ನಗುವಿನಲ್ಲಿದೆ ಖುಷಿಯ ಗುಟ್ಟು

ರೊಮ್ಯಾಂಟಿಕ್‌ ಸಂಬಂಧವೊಂದರ ಖುಷಿಯ ಗುಟ್ಟು ಇರುವುದು ಎಲ್ಲಿ ಗೊತ್ತಾ? ಪರಸ್ಪರ ತಮಾಷೆಯ ಮಾತು, ನಗುವಿನಲ್ಲಿ ಎಂದಿದೆ ಅಧ್ಯಯನ. ದಾಂಪತ್ಯ ಬಂಧವನ್ನು ಗಟ್ಟಿಗೊಳಿಸುವ ಶಕ್ತಿ ನಗುವಿಗೆ ಇದೆಯಂತೆ. ಅಲ್ಲದೆ ಪರಸ್ಪರ ಗೌರವದಿಂದ ತುಂಬಿದ ಸಂಬಂಧದ ತೃಪ್ತಿ ಕೂಡ ಇಲ್ಲಿ ಕಾಣಿಸುತ್ತದೆ ಎಂದು ಹೇಳಲಾಗಿದೆ.

ಮಗುವಿನತ್ತ ಇರಲಿ ಗಮನ

ನೀವು ಹೆಚ್ಚು ಸಮಯವನ್ನು ಸ್ಮಾರ್ಟ್‌ಫೋನ್‌, ಟಿವಿ ನೋಡುವುದರಲ್ಲಿ ಕಳೆಯುತ್ತೀರ? ಹಾಗಾದರೆ ಅದು ನಿಮ್ಮ ಮಗುವಿನ ವ್ಯಕ್ತಿತ್ವದ ಮೇಲೆ ಪ್ರಭಾವ ಬೀರಬಹುದು. ಪುಟ್ಟ ಮಗುವನ್ನು ನಿರ್ಲಕ್ಷಿಸಿ ನೀವು ನಿಮ್ಮದೇ ಲೋಕದಲ್ಲಿ ವಿಹರಿಸುತ್ತಿದ್ದರೆ ಮಗುವಿನಲ್ಲಿ ತನ್ನನ್ನು ಗಮನಿಸುತ್ತಿಲ್ಲ ಎಂಬ ಭಾವ ಕಾಡಬಹುದು. ಅದಲ್ಲದೇ ಇದೇ ಕಾರಣಕ್ಕೆ ಮಗು ಗಮನ ಸೆಳೆಯಲು ನಾನಾ ತಂತ್ರ ಮಾಡಬಹುದು. ಆದ್ದರಿಂದ ಮಗುವಿನೊಂದಿಗೆ ಹೆಚ್ಚು ಸಮಯ ಕಳೆಯಬೇಕು. ಮಗುವಿನ ಆಟ, ಪಾಠದಲ್ಲಿ ನಿಮ್ಮ ಪಾಲ್ಗೊಳ್ಳುವಿಕೆ ಮುಖ್ಯ.

ಯುವ ಜೋಡಿಗಳೇನು ಬಯಸುತ್ತಾರೆ?

ಯುವ ಜೋಡಿಗಳು ತಮ್ಮ ಸಂಬಂಧದಲ್ಲಿ ಏನನ್ನು ಬಯಸುತ್ತಾರೆ ಗೊತ್ತಾ? ಪರಸ್ಪರ ಗೌರವ, ನಿಷ್ಠೆ ಜತೆ ಸ್ವತಂತ್ರತೆ. ಈ ಮೂರು ಅಂಶಗಳು ಸಂಬಂಧದಲ್ಲಿ ಇರಲೇಬೇಕು ಎಂದು ಬಯಸುತ್ತಾರಂತೆ. ಆನ್‌ಲೈನ್‌ ಡೇಟಿಂಗ್‌ ವೆಬ್‌ಸೈಟ್‌ವೊಂದರ ಅಧ್ಯಯನವೊಂದರ ಪ್ರಕಾರ, ಮಹಿಳೆಯರು ತಮ್ಮನ್ನು ಗೌರವಿಸುವ ಸಂಗಾತಿಗೆ ಹೆಚ್ಚಿನ ಪ್ರಾಮುಖ್ಯ ನೀಡುತ್ತಾರೆ. ಅದೇ ರೀತಿ ಪುರುಷರು ತಮ್ಮ ಸಂಗಾತಿಯಲ್ಲಿ ಹುಡುಕುವ ಪ್ರಮುಖ ಗುಣವೆಂದರೆ ನಿಷ್ಠೆ. ಅಷ್ಟೆ ಅಲ್ಲ, ಮಹಿಳೆಯರು ಸ್ವಾತಂತ್ರ್ಯವನ್ನು ಹೆಚ್ಚು ಬಯಸುತ್ತಾರಂತೆ.