ಆರೋಗ್ಯಕಾರಿ ಜೀವನಶೈಲಿ ಮತ್ತು ಅಭ್ಯಾಸಗಳು ಗರ್ಭಧರಿಸುವಲ್ಲಿ ಪ್ರಮುಖ ಪಾತ್ರ ವಹಿಸುವುದು ಎಂದು ಹೇಳಲಾಗಿದೆ. ಆರೋಗ್ಯಕಾರಿ ಆಹಾರ ಸೇವನೆಯ ಜತೆಗೆ ಜೀವನಶೈಲಿಯಲ್ಲಿ ಕೆಲವೊಂದು ಬದಲಾವಣೆಗಳನ್ನು ಮಾಡಿಕೊಂಡರೆ ಆಗ ಖಂಡಿತವಾಗಿಯೂ ಬೇಗನೆ ಗರ್ಭ ಧರಿಸಲು ಸಾಧ್ಯವಾಗುವುದು. ದಂಪತಿಯಲ್ಲಿ ಕಂಡುಬರುವಂತಹ ಈ ಮೂರು ಜೀವನಶೈಲಿಯಿಂದಾಗಿ ಅವರಿಗೆ ಮಗುವನ್ನು ಪಡೆಯಲು ಹಿನ್ನಡೆಯಾಗಬಹುದು. ಆ ಮೂರು ಜೀವನ ಶೈಲಿಯು ಈ ರೀತಿಯಾಗಿದೆ… ಪುರುಷರಲ್ಲಿ ವೀರ್ಯ ಗಣತಿ ಕಡಿಮೆ ಮಾಡುವ ಮೂರು ಜೀವನಶೈಲಿಗಳು
ನಿದ್ರೆ
ಆರೋಗ್ಯಕಾರಿ ನಿದ್ರೆಯು ಸಂಪೂರ್ಣ ಆರೋಗ್ಯದ ಮೇಲೆ ಪರಿಣಾಮ ಬೀರುವುದು ಎನ್ನುವುದು ನಮಗೆಲ್ಲರಿಗೂ ತಿಳಿದೇ ಇದೆ. ಅದೇ ರೀತಿಯಾಗಿ ನಿದ್ರಾಹಿನತೆಯು ಹಲವಾರು ಅನಾರೋಗ್ಯಕ್ಕೆ ಕಾರಣವಾಗಬಲ್ಲದು. ಮುಖ್ಯವಾಗಿ ಇದು ವೀರ್ಯದ ಗಣತಿ ಮೇಲೆ ಪರಿಣಾಮ ಬೀರುವುದು.
ನಿದ್ರಾಹೀನತೆಯಿಂದಾಗಿ ಟೆಸ್ಟೋಸ್ಟೆರಾನ್ ಹಾರ್ಮೋನ್ ಕಡಿಮೆ ಆಗುವುದು. ಹೀಗಾಗಿ ಗುಣಮಟ್ಟದ ವೀರ್ಯ ಹಾಗೂ ನಿದ್ರೆಗೆ ನೇರ ಸಂಬಂಧವಿದೆ ಎಂದು ಆರೋಗ್ಯ ತಜ್ಞರು ಹೇಳಿರುವರು.
ಮೊಬೈಲ್ನ್ನು ಕಿಸೆಯಲ್ಲಿ ಇಟ್ಟುಕೊಳ್ಳುವುದು
ಮೊಬೈಲ್ ಎನ್ನುವುದು ನಮ್ಮ ಜೀವನದ ಪ್ರಮುಖ ಅಂಗವಾಗಿ ಹೋಗಿದೆ. ಆದರೆ ಹೆಚ್ಚಿನ ಪುರುಷರು ಮೊಬೈಲ್ ನ್ನು ಪ್ಯಾಂಟ್ ನ ಕಿಸೆಯಲ್ಲಿ ಇಡುವರು. ಆದರೆ ಈ ಅಭ್ಯಾಸದಿಂದಾಗಿ ವೀರ್ಯದ ಗುಣಮಟ್ಟದ ಮೇಲೆ ಪರಿಣಾಮ ಬೀರುವುದು ಮತ್ತು ವೀರ್ಯದ ಚಲನಶೀಲತೆಗೂ ಹಾನಿ ಉಂಟು ಮಾಡುವುದು.
ಮೊಬೈಲ್ ನಿಂದ ಬಿಡುಗಡೆಯಾಗಿರುವಂತಹ ವಿಕಿರಣವು ವೀರ್ಯದಲ್ಲಿನ ಡಿಎನ್ ಎ ಗೆ ಹಾನಿ ಉಂಟು ಮಾಡಬಹುದು ಮತ್ತು ಮೊಬೈಲ್ ಬಿಸಿ ಆದರೆ ಅದು ವೃಷಣದಲ್ಲಿ ಉಷ್ಣತೆ ಹೆಚ್ಚು ಮಾಡಿ ವೀರ್ಯದ ಗುಣಮಟ್ಟಕ್ಕೆ ಹಾನಿ ಮಾಡುವುದು ಎಂದು ತಜ್ಞರು ಅಭಿಪ್ರಾಯಪಡುವರು.
ಅತಿಯಾದ ಆಲ್ಕೋಹಾಲ್ ಮತ್ತು ಧೂಮಪಾನ
ಇದೆರಡೂ ಸಾಮಾನ್ಯವಾಗಿ ಆರೋಗ್ಯಕ್ಕೆ ತುಂಬಾ ಹಾನಿಕರ. ಅದೇ ರೀತಿಯಾಗಿ ಇದೆರಡನ್ನು ಅತಿಯಾಗಿ ಸೇವನೆ ಮಾಡಿದರೆ ಅದರಿಂದ ಪುರುಷರ ಸಂತಾನೋತ್ಪತ್ತಿ ವ್ಯವಸ್ಥೆ ಮೇಲೆ ಅದು ಪರಿಣಾಮ ಬೀರುವುದು.
ವೀರ್ಯವನ್ನು ಉತ್ಪಾದಿಸುವಂತಹ ಜೀವಕೋಶಗಳು ಮತ್ತು ಪುರುಷರ ಹಾರ್ಮೋನ್ ಟೆಸ್ಟೋಸ್ಟೆರಾನ್ ಉತ್ಪತ್ತಿ ಮೇಲೆ ಇದು ವ್ಯತಿರಿಕ್ತ ಪರಿಣಾಮ ಬೀರುವುದು. ದೀರ್ಘಕಾಲಿಕವಾಗಿ ಅತಿಯಾದ ಕುಡಿತ ಮತ್ತು ಧೂಮಪಾನದಿಂದ ವೃಷಣವು ಕುಗ್ಗುವುದು ಮತ್ತು ಅಸಾಮಾನ್ಯ ವೀರ್ಯವು ಹೆಚ್ಚಾಗಿ, ವೀರ್ಯದ ಗಣತಿ ಹಾಗೂ ಚಲನಶೀಲತೆಯು ಕಡಿಮೆ ಆಗುವುದು. ಇದರಿಂದ ಡಿಎನ್ ಎ ಗೆ ಕೂಡ ಹಾನಿ ಸಂಭವಿಸುವುದು. ಮಹಿಳೆಯರಲ್ಲಿ ಗರ್ಭಧಾರಣೆಗೆ ಅಡ್ಡಿಯಾಗುವ ಮೂರು ಅಭ್ಯಾಸಗಳು
ಮದ್ಯವ್ಯಸನಿಗಳು ಕುಡಿಯೋದನ್ನು ಬಿಡೋದರಿಂದ ಯಾವೆಲ್ಲಾ ಲಾಭಗಳಿವೆ ಗೊತ್ತಾ?
ಧೂಮಪಾನ
ಗರ್ಭಧಾರಣೆಗೆ ಮೊದಲು ಹಾಗೂ ಬಳಿಕ ಧೂಮಪಾನವು ಮಹಿಳೆಯರ ಆರೋಗ್ಯಕ್ಕೆ ಹಾನಿ ಉಂಟು ಮಾಡಬಹುದು. ಧೂಮಪಾನದಿಂದಾಗಿ ಗರ್ಭಪಾತವಾಗುವುದು ಮತ್ತು ಹಾರ್ಮೋನ್ ಉತ್ಪತ್ತಿಯಲ್ಲಿ ಕೂಡ ವ್ಯತ್ಯಯವಾಗುವುದು. ಇದರಿಂದ ಗರ್ಭಕೋಶದ ಮೇಲೆ ಪರಿಣಾಮ ಉಂಟಾಗುವುದು. ಐಯುಜಿಆರ್ ನ ಅಪಾಯವು ಹೆಚ್ಚಾಗಿ ಇರುವುದು ಮತ್ತು ತಾಯಂದಿರಲ್ಲಿ ಗರ್ಭಧಾರಣೆ ಸಂದರ್ಭದಲ್ಲಿ ನಂಜು ಉಂಟಾಗುವುದು.
ಆಲ್ಕೋಹಾಲ್
ಆಲ್ಕೋಹಾಲ್ ತ್ಯಜಿಸುವುದು ಆರೋಗ್ಯಕ್ಕೆ ಒಳ್ಳೆಯದು. ಅದರಲ್ಲೂ ಗರ್ಭ ಧರಿಸಬೇಕಾಗಿರುವ ಮಹಿಳೆಯರು ಇದರಿಂದ ದೂರವಿದ್ದರೆ ತುಂಬಾ ಒಳ್ಳೆಯದು. ಗರ್ಭಧಾರಣೆ ಆಗಬೇಕೆಂದು ಬಯಸುವಂತಹ ಮಹಿಳೆಯರು ಆಲ್ಕೋಹಾಲ್ ಸೇವನೆಯನ್ನು ಕಡಿಮೆ ಮಾಡಿಕೊಳ್ಳಬೇಕು. ಆಲ್ಕೋಹಾಲ್ ಸೇವನೆ ಮಾಡಿದರೆ ಅದರಿಂದ ಋತುಚಕ್ರದ ಆವರ್ತನ, ಅಂಡಾಣುವಿನ ಗುಣಮಟ್ಟದ ಮೇಲೆ ಪರಿಣಾಮ ಬೀರುವುದು ಮತ್ತು ಇದರಿಂದ ಗರ್ಭ ಧರಿಸುವ ಸಾಧ್ಯತೆಯು ಕಡಿಮೆ ಆಗುವುದು. ಹಾರ್ಮೋನ್ ಸಾಂದ್ರತೆಯು ಕುಸಿಯುವುದು ಮತ್ತು ಗರ್ಭಪಾತದ ಅಪಾಯವು ಇದರಿಂದ ಹೆಚ್ಚಾಗುವುದು ಎಂದು ಆರೋಗ್ಯ ತಜ್ಞರು ತಿಳಿಸುವರು.
ಒತ್ತಡ
ಆಧುನಿಕ ಯುಗದಲ್ಲಿ ಪ್ರತಿಯೊಬ್ಬರಿಗೂ ಒತ್ತಡವೂ ಇದ್ದೇ ಇರುತ್ತದೆ. ಇದಕ್ಕೆ ಮಹಿಳೆಯರು ಹೊರತಾಗಿಲ್ಲ. ಮಹಿಳೆಯರು ಅತಿಯಾದ ಒತ್ತಡಕ್ಕೆ ಒಳಗಾದರೆ ಆಗ ಖಂಡಿತವಾಗಿಯೂ ಅದು ಗರ್ಭಧಾರಣೆ ಮೇಲೆ ಪರಿಣಾಮ ಬೀರುವುದು.
ಒತ್ತಡದಿಂದ ಹಾರ್ಮೋನ್ ನಿಯಂತ್ರಿಸುವಂತಹ ಗ್ರಂಥಿಯ ಮೇಲೆ ಪರಿಣಾಮ ಬೀರುವುದು. ಇದರಿಂದ ಅಂಡೋತ್ಪತ್ತಿ ಆವರ್ತನದ ಮೇಲೆ ಪರಿಣಾಮ ಬೀರುವುದು. ಹೀಗಾಗಿ ಋತುಚಕ್ರ ಮತ್ತು ಅಂಡೋತ್ಪತ್ತಿಯಲ್ಲಿ ಅಸಾಮಾನ್ಯತೆಯು ಕಂಡುಬರುವುದು.
ಗರ್ಭಧಾರಣೆಗೆ ಅಡ್ಡಿಯಾಗುವಂತಹ ಅಭ್ಯಾಸಗಳನ್ನು ತಿಳಿದುಕೊಂಡಿದ್ದೀರಿ. ಇಂತಹ ಅಭ್ಯಾಸಗಳು ನಿಮಗಿದ್ದರೆ, ಕೂಡಲೇ ಇದನ್ನು ಬಿಟ್ಟು ಆರೋಗ್ಯಕಾರಿ ಜೀವನಶೈಲಿ ಅಳವಡಿಸಿಕೊಂಡು ಗರ್ಭಧಾರಣೆಗೆ ಪ್ರಯತ್ನಿಸಿ.