ, ಪ್ರತಿನಿತ್ಯ ಅಡುಗೆಗೆ ಬಳಸುವ ಒಂದೆರಡು ಚಮಚ ಅರಿಶಿನವನ್ನು ನೀರಿನೊಂದಿಗೆ ಬೆರೆಸಿ ಪೇಸ್ಟ್ನಂತೆ ತಯಾರಿಸಿಕೊಂಡು ನೋವಿದ್ದ ಕಡೆ ದಿನಕ್ಕೆರಡು ಬಾರಿ ಹಚ್ಚಿ ಹಾಗೂ ಮೆಲ್ಲನೇ ಮಸಾಜ್ ಮಾಡಿಕೊಂಡು ಹಾಗೆಯೇ ಸ್ವಲ್ಪ ಹೊತ್ತು ಒಣಗಲು ಬಿಡಿ. ನಂತರ ಅರ್ಧ ಗಂಟೆ ಬಿಟ್ಟು ಉಗುರುಬೆಚ್ಚನೆಯ ನೀರಿನಿಂದ ತೊಳೆದುಕೊಂಡರೆ ನೋವು ಕಡಿಮೆಯಾಗುತ್ತದೆ.
ನೆನೆಸಿದ ಮೆಂತ್ಯ ಕಾಳುಗಳು
ಕೆಲವರಿಗೆ ಚಳಿಗಾಲ ಬಂತೆಂದರೆ ಸಾಕು ಮಂಡಿ ನೋವು ಅವರನ್ನು ಹುಡುಕಿಕೊಂಡು ಬರುತ್ತದೆ ಅಂತಹವರು ಇಡೀ ರಾತ್ರಿ ನೆನೆಸಿದ ಮೆಂತ್ಯ ಕಾಳುಗಳನ್ನು ಬೆಳಗಿನ ಖಾಲಿಹೊಟ್ಟೆಯಲ್ಲಿ ಸೇವಿಸಬಹುದು ಮತ್ತು ನೋವನ್ನು ಕಡಿಮೆ ಮಾಡಿಕೊಳ್ಳಬಹುದು.
ಓಂಕಾಳು ಕೂಡ ಬಹಳ ಒಳ್ಳೆಯದು
ಎರಡು ಟೇಬಲ್ ಚಮಚ ಓಂಕಾಳುಗಳನ್ನು ನುಣ್ಣಗೆ ಅರೆದು, ಕೂಡಲೇ ನೋವಿರುವ ಜಾಗಕ್ಕೆ ಹಚ್ಚಿದರೆ ನೋವು ಕಡಿಮೆಯಾಗುತ್ತದೆ.