ಗರ್ಭಧಾರಣೆಯಲ್ಲಿ 7ನೇ ತಿಂಗಳ ನಂತರ ಹೆಚ್ಚು ಜಾಗೃತರಾಗಿರುವುದು ಅಗತ್ಯವಾಗಿರುತ್ತದೆ. ಆರೋಗ್ಯದಲ್ಲಿ ಸಾಕಷ್ಟು ಬದಲಾವಣೆಗಳಾಗುತ್ತವೆ. ಕಾಲು ನೋವು, ಬೆನ್ನು ಹಿಂದಕ್ಕೆ ಬಾಗುವುದು, ಹೊಟ್ಟೆಯ ಭಾಗದಲ್ಲಿ ತುರಿಕೆ, ದೇಹದಲ್ಲಿ ನೋವು ಕಾಣಿಸಿಕೊಳ್ಳುವುದು ಸಾಮಾನ್ಯ ಲಕ್ಷಣವಾಗಿದೆ.
ಅಲ್ಲದೆ ಸ್ತನಗಳಲ್ಲಿ ಸ್ರವಿಸುವಿಕೆ ಕೂಡ ಕಾಣಿಸಿಕೊಳ್ಳುತ್ತದೆ. ಹೀಗಾಗಿ ತಾಯಿಯ ಆರೋಗ್ಯವನ್ನು ಸೂಕ್ಷ್ಮವಾಗಿ ನೋಡಿಕೊಳ್ಳಬೇಕು. ಆದರೆ 8ನೇ ತಿಂಗಳ ನಂತರ ಒಂದಷ್ಟು ಕೆಲಸಗಳನ್ನು ಗರ್ಭಿಣಿಯರು ಮಾಡಬಾರದು ಅವು ಯಾವವು ಎಂಬುದನ್ನು ಗೈನಾಕಾಲಜಿಸ್ಟ್‌ ಡಾ. ವೀಣಾ ಭಟ್‌ ತಿಳಿಸಿಕೊಟ್ಟಿದ್ದಾರೆ ಇಲ್ಲಿದೆ ನೋಡಿ ಮಾಹಿತಿ.
ಭಾರ ಎತ್ತುವುದು
8ನೇ ತಿಂಗಳ ಬಳಿಕ ಗರ್ಭಿಣಿಯ ದೇಹ ಸೂಕ್ಷ್ಮವಾಗುತ್ತದೆ, ಜೊತೆಗೆ ಅದಾಗಲೇ ಮಗುವಿನ ಬೆಳವಣಿಗೆ ಒಂದು ಹಂತದವರೆಗೆ ಆದ ಕಾರಣ ದೇಹವೇ ಭಾರವಾಗಿರುತ್ತದೆ. ಹೀಗಿದ್ದಾಗ ಆದಷ್ಟು ಭಾರದ ವಸ್ತುಗಳನ್ನು ಎತ್ತುವುದು ಒಳಿತಲ್ಲ.
ಭಾರದ ನೀರಿನ ಬಿಂದಿಗೆ, ಪಾತ್ರೆಗಳನ್ನು ಎತ್ತುವುದು ಒಳ್ಳೆಯದಲ್ಲ. ಆದಷ್ಟು ಲಘುವಾದ ಕೆಲಸಗಳನ್ನು ಮಾಡಿದರೆ ಸಾಕಾಗುತ್ತದೆ.
ಇದನ್ನು ಓದಿ: Hypertension Day: ಗರ್ಭಾವಸ್ಥೆಯಲ್ಲಿ ಅಧಿಕ ರಕ್ತದೊತ್ತಡವಿದ್ದರೆ ಆಗುವ ಅಪಾಯಗಳೇನು?; ವೈದ್ಯರ ಮಾತು
ದೂರದ ಪ್ರಯಾಣ ಬೇಡ
ಗರ್ಭಧಾರಣೆಯ ಆರಂಭದಿಂದಲೇ ದೂರದ ಪ್ರಯಾಣವನ್ನು ಮೊಟಕುಗೊಳಿಸುವುದು ಒಳಿತು. ಅದರಲ್ಲೂ 8ನೇ ತಿಂಗಳ ಬಳಿಕ ಆದಷ್ಟು ದೂರದ ಪ್ರಯಾಣವನ್ನು ಅವೈಡ್‌ ಮಾಡಿ ಎನ್ನುತ್ತಾರೆ ಡಾ ವೀಣಾ ಭಟ್‌.
ದೂರದ ಪ್ರಯಾಣದಿಂದ ಗರ್ಭದ ಮೇಲೆ ಒತ್ತಡ ಬೀಳುವ ಸಾಧ್ಯತೆ ಇರುತ್ತದೆ. ಇದರಿಂದ ಮಗುವಿನ ಉಸಿರಾಟಕ್ಕೆ ಕಷ್ಟವಾಗುವ ಸಾಧ್ಯತೆ ಇರುತ್ತದೆ. ಹೀಗಾಗಿ ಪ್ರಯಾಣದಿಂದ ದೂರವಿರಿ.
ಜಂಕ್‌ ಫುಡ್‌ಗಳ ಸೇವನೆ
ಮಗುವಿನ ಬೆಳವಣಿಗೆಯಾದ ಕಾರಣ ತಾಯಿಯ ಜೊತೆಗೆ ಮಗುವಿನ ಆರೋಗ್ಯ ಕೂಡ ಅಷ್ಟೇ ಮುಖ್ಯವಾಗಿರುತ್ತದೆ. ಆದ್ದರಿಂದ ಜಂಕ್‌ ಫುಡ್‌ಗಳನ್ನು ಸೇವಿಸಬೇಡಿ.
ಆದಷ್ಟು ಮನೆಯಲ್ಲೇ ತಯಾರಿಸಿದ ಆಹಾರಗಳನ್ನು ಸೇವಿಸಿ. ತರಕಾರಿಗಳ ಸಲಾಡ್‌, ಧಾನ್ಯಗಳ ಬಳಕೆ ಜೊತೆಗೆ ಪೌಷ್ಟಿಕ ಆಹಾರಗಳನ್ನು ಹಚ್ಚಾಗಿ ಸೇವಿಸಿ. ಇದು ತಾಯಿ ಮತ್ತು ಮಗುವಿನ ಆರೋಗ್ಯವನ್ನು ಉತ್ತಮವಾಗಿರಿಸಿಕೊಳ್ಳಲು ಸಹಾಯ ಮಾಡುತ್ತದೆ.
ಹೆರಿಗೆಯ ಬಗ್ಗೆ ಅನಾವಶ್ಯಕ ಭಯ ಬೇಡ
8ನೇ ತಿಂಗಳ ಬಳಿಕ ಸ್ವಾಭಾವಿಕವಾಗಿ ಹೆರಿಗೆಯ ದಿನಗಳ ಹತ್ತಿರವಾಗುತ್ತದೆ. ಹೀಗಾಗಿ ಆತಂಕ ಸಹಜ. ಆದರೆ ಒತ್ತಡಕ್ಕೆ ಒಳಗಾಗುವುದು ಬೇಡ. ಹೆರಿಗೆ ಪ್ರಕೃತಿಯ ಸಹಜ ನಿಯಮ ಹೀಗಾಗಿ ಆ ಸಂದರ್ಭ ಬಂದಾಗ ಅದನ್ನು ಯಶಸ್ವಿಯಾಗಿ ದಾಟಬಹುದು. ಹೀಗಾಗಿ ಮಾನಸಿಕವಾಗಿ ತಯರಾಗಿ ಹೊರತು ಭಯ ಬೇಡ.
ಇದರಿಂದ ಮಗುವಿನ ಮೇಲೆ ಪರಿಣಾಮ ಬೀರುತ್ತದೆ. ಅಲ್ಲದೆ ನಾರ್ಮಲ್‌ ಡೆಲಿವರಿ ಆಗುವಂತಿದ್ದರೂ ನಿಮ್ಮ ಅನಗತ್ಯ ಆತಂಕ ಅದಕ್ಕೆ ಅಡ್ಡಿಯಾಗಬಹುದು. ಅದ್ದರಿಂದ ಸಮಾಧಾನವಾಗಿರಿ.
ಇದನ್ನು ಓದಿ: ಗರ್ಭಾವಸ್ಥೆಯಲ್ಲಿ ಮಧುಮೇಹ ಬಂದರೆ ಈ ರೀತಿ ಆಹಾರಗಳನ್ನು ಸೇವಿಸಿ
ಹೆಚ್ಚಿನ ಯೋಗ, ವ್ಯಾಯಾಮ ಬೇಡ
ಆರಂಭದಿಂದಲೇ ಒಂದಷ್ಟು ಯೋಗ, ವ್ಯಾಯಾಮಗಳನ್ನು ಮಾಡಿಕೊಂಡು ಬಂದರೆ 8ನೇ ತಿಂಗಳ ಹೊತ್ತಿಗೆ ಅದು ದೆಹಕ್ಕೆ ಒಗ್ಗಿಕೊಂಡಿರುತ್ತದೆ. 8ನೇ ತಿಂಗಳ ಬಳಿಕ ಯಾವುದೇ ಹೊಸ ವ್ಯಾಯಾಮ ಮಾಡಬೇಡಿ. ಅದೂ ಅಲ್ಲದೆ ಸರಿಯಾದ ತರಬೇತಿ ಇಲ್ಲದೆ ಉಸಿರಾಟದ ವ್ಯಾಯಮಗಳನ್ನು ಪ್ರತ್ನಿಸಲೇಬೇಡಿ.
ವಾಕಿಂಗ್‌, ಲಘು ವ್ಯಾಯಾಮದ ಸಮಯವನ್ನು ಕಡಿಮೆಗೊಳಿಸಿ, ಹೆಚ್ಚು ವಿಶ್ರಾಂತಿ ಪಡೆದುಕೊಳ್ಳಿ. ಮುಖ್ಯ ವಿಚಾರವೆಂದರೆ ಯಾವುದೇ ಕಾರಣಕ್ಕೂ ವಿಟಮಿನ್‌ ಮಾತ್ರೆಗಳನ್ನು ತೆಗೆದುಕೊಳ್ಳುವುದನ್ನು, ಸರಿಯಾದ ಸಮಸಯದಲ್ಲಿ ವಿಶ್ರಾಂತಿ, ಪೌಷ್ಟಿಕ ಆಹಾರ ಸೇವನೆಯನ್ನು ತಪ್ಪಿಸಬೇಡಿ ಎನ್ನುತ್ತಾರೆ ಡಾ. ವೀಣಾ ಭಟ್‌.
ಇದನ್ನು ಓದಿ: ಗರ್ಭಿಣಿಯರಲ್ಲೇಕೆ ಕೆಮ್ಮಣ್ಣು ತಿನ್ನುವ ಬಯಕೆ ಕಾಡುತ್ತದೆ? ವೈದ್ಯರು ಹೇಳುವುದೇನು?
ಇದನ್ನು ಓದಿ: ಮಗುವಿಗೆ ಮೊಸರು ನೀಡುವುದರಿಂದ ಇಷ್ಟೆಲ್ಲಾ ಪ್ರಯೋಜನಗಳಿವೆ ನೋಡಿ...