ಮಗುವಿನ ಕೂದಲಿನ ಬೆಳವಣಿಗೆಯನ್ನು ಹೆಚ್ಚಿಸಲು ಸಹಾಯ ಮಾಡುವ ಅತ್ಯಂತ ಪ್ರಭಾವಶಾಲಿ ಅಂಶವೆಂದರೆ ಪೋಷಣೆ. ಮಗುವಿಗೆ ಘನ ಆಹಾರ ನೀಡುವಾಗ ಹಸಿರು, ತರಕಾರಿಗಳು, ಹಣ್ಣುಗಳು, ದ್ವಿದಳ ಧಾನ್ಯಗನ್ನು ನೀಡಿ. ಇವು ಮಗುವಿನ ಕೂದಲ ಬೆಳವಣಿಗೆಗೆ ಸಹಕಾರಿಯಾಗಿದೆ. ನಿಮ್ಮ ಮಗುವಿನ ಕೂದಲು ಚೆನ್ನಾಗಿ ಬೆಳೆಯಬೇಕಾದರೆ ಈ ಕೆಲವು ಟಿಪ್ಸ್‌ಗಳನ್ನು ಪಾಲಿಸಿ.
ತಲೆ ತೊಳೆಯುವುದು
ನೀವು ಮಗುವಿಗೆ ತಲೆ ಸ್ನಾನ ಮಾಡಿಸುವಾಗ ಆದಷ್ಟು ಜಾಗರೂಕರಾಗಿರಬೇಕು. ಕಣ್ಣು ಉರಿಯಾಗದಂತಹ ಬೇಬಿ ಶಾಂಪೂ ಬಳಸಿದರೆ ಒಳ್ಳೆಯದು. ಪ್ರತಿದಿನ ತಲೆಗೆ ಸ್ನಾನ ಮಾಡಿಸುವುದರಿಂದ ಮಗುವಿನ ರಕ್ತ ಪರಿಚಲನೆಯನ್ನು ಹೆಚ್ಚಿಸುತ್ತದೆ ಮತ್ತು ಮಗುವಿನ ನೆತ್ತಿಯ ನೈರ್ಮಲ್ಯವನ್ನು ಕಾಪಾಡುತ್ತದೆ.
ಹೊಟ್ಟೆಯ ಮೇಲೆ ಮಲಗಿಸಿ
ನಿಮ್ಮ ಮಗು ಇಡೀ ದಿನ ಬೆನ್ನಿನ ಮೇಲೆ ಮಲಗಿದರೆ ಅದು ಮಗುವಿನ ತಲೆಯನ್ನು ಚಪ್ಪಟಡಯಾಗಿಸುವುದಲ್ಲದೆ, ಹಿಂಭಾಗದ ಕೂದಲು ಉದುರಲು ಕಾರಣವಾಗುತ್ತದೆ. ಹಾಗಾಗಿ ಹಿಂಭಾಗದಲ್ಲಿ ಬೋಳಾಗಲು ಪ್ರಾರಂಭವಾಗುತ್ತದೆ.
ನಿಮ್ಮ ಮಗುವಿನ ಭಂಗಿಯನ್ನು ಆಗಾಗ್ಗೆ ಬದಲಾಯಿಸುವ ಮೂಲಕ ನೀವು ಈ ಸಮಸ್ಯೆಯನ್ನು ತೊಡೆದುಹಾಕಬಹುದು. ಯಾವಾಗಲೂ ಬೆನ್ನಿನ ಮೇಲೆ ಮಲಗಿಸುವುದರಿಂದ ಹಿಂಭಾಗದಲ್ಲಿ ಅಲ್ಲಲ್ಲಿ ತೇಪೆ ಹಾಕಿದಂತೆ ಕಾಣುತ್ತದೆ. ಅದಕ್ಕೆ ಪ್ರತಿದಿನ ಸ್ವಲ್ಪ ಸಮಯದವರೆಗೆ ಹೊಟ್ಟೆಯ ಮೇಲೆ ಮಲಗಿಸಿ.
ತಲೆಗೆ ಮಸಾಜ್ ಮಾಡಿ
ನಿಮ್ಮ ಮಗುವಿನ ತಲೆಯನ್ನು ತೆಂಗಿನ ಎಣ್ಣೆ ಅಥವಾ ಎಳ್ಳಿನ ಎಣ್ಣೆಯಂತಹ ಎಣ್ಣೆಗಳಿಂದ ಆಗಾಗ ಮಸಾಜ್ ಮಾಡುವುದರಿಂದ ಕೂದಲಿನ ಬೆಳವಣಿಗೆಯನ್ನು ಚೆನ್ನಾಗಿ ಆಗುತ್ತದೆ. ಮಸಾಜ್ ಮಾಡುವುದರಿಂದ ರಕ್ತ ಪೂರೈಕೆಯನ್ನು ಹೆಚ್ಚಿಸುತ್ತದೆ. ಉತ್ತಮ ಫಲಿತಾಂಶಕ್ಕಾಗಿ ನೀವು ನಿಯಮಿತವಾಗಿ ಮಸಾಜ್ ಮಾಡಬೇಕು.
ಕೂದಲನ್ನು ಎಚ್ಚರಿಕೆಯಿಂದ ಬಾಚಿಕೊಳ್ಳಿ
ಮಗುವಿನ ಚಟುವಟಿಕೆಗಳು ತಮ್ಮ ಬೆನ್ನಿನ ಮೇಲೆ ಮಲಗುವುದು, ಹೊಟ್ಟೆ, ತಿರುಚುವುದು ಇತ್ಯಾದಿಗಳನ್ನು ಒಳಗೊಂಡಿರುತ್ತದೆ. ಇದರಿಂದ ಅವರ ಕೂದಲು ಅಲ್ಲಲ್ಲಿ ಸಿಕ್ಕು ಆಗುತ್ತದೆ. ಸಣ್ಣ ಸಣ್ಣ ಗಂಟುಗಳಾಗುತ್ತದೆ. ನೀವು ಆ ಸಿಕ್ಕುಗಳನ್ನು ನಿಧಾನವಾಗಿ ಬಿಡಿಸಬೇಕು. ನಿಮ್ಮ ಬೆರಳುಗಳ ಸಹಾಯದಿಂದ ಸಿಕ್ಕು ಬಿಡಿಸಿದರೂ ಆಗಬಹುದು, ಇಲ್ಲವಾದರೆ ಬೇಬಿ ಹೇರ್‌ ಬ್ರಷ್‌ ಮೂಲಕ ಕೂದಲನ್ನು ಮೆಲ್ಲಗೆ ಬಾಚಿರಿ.
ಕೇಶವಿನ್ಯಾಸ
ನಿಮ್ಮ ಮಗುವಿನ ಕೂದಲಿನೊಂದಿಗೆ ನೀವು ಸಾಕಷ್ಟು ಪ್ರಯೋಗಗಳನ್ನು ಮಾಡಲು ಬಯಸುವಿರಿ. ಆದರೆ ಪುಟ್ಟ ಕಂದಮ್ಮನ ಕೂದಲಿನಲ್ಲಿ ಯಾವುದೇ ಪ್ರಯೋಗ ಮಾಡುವುದು ಸರಿಯಲ್ಲ. ನೀವು ಕೂದಲನ್ನು ಕಟ್ಟುವುದರಿಂದ ಅಥವಾ ಯಾವುದೇ ಬಲವಾದ ರಬ್ಬರ್‌ ಬ್ಯಾಂಡ್ ಅಥವಾ ಕ್ಲಿಪ್ ಹಾಕುವುದರಿಂದ ಮಗುವಿನ ಕೂದಲನ್ನು ಬಿಗಿಯಾಗಿ ಎಳೆದಂತಾಗುತ್ತದೆ. ಇದರಿಂದ ಕೂದಲಿನ ಬೇರುಗಳು ಸಡಿಲಗೊಳ್ಳುತ್ತವೆ.