*ಶುಭಾ ವಿಕಾಸ್‌
ಪ್ರೇಮ ನಿವೇದನೆ ಬಹುತೇಕರಿಗೆ ಸುಲಭವಲ್ಲ. ಅದಕ್ಕೊಂದು ಸಂದರ್ಭ, ಸ್ಥಳವೂ ಪೂರಕವಾಗಿರಬಹುದು. ಅದೇ ಇದೀಗ ಡೆಸ್ಟಿನೇಷನ್‌ ಪ್ರಪೋಸಲ್‌ ಹೆಸರಿನಲ್ಲಿ ಗಮನ ಸೆಳೆಯುತ್ತಿದೆ. ಈಗಾಗಲೇ ಪ್ರವಾಸಿ ತಾಣಗಳಲ್ಲಿ ವಿವಾಹ ನಡೆಯುವ ಅಥವಾ ವಿವಾಹಕ್ಕಾಗಿಯೇ ಸ್ಥಳಗಳನ್ನು ಆಯ್ಕೆ ಮಾಡಿಕೊಳ್ಳುವ ಟ್ರೆಂಡ್‌ ಚಾಲ್ತಿಯಲ್ಲಿದೆ. ವೆಡ್ಡಿಂಗ್‌ ಹಾಗೂ ಟ್ರಾವೆಲ್‌ ಇಂಡಸ್ಟ್ರಿ ಪಾತ್ರ ಇಲ್ಲಿ ವ್ಯಾಪಕವಾಗಿದ್ದು, ಇವೆರಡು ಇಂಡಸ್ಟ್ರಿಗಳು ಇನ್ನೊಂದು ಹೆಜ್ಜೆ ಮುಂದಿಟ್ಟಿದ್ದು, ಮದುವೆ ಮಾತುಕತೆಗೆ, ಪ್ರೇಮ ನಿವೇದನೆಗೆ ವೇದಿಕೆ ಒದಗಿಸಿ ಕೊಡುತ್ತಿವೆ.
ಪ್ರೀತಿಯನ್ನು ವ್ಯಕ್ತ ಪಡಿಸಲು ಖಂಡಿತವಾಗಲೂ ಒಂದು ಒಳ್ಳೆಯ ವಾತಾವರಣ ಬೇಕು. ಏಕಾಂತ ಪ್ರೀತಿಯ ಭಾವನೆಗಳನ್ನು ಅರಳಿಸುತ್ತವೆ. ಅಂತಹದ್ದೊಂದು ಸನ್ನಿವೇಶಕ್ಕೆ ಪ್ರಕೃತಿಯೂ ಪೂರಕವಾಗಿರಬಹುದು. ಈ ನಿಟ್ಟಿನಲ್ಲಿ ಈಗ ಪ್ರೇಮ ನಿವೇದನೆ ಕೂಡ ಸುಂದರ ಸ್ಥಳಗಳನ್ನು ಹುಡುಕಲಾರಂಭಿಸಿದೆ. ಇಲ್ಲಿ ಫೋಟೋಗ್ರಫಿ ಕೂಡ ಪ್ರಮುಖ ಪಾತ್ರ ವಹಿಸುತ್ತದೆ. ಪರಸ್ಪರ ವಿವಾಹಕ್ಕೆ ಒಪ್ಪಿದ್ದರೆ ನಿಶ್ಚಿತಾರ್ಥದ ಭಾಗವಾಗಿ ಪ್ರೇಮ ನಿವೇದನೆಯಂತಹ ಸನ್ನಿವೇಶಗಳನ್ನು ಸೆರೆ ಹಿಡಯಲಾಗುತ್ತದೆ. ಇಲ್ಲಿ ಹಿಡನ್‌ ಫೋಟೋಗ್ರಫಿಗೆ ಬೇಡಿಕೆ ಇದೆ ಎನ್ನುತ್ತಾರೆ ತಜ್ಞರು. ವಿವಾಹದ ಮಾತುಕತೆಯನ್ನು ಮನೆಯಲ್ಲೇ ಮುಗಿಸಲು ಹಲವರು ಇಷ್ಟ ಪಡುವುದಿಲ್ಲ. ಅದಕ್ಕಾಗಿ ಯಾವುದೋ ಒಂದು ಸ್ಥಳವನ್ನು ನಿಗದಿ ಮಾಡಬಹುದು. ಸಾಮಾನ್ಯವಾಗಿ ಅದ್ಧೂರಿ ಮದುವೆ ಮಾತುಕತೆ ನಿಗದಿತ ತಾಣಗಳಲ್ಲಿ ನಡೆಯುತ್ತವೆ. ಇದಕ್ಕೆ ವೆಡ್ಡಿಂಗ್‌ ಪ್ಲಾನರ್ಸ್‌ ಸಹಾಯ ಕೂಡ ಸಿಗುತ್ತದೆ. ಡೆಸ್ಟಿನೇಷನ್‌ ವೆಡ್ಡಿಂಗ್‌ನ ಭಾಗವಾಗಿಯೂ ಇದು ಗುರುತಿಸಿಕೊಳ್ಳುತ್ತದೆ.
ಯಶಸ್ವಿ ವಿವಾಹದ ಸೂತ್ರ: ಮುರಿದು ಬೀಳುತ್ತಿರುವ ವಿವಾಹವನ್ನು ಉಳಿಸಲು ಪೂರ್ವಭಾವಿಯಾಗಿ ಪರಸ್ಪರ ಸಂಗಾತಿಯಾಗಲು ಬಯಸುವ ಹಾಗೂ ಕುಟುಂಬಗಳ ನಡುವಿನ ಹೊಂದಾಣಿಕೆ, ಗುಣ, ಅವಗುಣಗಳನ್ನು ಅರಿಯಲು ಇಂತಹ ಪ್ರವಾಸಗಳು ನಡೆಯುತ್ತವೆ. ಡೆಸ್ಟಿನೇಷನ್‌ ಪ್ರಪೋಸಲ್‌ ಕಲ್ಪನೆಯಡಿ ಎರಡು ಕುಟುಂಬಗಳ ನಡುವಿನ ಸಾಮರಸ್ಯ ಪರೀಕ್ಷೆಗೆ ಒಳಗಾಗುತ್ತದೆ. ಅಂದರೆ ಇದು ವಿವಾಹವನ್ನು ಸುದೀರ್ಘ ಕಾಲ ಉಳಿಸುವ ಪ್ರಯತ್ನ. ಬಹುತೇಕ ಮದುವೆ ಸಂಬಂಧ ಒಪ್ಪಿಗೆ ಅಂದಾಗ ಇಂತಹ ಪ್ರವಾಸಗಳು ಏರ್ಪಡುತ್ತವೆ.