ಡೇಟಿಂಗ್‌ಗೂ ಬೇಕು ಉತ್ತಮ ಫಿಟ್ನೆಸ್‌

ಸಂಬಂಧವೊಂದು ಕೇವಲ ಭಾವನೆಗಳ ಮೇಲೆ ನಿಂತಿರುವುದಿಲ್ಲ. ಅಲ್ಲಿ ಸೌಂದರ‍್ಯ, ಆರೋಗ್ಯ ಎಲ್ಲವೂ ಪ್ರಮುಖ ಪಾತ್ರ ವಹಿಸುತ್ತದೆ. ಡೇಟಿಂಗ್‌ಗೂ ಉತ್ತಮ ಫಿಟ್ನೆಸ್‌ ಅಗತ್ಯ ಎನ್ನುವ ಯುವಜನತೆ ಇದೀಗ ಫಿಟ್ನೆಸ್‌ಗೆ ಹೆಚ್ಚಿನ ಪ್ರಾಮುಖ್ಯ ನೀಡುತ್ತಿದೆ. ಈ ನಿಟ್ಟಿನಲ್ಲಿ ಇತ್ತೀಚೆಗೆ ಫಿಟ್ನೆಸ್‌ ಡೇಟಿಂಗ್‌ ಖ್ಯಾತವಾಗುತ್ತಿದೆ.

ಫಿಟ್ನೆಸ್‌ ಬಗ್ಗೆ ಕ್ರೇಜ್‌ ಇರುವ ವ್ಯಕ್ತಿಗಳ ನಡುವೆ ಹುಟ್ಟುವ ಪ್ರೀತಿ ಇದು ಎನ್ನಲಾಗುತ್ತದೆ. ಜಿಮ್‌ನಲ್ಲಿ ಅರಳುವ ಪ್ರೀತಿಯನ್ನು ಆನ್‌ಲೈನ್‌ನಲ್ಲೇ ಹುಡುಕಿಕೊಳ್ಳಬಹುದು. ಇತ್ತೀಚೆಗೆ ಇದಕ್ಕಾಗಿಯೇ ಹಲವು ಡೇಟಿಂಗ್‌ ವೆಬ್‌ಸೈಟ್‌ಗಳು ಕಾರ‍್ಯ ನಿರ್ವಹಿಸುತ್ತಿವೆ. ಜಿಮ್‌ಗೆ ತೆರಳುವುದರಿಂದ ಫಿಟ್ನೆಸ್‌ ಪಡೆಯಬಹುದು. ಅಷ್ಟೇ ಅಲ್ಲ, ಸಂಗಾತಿಯನ್ನು ಕೂಡ ಪಡೆಯಬಹುದಂತೆ.

ಬೆವರಿಗೂ ಆಕರ್ಷಿಸುವ ಶಕ್ತಿ ಇದೆ. ಅಂಥದ್ದೊಂದು ಆಕರ್ಷಣೆಗೆ ಮೂಲ ವರ್ಕೌಟ್‌. ವ್ಯಾಯಾಮದ ನಂತರದ ಬೆವರು ಪರಸ್ಪರರನ್ನು ಆಕರ್ಷಿಸುತ್ತದೆ. ಇದೇ ಆಕರ್ಷಣೆ ಪ್ರೀತಿಯಿಂದ ವೈವಾಹಿಕ ಬದುಕಿನವರೆಗೂ ಹೋಗಿ ನಿಲ್ಲುತ್ತದೆ. ಒಟ್ಟಾರೆ ಫಿಟ್ನೆಸ್‌ ಡೇಟಿಂಗ್‌ ಸಂಗಾತಿಗಳನ್ನು ಜತೆಗೂಡಿಸುವ ಕೆಲಸ ಮಾಡುತ್ತದೆ.

ಫಿಟ್ನೆಸ್‌ ಡೇಟಿಂಗ್‌ ಸೂತ್ರ

ಸಮಾನ ಅಭಿರುಚಿ ಪರಸ್ಪರರ ನಡುವೆ ಆತ್ಮೀಯತೆಯನ್ನು ಹೆಚ್ಚಿಸುತ್ತದೆ. ಹೊಂದಾಣಿಕೆ ಮನೋಭಾವವನ್ನು ಮೂಡಿಸುತ್ತದೆ. ಹಾಗಾಗಿ ನಿಮಗೆ ಫಿಟ್ನೆಸ್‌ ಮೇಲೆ ಹೆಚ್ಚು ಆಸಕ್ತಿ ಇದ್ದರೆ ನಿಮ್ಮ ಥರ ಫಿಟ್ನೆಸ್‌ ಮೇಲೆ ಆಸಕ್ತಿ ಹಾಗೂ ಪ್ಯಾಷನ್‌ ಇರುವವರ ಜತೆ ಡೇಟಿಂಗ್‌ ಮಾಡಲು ಪ್ರಯತ್ನಿಸಿ. ಅಲ್ಲದೆ ಯಾವುದೇ ಸಂಬಂಧದಲ್ಲಿ ಭಿನ್ನ ಅಭಿಪ್ರಾಯಗಳು ಸಹಜ. ಆದರೆ ಅದರ ಸಮಾನ ಅಭಿರುಚಿ ಇಬ್ಬರನ್ನೂ ಒಂದುಗೂಡಿಸುತ್ತದೆ. ಇದರಿಂದಾಗಿ ನಿಮ್ಮ ಇಬ್ಬರು ಬಂಧ ಮತ್ತಷ್ಟು ಗಟ್ಟಿಯಾಗುತ್ತದೆ. ವರ್ಕ್‌ಔಟ್‌ ಮಾಡಿ ಫಿಟ್‌ ಆಗುವುದರಿಂದ ದೈಹಿಕ ಸದೃಢತೆಯಿಂದ ಆಕರ್ಷಕವಾಗಿ ಕಾಣುತ್ತೀರ. ಅಷ್ಟೇ ಅಲ್ಲ, ಸಂಬಂಧ ಹಾಗೂ ಆರೋಗ್ಯವನ್ನು ವೃದ್ಧಿಸುತ್ತದೆ.