ಸಂಬಂಧದಲ್ಲಿರುವ ಇಬ್ಬರು ವ್ಯಕ್ತಿಗಳ ಏಕತಾನತೆಗೆ ಬೇರೆ ಕಾರಣಗಳೂ ಇವೆ. ಅಂದರೆ, ಈ ವ್ಯಕ್ತಿ ತನಗಾಗಿ ಮೀಸಲಾಗಿರುವುದು ಖಚಿತವಾಗಿದ್ದು ಈ ಬಗ್ಗೆ ತಲೆ ಕೆಡಿಸಿಕೊಳ್ಳಬೇಕಾದ ಅಗತ್ಯ ಇಲ್ಲದಿರುವುದು, ಕೆಲಸದ ಒತ್ತಡ ಇತ್ಯಾದಿಗಳು ಕಾರಣಗಳಿರಬಹುದು. ಆದ್ದರಿಂದ, ಇತರ ಯಾವುದೇ ವ್ಯಕ್ತಿಗಳಂತೆ ದಂಪತಿಗಳು ಹಾಗೂ ಸಂಬಂಧದಲ್ಲಿ ಇರುವ ಜೋಡಿಗಳೂ ಆಗಾಗ ಅಲ್ಪ ವಿರಾಮವನ್ನು ಪಡೆದುಕೊಳ್ಳುವುದು ಅಗತ್ಯ ಎಂದು ತಜ್ಞರು ಅಭಿಪ್ರಾಯ ಪಡುತ್ತಾರೆ.
ಇಂದಿನ ಲೇಖನದಲ್ಲಿ, ಈ ವಿರಾಮವನ್ನು ಪಡೆದುಕೊಳ್ಳುವುದು ಹೇಗೆ ಎಂಬ ಪ್ರಶ್ನೆಗೆ ತಜ್ಞರು ನೀಡಿರುವ ಏಳು ಸಲಹೆಗಳನ್ನು ವಿವರಿಸಲಾಗಿದೆ, ಬನ್ನಿ ನೋಡೋಣ:
ಒಂದು ಅವಧಿಯನ್ನು ಗೊತ್ತು ಮಾಡಿಕೊಳ್ಳಿ
ದಂಪತಿಗಳೇ ಆಗಲಿ, ಸಂಬಂಧದಲ್ಲಿರುವ ಜೋಡಿಯೇ ಆಗಲಿ, ಪರಸ್ಪರ ಒಪ್ಪಿಗೆಯ ಮೂಲಕ ದೂರವನ್ನು ಪಡೆದುಕೊಳ್ಳಲು ಪ್ರಾರಂಭ ಮತ್ತು ಕೊನೆಯ ದಿನಾಂಕಗಳನ್ನು ನಿಗದಿಪಡಿಸಿಕೊಳ್ಳುವುದು ಅತಿ ಅಗತ್ಯ. ತಜ್ಞರ ಮತ್ತು ಮನೋಚಿಕಿತ್ಸಕರ ಅನುಭವದ ಪ್ರಕಾರ, ಈ ಅವಧಿ ಆರು ವಾರದ್ದಾಗಿರಬೇಕು. ಈ ಅವಧಿ ಎಲ್ಲವನ್ನೂ ಸರಿಪಡಿಸಿಕೊಳ್ಳಲು ಸಾಕಷ್ಟು ಸಮಯಾವಕಾಶ ನೀಡಲಿದೆ ಹಾಗೂ ಎಲ್ಲವೂ ನಿಚ್ಚಳವಾಗಲಿವೆ. ಈ ಅವಧಿಯಲ್ಲಿ, ಓರ್ವ ವ್ಯಕ್ತಿ ತನ್ನ ಸಂಗಾತಿಯ ಕೊರತೆಯನ್ನು ಸಮರ್ಥವಾಗಿ ನಿಭಾಯಿಸಬಲ್ಲ ಮನಃಸ್ಥಿತಿಯನ್ನು ಪಡೆಯುತ್ತಾನೆ / ಳೆ.
ಈ ವಿರಾಮ ಪ್ರತಿ ವ್ಯಕ್ತಿಗೂ ಭಿನ್ನವಾದ ಪ್ರತಿಕ್ರಿಯೆ ನೀಡುತ್ತದೆ ಎಂಬುದು ನೆನಪಿರಲಿ.
ಈ ವಿರಾಮದಲ್ಲಿ ದಿನಗಳು ಮತ್ತು ಜೀವನ ಹೇಗಿರಬಹುದು ಎಂಬುದನ್ನು ನೀವು ಊಹಿಸಿಕೊಂಡಿದ್ದರೆ, ವಾಸ್ತವ ನೀಡುವ ಅಚ್ಚರಿಯ ಬಗ್ಗೆ ಸಿದ್ಧರಾಗಿರಿ. ಏಕೆಂದರೆ, ಈ ದಿನಗಳು ನೀವು ಅಂದುಕೊಂಡಿದ್ದುಕ್ಕಿಂತಲೂ ಭಿನ್ನವಾಗಿ ಕಳೆಯಲಿವೆ ಹಾಗೂ ಪರಿಸ್ಥಿತಿಗಳು ನೀವು ಅಂದುಕೊಂಡಂತೇನೂ ಆಗುವುದಿಲ್ಲ. ವಿಶೇಷವಾಗಿ ವಾರಾಂತ್ಯಗಳಲ್ಲಿ, ಸಾಮಾನ್ಯವಾಗಿ ಇಬ್ಬರೂ ಜೊತೆಗೇ ಕಾಲ ಕಳೆಯುತ್ತಿದ್ದು ಈಗ ಜೊತೆ ಇಲ್ಲದಿದ್ದಾಗ ಕೊರತೆ ಸ್ಪಷ್ಟವಾಗಿ ಕಾಣುತ್ತದೆ. ಈ ಸಮಯವನ್ನು ನೀವು ಹೇಗೆ ಕಳೆಯಲಿದ್ದೀರಿ ಎಂಬುದೇ ಈ ಅಚ್ಚರಿಗೆ ಮುಖ್ಯ ಕಾರಣವಾಗಲಿದೆ ಹಾಗೂ ಸಂಬಂಧಕ್ಕೆ ಅಗತ್ಯವಿರುವ ಅಂತರವನ್ನು ನೀಡಲು ಸಾಧ್ಯವಾಗುತ್ತದೆ.
ಮದುವೆಯ ಬಗ್ಗೆ ಕೇಳಿಬರುವ ಕೆಲವು ಸುಳ್ಳುಗಳು ಇಲ್ಲಿವೆ ನೋಡಿ
ಕೆಲವು ಗಡಿಗಳನ್ನು ನೀವೇ ಹೇರಿಕೊಳ್ಳಿ
ಅಂತರ ಕಾಯ್ದುಕೊಳ್ಳಲು ದಿನಾಂಕಗಳ ಮಿತಿಗಳನ್ನು ಹೇರಿರುವಂತೆಯೇ ಇತರ ವಿಷಯಗಳ ಬಗ್ಗೆಯೂ ಕೆಲವು ಗಡಿಗಳನ್ನು ನೀವೇ ರೂಪಿಸಿಕೊಳ್ಳಬೇಕು. ಇದರಿಂದ ತಪ್ಪು ಕಲ್ಪನೆ ಹಾಗೂ ವಾದಗಳಿಗೆ ಒಳಗಾಗುವ ಸಾಧ್ಯತೆಯನ್ನು ತಪ್ಪಿಸಬಹುದು. ವಿಶೇಷವಾಗಿ, ಇಬ್ಬರೂ ಮನೋತಜ್ಞರ ಸಲಹೆಯನ್ನು ಪಡೆಯುತ್ತಿದ್ದಾಗ ಈ ಅವಧಿಯಲ್ಲಿ ಇಬ್ಬರು ಇನ್ನೊಬ್ಬರಿಗೆ ತಿಳಿಸಿಯೇ ವೈದ್ಯರ ಭೇಟಿಯನ್ನು ಮಾಡುವುದು ಅಥವಾ ವೈದ್ಯರ ಸಲಹೆಯಂತೆ ಜೊತೆಯಾಗಿ ಬರುವುದು ಅಥವಾ ಈ ಅವಧಿಯಲ್ಲಿ ಇಬ್ಬರೂ ಪರಸ್ಪರ ಕಾಣದೇ ಇರುವುದು ಇವೆಲ್ಲವೂ ನಿಮ್ಮಿಬ್ಬರ ಪರಸ್ಪರ ಒಪ್ಪಿಗೆಗೆ ಬಿಟ್ಟ ವಿಷಯ. ಉಳಿದಂತೆ, ಇಬ್ಬರಿಗೂ ಸಮಾನವಾಗಿ ಅನ್ವಯವಾಗುವ ತುರ್ತು ವಿಷಯಗಳ ಹೊರತಾಗಿ (ಉದಾಹರಣೆಗೆ ಇಬ್ಬರಲ್ಲೊಬ್ಬರ ಪೋಷಕರ ಅಸ್ವಸ್ಥತೆ, ಆಸ್ಪತ್ರೆಗೆ ಹೋಗಬೇಕಾಗಿ ಬರುವುದು ಇತ್ಯಾದಿ) ಬೇರೆ ಯಾವುದೇ ವಿಷಯದ ಬಗ್ಗೆ ಗಡಿಗಳನ್ನು ಹೇರಿಕೊಂಡು ಈ ಅವಧಿಯಲ್ಲಿ ಎಂದಿಗೂ ಮೀರದಂತೆ ನೋಡಿಕೊಳ್ಳಿ.
ಈ ಅವಧಿಯಲ್ಲಿ ಇಬ್ಬರೂ ಪರಸ್ಪರರಿಗೆ ಅನುರೂಪರೋ ಎಂದು ನೋಡಿಕೊಳ್ಳಿ
ಇಬ್ಬರೂ ಪರಸ್ಪರ ಬೇರ್ಪಟ್ಟ ಅವಧಿಯಲ್ಲಿ ಏನೆಲ್ಲಾ ಮಾಡಿದಿರಿ ಎಂದು ಇಬ್ಬರೂ ಪರಸ್ಪರರೊಂದಿಗೆ ವಿಚಾರಿಸಿಕೊಳ್ಳುವಿರೋ? ಈ ಅವಧಿಯಲ್ಲಿ ನೀವು ಬೇರೆ ವ್ಯಕ್ತಿಗಳನ್ನು ಭೇಟಿಯಾಗಲಿದ್ದೀರೋ? ಈ ಪ್ರಶ್ನೆಗಳಿಗೆ ನೀವು ಉತ್ತರವನ್ನು ಈ ಅವಧಿಗೂ ಮುಂಚೆಯೇ ಕೇಳಿಕೊಳ್ಳಬೇಕು. ಏಕೆಂದರೆ, ಕೇವಲ ಪರಸ್ಪರರಿಗೆ ಅನುರೂಪರಾದ ವ್ಯಕ್ತಿಗಳು ಮಾತ್ರವೇ ಈ ಪರಿಯ ವಿಚಾರ ವಿಮರ್ಶೆಯನ್ನು ಮಾಡಿಕೊಳ್ಳುತ್ತಾರೆ ಹಾಗೂ ವಿಶ್ವಾಸಕ್ಕೆ ಸಂಬಂಧಿಸಿದ ಇಂತಹ ಸೂಕ್ಷ್ಮ ವಿಷಯಗಳು ಅವಧಿ ಮುಗಿದ ಬಳಿಕ ಕಲಹಕ್ಕೆ ಕಾರಣವಾಗಬಹುದು.
ಈ ಬೇರ್ಪಡುವಿಕೆಯನ್ನು ನೀವು ಗುಟ್ಟಾಗಿ ಇರಿಸಿಕೊಳ್ಳುತ್ತೀರೋ ಇಲ್ಲವೋ ನಿರ್ಧರಿಸಿ
ಪರಸ್ಪರ ಬೇರ್ಪಡುವಿಕೆಯ ಬಗ್ಗೆ ನೀವು ನಿಮ್ಮ ಕುಟುಂಬವರ್ಗ, ಸ್ನೇಹಿತರು ಹಾಗೂ ಸಹೋದ್ಯೋಗಿಗಳಲ್ಲಿ ಮತ್ತು ವಿಶೇಷವಾಗಿ, ದಂಪತಿಗಳಿಗೆ ಮಕ್ಕಳಿದ್ದರೆ ಮಕ್ಕಳಲ್ಲಿ ಹೇಳಬೇಕೋ ಬೇಡವೋ ಎಂಬುದನ್ನು ನೀವೇ ನಿರ್ಧರಿಸಿ. ತಜ್ಞರ ಪ್ರಕಾರ, ನೀವಿದನ್ನು ಗುಟ್ಟಾಗಿ ಇರಿಸುವುದೇ ಕ್ಷೇಮ. ಇದಕ್ಕಾಗಿ ಇಬ್ಬರಿಗೂ ಒಪ್ಪುವಂತಹ ಒಂದು ನೆಪವನ್ನು ಅಥವಾ ಸಂದರ್ಭವನ್ನು ಆಯ್ದುಕೊಳ್ಳಿ. ಇತರ ಯಾರಿಂದಲೂ ಪ್ರಶ್ನೆಗಳು ಉದ್ಭವವಾದರೆ ಇಬ್ಬರಿಂದಲೂ ಏಕಸಮಾನವಾದ ಉತ್ತರ ಬರಬೇಕು ಅಷ್ಟೇ.
ಜನರು ಕನ್ಯತ್ವದ ಬಗ್ಗೆ ತಪ್ಪಾಗಿ ಅರ್ಥೈಸಿಕೊಳ್ಳುವ ವಿಷಯಗಳಿವು
ಈ ಅವಧಿಯಲ್ಲಿ ನೀವಿಬ್ಬರೂ ಏನಾದರೊಂದನ್ನು ಸಾಧಿಸಿ
ನಿಮ್ಮ ಮನದಲ್ಲಿ ಏನಾದರೊಂದನ್ನು ಮಾಡುವ ಆಸೆಯಿದ್ದು ಕುಟುಂಬದ ಅಥವಾ ಸಂಬಂಧದ ಜವಾಬ್ದಾರಿಗಳು ಇದಕ್ಕೆ ಅಡ್ಡಿಯಾಗಿದ್ದರೆ ಈ ಅವಕಾಶವನ್ನು ಅದಕ್ಕಾಗಿ ಬಳಸಿಕೊಳ್ಳಿ. ಚಿತ್ರಕಲೆ, ಕವನ, ಕ್ರೀಡೆ, ಪ್ರವಾಸ, ಒಟ್ಟಾರೆ ನಿಮಗೆ ಇಷ್ಟವಾಗಿರುವ ಯಾವುದೇ ವಿಷಯವಿರಲಿ, ಈ ಅವಧಿಯನ್ನು ಸಂಪೂರ್ಣವಾಗಿ ಬಳಸಿಕೊಳ್ಳಿ.
ನಿಮ್ಮ ನಿರೀಕ್ಷೆಗಳನ್ನು ಮರು ಪರಾಮರ್ಶಿಸಿಕೊಳ್ಳಿ
ಪ್ರತಿ ವ್ಯಕ್ತಿಯೂ ತನ್ನ ಸಂಗಾತಿ / ಪತಿ / ಪತ್ನಿ / ಮಕ್ಕಳು / ಹಿರಿಯರು / ಸಹೋದ್ಯೋಗಿಗಳು / ಸ್ನೇಹಿತರು ಮತ್ತು ಸಮಾಜದಿಂದ ಬಹಳಷ್ಟನ್ನು ನಿರೀಕ್ಷಿಸುತ್ತಾರೆ. ಇದು ಸಹಜವೂ ಹೌದು. ಆದರೆ ವಿಶೇಷವಾಗಿ ಸಂಗಾತಿಯಿಂದ ಪಡೆಯಬಹುದಾದ ನಿರೀಕ್ಷೆಗಳು ಅಪಾರವಾಗಿರುತ್ತವೆ ಹಾಗೂ ಇವುಗಳಲ್ಲಿ ಹಲವು ಅಸಾಧ್ಯವೂ ಆಗಿರಬಹುದು. ಎಲ್ಲರಿಗೂ ಕನಸಿನ ರಾಜಕುಮಾರ / ರಾಜಕುಮಾರಿ ಸಿಗಲು ಸಾಧ್ಯವಿಲ್ಲ. ಸಿಕ್ಕ ಸಂಗಾತಿಯಲ್ಲೇ ಕನಸಿನ ರಾಜಕುಮಾರ / ರಾಜಕುಮಾರಿಯನ್ನು ಕಾಣುವುದು ಜಾಣತನ. ಈ ಜಗತ್ತಿನ ಪ್ರತಿ ವ್ಯಕ್ತಿಗೂ ತನ್ನದೇ ಆದ ಮಿತಿಗಳಿದ್ದು ನಿಮ್ಮ ನಿರೀಕ್ಷೆಗಳು ಆ ವ್ಯಕ್ತಿಯ ಸಾಮರ್ಥ್ಯದ ಮಿತಿಯೊಳಗೇ ಇವೆ ಎಂಬುದನ್ನು ಖಚಿತಪಡಿಸಿಕೊಳ್ಳಿ.
ವಿಶೇಷವಾಗಿ, ಹಿಂದಿನ ಸಂಬಂಧದಿಂದ ಹೊರಬಂದು ಈಗ ಹೊಸ ಸಂಬಂಧ ಬೆಳೆಸಲು ಯತ್ನಿಸುತ್ತಿರುವ ವ್ಯಕ್ತಿಗಳು ಹಿಂದಿನ ಸಂಗಾತಿಂದ ಲಭಿಸಿದ್ದ ವಿಷಯಗಳನ್ನು ನಿರೀಕ್ಷಿಸಬಾರದು. ನಿಮ್ಮ ನಿರೀಕ್ಷೆಗಳನ್ನು ಮರು ಪರಾಮರ್ಶಿಸಿಕೊಳ್ಳಲು ಈ ಅವಧಿ ಅತ್ಯಂತ ಸೂಕ್ತವಾಗಿದ್ದು ವಾಸ್ತವಿಕ ಅಂಶಗಳಿಗೆ ಅನುಸಾರವಾಗಿ ಇವನ್ನು ಬದಲಿಸಿಕೊಳ್ಳಿ. (ಉದಾಹರಣೆಗೆ ನಿಮಗೆ ದೊಡ್ಡ ಫ್ರಿಜ್ಜು ಬೇಕೆಂದಿದ್ದು ನಿಮ್ಮ ಸಂಗಾತಿಯ ಸಾಮರ್ಥ್ಯಕ್ಕೆ ಮೀರಿದ್ದರೆ ಕೊಂಚ ಚಿಕ್ಕ ಫ್ರಿಜ್ಜು ಕೊಳ್ಳುವತ್ತ ಚಿಂತನೆ ನಡೆಸಿ).
To Read in English Click: 7 guidelines to take a break from your relationship