ಮೊದಲ ಡೇಟಿಂಗ್‌ನಲ್ಲಿರಲಿ ಆತ್ಮವಿಶ್ವಾಸ

ಡೇಟ್‌ ಮಾಡಲು ಹೊರಟಿದ್ದೀರ ಅಂದರೆ ನಿಮ್ಮ ಸೌಂದರ‍್ಯ, ವೇಷಭೂಷಣವಷ್ಟೆ ಅಲ್ಲ, ನೀವು ಭೇಟಿಯಾಗುವ ವ್ಯಕ್ತಿಯೊಂದಿಗೆ ಹೇಗೆ ವ್ಯವಹರಿಸುತ್ತೀರ ಎಂಬುದು ಕೂಡ ಮುಖ್ಯ. ಎಲ್ಲಕ್ಕಿಂತ ಹೆಚ್ಚಾಗಿ ಆತ್ಮವಿಶ್ವಾಸ ಇಲ್ಲಿ ಪ್ರಾಮುಖ್ಯ ಪಡೆಯುತ್ತದೆ. ಮೊದಲ ಬಾರಿಗೆ ರೊಮ್ಯಾಂಟಿಕ್‌ ಸಂಗಾತಿಯನ್ನು ಭೇಟಿ ಆಗುತ್ತಿದ್ದೀರ ಅಂದರೆ ಅಳುಕು, ಹಿಂಜರಿಕೆ ಸಹಜ. ಆದರೆ ಇದೇ ನಿಮ್ಮ ಸುಂದರ ಡೇಟ್‌ ಅನ್ನು ಹಾಳು ಮಾಡಬಾರದು. ಹಾಗಾಗಿ ಆತ್ಮ ವಿಶ್ವಾಸವನ್ನು ಜತೆಗಿಟ್ಟುಕೊಂಡೇ ಮುಂದುವರಿಯಿರಿ.

• ಸಾಧ್ಯವಾದಷ್ಟು ರಿಲ್ಯಾಕ್ಸ್‌ ಆಗಿರಿ. ಅನಗತ್ಯ ಗೊಂದಲ, ಒತ್ತಡ ಬೇಡ.

• ಹೊಸ ಪರಿಚಯದಲ್ಲಿ ಆತ್ಮೀಯತೆ ಮೂಡಿಸುವುದು ಕಣ್ಣುಗಳು. ಆಕರ್ಷಕ ಕಣ್ಣುಗಳನ್ನು ಹೊಂದಿದ್ದರೆ ಸಾಲದು. ಆತ್ಮ ವಿಶ್ವಾಸ ಕಣ್ಣಲ್ಲಿ ಹೊಳೆಯಲಿ.

• ನೀವು ಧರಿಸುವ ಬಟ್ಟೆ , ಮೇಕಪ್‌ ನಿಮ್ಮ ಸೌಂದರ‍್ಯವನ್ನು ಇಮ್ಮಡಿಗೊಳಿಸಿದರೂ ಅವು ಆ ಕ್ಷಣಕ್ಕೆ ಕಂಫರ್ಟ್‌ಬಲ್‌ ಅನುಭವ ನೀಡುವಂತಿರಬೇಕು.

• ನಿಮ್ಮ ಎದುರಿಗಿರುವ ವ್ಯಕ್ತಿಯ ಮಾತನ್ನು ಸ್ಪಷ್ಟವಾಗಿ ಕೇಳಿಸಿಕೊಳ್ಳಿ. ನಿರಾಸಕ್ತಿ ತೋರಿಸುವ ಅಥವಾ ಅವರ ಭಾವನೆ, ಅಭಿಪ್ರಾಯಗಳಿಗೆ ಧಕ್ಕೆ ಆಗುವ ರೀತಿ ಮಾತನಾಡಬೇಡಿ.

• ನಿಮ್ಮ ಮಾತುಗಳನ್ನು ಕೇಳಿಸಿಕೊಳ್ಳಲು ಅಥವಾ ನಿಮಗೆ ಏನನ್ನೋ ಹೇಳಲು ನಿಮ್ಮ ಎದುರಿಗೆ ಇನ್ನೊಬ್ಬರಿದ್ದಾರೆ ಎಂಬುದು ನೆನಪಿರಲಿ. ಅವರೆದುರು ಕುಳಿತು ನೀವು ಮೊಬೈಲ್‌ನಲ್ಲಿ ಮುಳುಗಿದ್ದರೆ ನಿಮ್ಮ ಎದುರಿಗಿರುವ ವ್ಯಕ್ತಿಗೆ ಕಿರಿಕಿರಿ ಆಗಬಹುದು.

• ನೀವು ಸಂಬಂಧವೊಂದಕ್ಕೆ ಕಮಿಟ್‌ ಆಗುವ ಹಂತದಲ್ಲಿದ್ದೀರ ಅಂದರೆ ಪರಸ್ಪರ ನಿಮ್ಮ ಬಗ್ಗೆ ಹೇಳಿಕೊಳ್ಳಿ. ಗೊಂದಲಗಳನ್ನು ಸಾಧ್ಯವಾದಷ್ಟು ಪ್ರಾಥಮಿಕ ಹೆಜ್ಜೆಯಲ್ಲೇ ಪರಿಹರಿಸಿಕೊಳ್ಳಿ.