ಸ್ಟಾಶಿಂಗ್‌ ಎಂಬ ಸಂಬಂಧದ ಬಗ್ಗೆ ಇರಲಿ ಎಚ್ಚರ

ಜತೆಗೆ ಇದ್ದರೂ ತಮ್ಮ ಸಂಬಂಧವನ್ನು ಬಿಟ್ಟುಕೊಡದ, ಸಂಗಾತಿ ಬಗ್ಗೆ ಗುಟ್ಟು ಮಾಡುವುದೇ ಸ್ಟ್ಯಾಶಿಂಗ್‌ ಎಂದೆನಿಸಿಕೊಳ್ಳುತ್ತದೆ.

ಯಾರದ್ದೋ ಜತೆ ಡೇಟ್‌ ಮಾಡುತ್ತಿರುತ್ತಾರೆ. ಆದರೆ ಅದು ಎಲ್ಲೂ ವ್ಯಕ್ತವಾಗುವುದೇ ಇಲ್ಲ. ಸ್ನೇಹಿತರು, ಮನೆಯವರೊಂದಿಗೆ ಹೇಳಿಕೊಳ್ಳುವುದಿಲ್ಲ. ಅವರೊಂದಿಗೆ ತೆಗೆಸಿಕೊಂಡ ಫೋಟೊ ಶೇರ್‌ ಮಾಡುವುದಿಲ್ಲ. ಹಾಗಂತ ಅದು ಕದ್ದು ಮುಚ್ಚಿ ನಡೆಯುವ ಸಂಬಂಧ ಅಂತಲ್ಲ, ಆದರೆ ಸಂಬಂಧದ ವ್ಯಾಲಿಡಿಟಿಯ ಬಗ್ಗೆ ಗೊಂದಲ ಇರುತ್ತದೆ. ಇರುವಷ್ಟು ದಿನ ಇದ್ದು ಹೋಗುವ ಸಂಬಂಧಕ್ಕೊಂದು ಗಟ್ಟಿಯಾದ ತಳಪಾಯ ಇರುವುದೇ ಇಲ್ಲ.

ನಿರ್ಲಕ್ಷ್ಯವಾ?

ಒಂದು ಸಂಬಂಧದಲ್ಲಿ ಗುರುತಿಸಿಕೊಂಡಾಗ ಅದನ್ನು ಮುಚ್ಚಿಡುವುದರಿಂದ ಸಂಗಾತಿಗಳ ನಡುವೆ ಆಗಾಗ ಭಿನ್ನಾಭಿಪ್ರಾಯ ಉಂಟಾಗುತ್ತದೆ. ಸಂಗಾತಿ ತನ್ನನ್ನು ನಿರ್ಲಕ್ಷಿಸುತ್ತಿರಬಹುದು ಎಂಬ ಅಭದ್ರತೆಯೂ ಕಾಡಲು ಇದೇ ಕಾರಣವಾಗಬಹುದು. ಆದರೂ ಸಂಬಂಧದೊಳಗೆ ಖುಷಿ ಇರುತ್ತದೆ. ಒಂದು ಗುಟ್ಟನ್ನು ಬಹಳ ದಿನ ಕಾಪಾಡುವುದು ಕಷ್ಟ. ಆದ್ದರಿಂದ ಅವರಿಗೆ ನಿಮ್ಮ ಮನಸಲ್ಲಿ ಏನು ನಡೆಯುತ್ತಿದೆ ಅಂತ ಬಿಡಿಸಿ ಹೇಳಿ. ಆಗಲೂ ಅವರು ಕೇಳದಿದ್ದರೆ ಅಥವಾ ಬಹಳ ಉದ್ದವಾದ ಮತ್ತು ಅರ್ಥವಾಗದ ವಿವರಣೆ ಕೊಡಲು ಶುರು ಮಾಡಿದರೆ ಅವರನ್ನು ಬಿಟ್ಟು ಹೊರ ಬನ್ನಿ. ಏಕೆಂದರೆ ಅವರು ಬದಲಾಗಲಾರರು. ಅವರ ಬದಲಿಗೆ ನಿಮ್ಮನ್ನು ಯಾರು ತಮ್ಮ ಹೆಮ್ಮೆಯ ಭಾಗ ಎಂದುಕೊಳ್ಳುತ್ತಾರೋ ಅವರನ್ನು ಪ್ರೀತಿಸಿ.

ಗುರುತಿಸುವುದು ಹೇಗೆ?

ನಿಮ್ಮಿಬ್ಬರ ಸಂಬಂಧದ ಬಗ್ಗೆ ಭರವಸೆಯ ಮಾತುಗಳನ್ನು ಆಡುವುದಿಲ್ಲ.

ಅವರ ಮನೆಯವರಿಗೆ ನಿಮ್ಮನ್ನು ಪರಿಚಯ ಮಾಡಿ ಕೊಡುವುದಿಲ್ಲ.

ಸಾಮಾಜಿಕ ಜಾಲತಾಣದಲ್ಲಿ ತಾವು ಒಟ್ಟಾಗಿ ತೆಗೆಸಿಕೊಂಡ ಫೋಟೋ ಶೇರ್‌ ಮಾಡುವುದಿಲ್ಲ.

ನಿಮ್ಮ ಬಗ್ಗೆ ಪ್ರೀತಿಯ ಮಾತು, ಸಿಟ್ಟು, ಜಗಳ ಯಾವುದನ್ನೂ ಇತರರೊಖಂದಿಗೆ ಶೇರ್‌ ಮಾಡುವುದಿಲ್ಲ.