ಅಂಕಿ ಅಂಶಗಳು
ಕೆಲವು ಅಧ್ಯಯನ ಹಾಗೂ ಸಂಶೋಧನೆಯ ಪ್ರಕಾರ ಶೇ.15 ರಿಂದ ಶೇ.20ರಷ್ಟು ಮಹಿಳೆಯರು ಪ್ರಸವ ಪೂರ್ವದಲ್ಲಿ ತೀವ್ರತರವಾದ ಭಯಕ್ಕೆ ಒಳಗಾಗುತ್ತಾರೆ. ಅದೇ ರೀತಿ ಶೇ.11 ರಿಂದ ಶೇ.17ರಷ್ಟು ಮಹಿಳೆಯರು ಪ್ರಸವದ ನಂತರ ಅತ್ಯಂತ ಆತಂಕಕ್ಕೆ ಒಳಗಾಗುತ್ತಾರೆ ಎಂದು ಹೇಳಲಾಗುವುದು. ದೇಹದಲ್ಲಾಗುವ ಬದಲಾವಣೆಗಳು ಹಾಗೂ ಭವಿಷ್ಯದಲ್ಲಿ ಎದುರಾಗಬಹುದಾದ ಬದಲಾದ ಜೀವನವನ್ನು ಅತಿಯಾದ ಕಲ್ಪನೆ ಮಾಡುವುದರಿಂದ ಹಾಗೂ ಚಿಂತನೆಯಿಂದಾಗಿ ಮಾನಸಿಕವಾಗಿ ಒತ್ತಡ ಹಾಗೂ ಭಯ ಉಂಟಾಗುವುದು ಎಂದು ತಜ್ಞರು ಅಭಿಪ್ರಾಯಿಸುತ್ತಾರೆ.
ಆತಂಕದ ಪ್ರಮುಖ ಕಾರಣಗಳು
ತನ್ನ ದೇಹದೊಳಗೆ ಇನ್ನೊಂದು ಜೀವಿಗೆ ಜೀವ ನೀಡಿ ಅದನ್ನು ಪೋಷಿಸುವ ತಾಯಿಗೆ ಕೆಲವು ವಿಷಯಗಳು ಅತೀವವಾಗಿ ಚಿಂತನೆ ನಡೆಸುವಂತೆ ಮಾಡುವುದು. ಮೊದಲ ಬಾರಿಗೆ ಅಮ್ಮನಾಗುತ್ತಿದ್ದೇನೆ ಎನ್ನುವ ಭಯ, ಭಾವನಾತ್ಮಕವಾದ ಬೆಂಬಲದ ಕೊರತೆ, ಆರ್ಥಿಕ ಒತ್ತಡ, ಮಗುವಿನ ಭವಿಷ್ಯ, ಮಗುವಿನ ಆಗಮನ, ಮೂಢ ನಂಬಿಕೆಗಳು, ದಾರಿ ತಪ್ಪಿಸುವ ಸುಳ್ಳು ಮಾಹಿತಿಗಳು ಹಾಗೂ ಈ ಮೊದಲೇ ಗರ್ಭಪಾತ ಅನುಭವಿಸಿದ ಅನುಭವ ಹೊಂದಿರುವುದು ಮಾನಸಿಕವಾಗಿ ಸಾಕಷ್ಟು ಚಿಂತನೆ ನಡೆಸುವಂತೆ ಮಾಡುವುದು. ಆ ಚಿಂತನೆಗಳು ನಿಧಾನವಾಗಿ ಗೀಳು ಅಥವಾ ಫೋಬಿಯವಾಗಿ ಆತಂಕವನ್ನು ಸೃಷ್ಟಿಸುವುದು.
ಶಿಶುಗಳಲ್ಲಿ ಮಲೇರಿಯಾದ ಲಕ್ಷಣಗಳು ಯಾವ ರೀತಿಯಾಗಿರುತ್ತದೆ ಗೊತ್ತ?
ಟೊಕೊಫೋಬಿಯಾ ಯಾಕೆ?
ಸಣ್ಣ ವಯಸ್ಸಿನಲ್ಲಿ ಇರುವಾಗ ಅಥವಾ ಗರ್ಭಾವಸ್ಥೆ ಹೊಂದುವ ಮೊದಲು ಗರ್ಭಾವಸ್ಥೆಗೆ ಸಂಬಂಧಿಸಿದ ಭೀಕರ ಚಿತ್ರ ಹಾಗೂ ವೀಡಿಯೋ ನೋಡಿರುವುದು, ಬಾಲ್ಯದಲ್ಲಿ ಪರಿಚಿತರು ಅಥವಾ ಅಪರಿಚಿತರಿಂದಲೇ ಲೈಂಗಿಕ ದೌರ್ಜನ್ಯಕ್ಕೆ ಒಳಗಾಗಿದ್ದರೆ ಅಥವಾ ಯಾರಿಂದಲಾದರೂ ನಿಂದನೆಗೆ ಒಳಗಾಗಿದ್ದರೆ ಟೊಕೊಫೋಬಿಯಾ ಅಥವಾ ಹೆರಿಗೆಯ ಬಗ್ಗೆ ತೀವ್ರವಾದ ಆತಂಕಕ್ಕೆ ಒಳಗಾಗುವ ಸಾಧ್ಯತೆಗಳು ಹೆಚ್ಚಾಗಿರುತ್ತವೆ. ಕೆಲವರು ಹೇಳಿರುವ ಅವರ ಅನುಭವ, ಹೆರಿಗೆಯ ನಂತರ ಉಂಟಾಗುವ ದೇಹದ ಬದಲಾವಣೆ, ಸ್ತನ್ಯ ಪಾನ, ಸಿ ವಿಭಾಗದ ಹೆರಿಗೆ ಸೇರಿದಂತೆ ಇನ್ನಿತರ ಕೆಲವು ಆಳವಾದ ಚಿಂತನೆಗಳು ಮಹಿಳೆಯರಲ್ಲಿ ಟೊಕೊಫೋಬಿಯಾ ಅನ್ನು ಸೃಷ್ಟಿಸುವುದು.
ಆತಂಕ ದೂರ ಮಾಡುವುದು ಹೇಗೆ?
ಪ್ರತಿಯೊಬ್ಬ ಮಹಿಳೆಯು ತಾನು ಗರ್ಭಾವಸ್ಥೆಯಲ್ಲಿ ಇರುವಾಗ ಸೂಕ್ತ ಆಹಾರ ಸೇವನೆಯ ಜೊತಗೆ ಉತ್ತಮ ಚಿಂತನೆಗಳನ್ನು ಕೈಗೊಳ್ಳಬೇಕು. ವೈದ್ಯರಲ್ಲಿ ಸಮಯಕ್ಕೆ ಅನುಗುಣವಾಗಿ ತಪಾಸಣೆ ಪಡೆಯುವುದು ಉತ್ತಮ. ಜೊತೆಗೆ ಹೆರಿಗೆ ಹಾಗೂ ಮಗುವಿನ ಬೆಳವಣಿಗೆಗೆ ಅಗತ್ಯವಾದ ಮಾಹಿತಿಯನ್ನು ಪಡೆಯಬೇಕು. ಅಲ್ಲದೆ ದೇಹದಲ್ಲಿ ಆಗುವ ಬದಲಾವಣೆಗೆ ಅನುಗುಣವಾಗಿ ಮಾನಸಿಕ ಚಿಂತನೆಗಳನ್ನು ಹೇಗೆ ನಿಯಂತ್ರಿಸಬೇಕು? ಎನ್ನುವುದರ ಕುರಿತಾಗಿಯೂ ಸೂಕ್ತ ಸಲಹೆ ಪಡೆದುಕೊಳ್ಳುವುದನ್ನು ಮರೆಯಬಾರದು. ಬಿಡುವಿನ ಸಮಯದಲ್ಲಿ ಧನಾತ್ಮಕ ವಿಷಯಗಳ ಬಗ್ಗೆ ಓದುವುದು ಹಾಗೂ ಚಿಂತನೆ ನಡೆಸುವುದರಿಂದ ಮಾನಸಿಕವಾಗಿ ಧೈರ್ಯ ಉಂಟಾಗುವುದು.
ಮಹಿಳೆಯರ ಸಂತಾನೋತ್ಪತ್ತಿ ವ್ಯವಸ್ಥೆ ಬಗ್ಗೆ ತಿಳಿಯಬೇಕಾದ ಸಂಗತಿಗಳು
ಆನ್ ಲೈನ್ನ ಮಾಹಿತಿ
ಅಂತರ್ಜಾಲ ಅಥವಾ ಆನ್ಲೈನ್ ಸಹಾಯದಿಂದ ಇಂದು ಬಹುತೇಕ ಜನರು ತಮ್ಮ ಸಮಸ್ಯೆ ಹಾಗೂ ಬದಲಾವಣೆಗಳ ಬಗ್ಗೆ ಮಾಹಿತಿಯನ್ನು ಪಡೆದುಕೊಳ್ಳುತ್ತಾರೆ. ಇದು ಕೆಲವು ಸಂಗತಿಗಳಿಗೆ ಅತ್ಯುತ್ತಮ ವಿಧಾನವಾಗಿರುತ್ತದೆ ನಿಜ. ಆದರೆ ಕೆಲವು ವಿಚಾರಗಳು ಮಾರಕ ಪ್ರಭಾವವನ್ನು ಸಹ ಬೀರುತ್ತದೆ ಎನ್ನುವುದನ್ನು ಅಲ್ಲಗಳೆಯುವಂತೆ ಇಲ್ಲ. ಗರ್ಭಾವಸ್ಥೆ ಹಾಗೂ ಹೆರಿಗೆ ಸಮಯದಲ್ಲಿ ಪಡೆದ ಅನುಭವ ಹಾಗೂ ವಿಷಯಗಳನ್ನು ಸಾಕಷ್ಟು ಜನರು ತಮ್ಮದೇ ಆದ ಅಭಿಪ್ರಾಯವನ್ನು ಹಂಚಿಕೊಂಡಿರುತ್ತಾರೆ. ಅದು ನಿಮಗೆ ನಕಾರಾತ್ಮಕ ಭಾವನೆ ಉಂಟಾಗಲು ಹಾಗೂ ಪ್ರಚೋದನೆ ನೀಡಲು ಕಾರಣವಾಗಬಹುದು. ಹಾಗಾಗಿ ಆನ್ಲೈನ್ ಅಲ್ಲಿ ಇರುವ ಅನಗತ್ಯವಾದ ಸಲಹೆಗಳನ್ನು ಪರಿಶೀಲಿಸುವುದು ಅಥವಾ ಅನುಕರಣೆ ಮಾಡುವುದನ್ನು ಮೊದಲು ತಪ್ಪಿಸಬೇಕು.
ಆರೋಗ್ಯ ಸ್ಥಿತಿಗೆ ಅನುಗುಣವಾದ ಮಾಹಿತಿ
ಪ್ರತಿ ತಿಂಗಳು ವೈದ್ಯರಲ್ಲಿ ದೈಹಿಕ ತಪಾಸಣೆ ನಡೆಸುವುದು ಹಾಗೂ ಮಗುವಿನ ಬೆಳವಣಿಗೆಯ ಬಗ್ಗೆ ತಿಳಿದುಕೊಳ್ಳಿ. ಅವರ ಸಲಹೆಯ ಅನುಸಾರ ಪ್ರಸವಕ್ಕೆ ಯಾವ ರೀತಿಯ ಸಿದ್ಧತೆ ಕೈಗೊಳ್ಳಬೇಕು? ಅದಕ್ಕಾಗಿ ನಿಮ್ಮ ಮಾನಸಿಕ ಸ್ಥಿತಿಯನ್ನು ಹೇಗೆ ಬದಲಿಸಿಕೊಳ್ಳಬೇಕು? ಮನಸ್ಸಿಗೆ ಧೈರ್ಯ ತಂದುಕೊಳ್ಳುವ ಬಗೆಯನ್ನು ಅನುಸರಿಸಿಕೊಳ್ಳಿ. ಭವಿಷ್ಯದಲ್ಲಿ ಉಂಟಾಗುವ ಬದಲಾವಣೆಯ ಬಗ್ಗೆ ಅತೀವ ಚಿಂತನೆ ಹಾಗೂ ದುಃಖಕ್ಕೆ ಒಳಗಾಗುವುದನ್ನು ತಪ್ಪಿಸುವುದು ಉತ್ತಮ.
ಪ್ರಸವದ ಪರಿ
ಇಂದು ವೈಜ್ಞಾನಿಕವಾಗಿ ಸಾಕಷ್ಟು ಸೌಲಭ್ಯಗಳು ಹಾಗೂ ಚಿಕಿತ್ಸೆಗಳಿವೆ. ಹಾಗಾಗಿ ಗರ್ಭಾವಸ್ಥೆಯಲ್ಲಿ ಇರುವ ಮಹಿಳೆಯರು ಅತಿಯಾದ ಚಿಂತನೆಗೆ ಒಳಗಾಗುವ ಅಗತ್ಯ ಇರುವುದಿಲ್ಲ. ನೈಸರ್ಗಿಕವಾದ ಪ್ರಸವ ಸಾಧ್ಯವಿಲ್ಲದೆ ಇದ್ದರೆ ಸಿ ವಿಭಾಗದ ಪ್ರಸವ ಮಾಡಲಾಗುವುದು. ಪ್ರಸವದ ಸಮಯದಲ್ಲಿ ಯಾವೆಲ್ಲಾ ಸುರಕ್ಷಿತವಾದ ಕ್ರಮವನ್ನು ಕೈಗೊಳ್ಳಬಹುದು? ಎನ್ನುವುದನ್ನು ಸಹ ವೈದ್ಯರು ಮನಗಂಡಿರುತ್ತಾರೆ. ಹಾಗಾಗಿ ಸೂಕ್ತ ಆಸ್ಪತ್ರೆ ಹಾಗೂ ತಜ್ಞ ವೈದ್ಯರ ಸಲಹೆ ಮತ್ತು ತಪಾಸಣೆಗೆ ಒಳಗಾಗುವುದನ್ನು ಅನುಸರಿಸಬೇಕು ಅಷ್ಟೆ. ಪ್ರಸವದ ಬಗ್ಗೆ ಅನಗತ್ಯವಾದ ಚಿಂತನೆ ನಡೆಸಿ, ರಕ್ತದೊತ್ತಡ ಅಥವಾ ಪೋಬಿಯಾಗಳಿಗೆ ಒಳಗಾಗುವುದರಿಂದ ಯಾವುದೇ ಪ್ರಯೋಜನ ಇರುವುದಿಲ್ಲ. ಆದಷ್ಟು ಅಂತಹ ಚಿಂತನೆಗಳಿಂದ ಹೊರ ಬರಲು ಪ್ರಯತ್ನಿಸುವುದು ಉತ್ತಮ.