ದಾಂಪತ್ಯದಲ್ಲಿ ವಿವಾಹೇತರ ಸಂಬಂಧದ ಸುಳಿವು ಸಿಕ್ಕರೆ ಏನು ಮಾಡಬೇಕು?

ವಿವಾಹೇತರ ಸಂಬಂಧ ದಾಂಪತ್ಯವನ್ನು ವಿಪರೀತ ಅನ್ನುವಷ್ಟು ಡಿಸ್ಟರ್ಬ್‌ ಮಾಡುತ್ತದೆ. ಆದರೆ ಇಂತಹದ್ದೊಂದು ಸಂಬಂಧದ ಸರಿ ತಪ್ಪುಗಳನ್ನು ಹೊರತುಪಡಿಸಿಯೂ ನಿಮ್ಮಿಂದ ದೂರವಾಗಿ ಇನ್ನೊಂದು ಸಾಂಗತ್ಯಕ್ಕೆ ಹಾತೊರೆಯುವ ನಿಮ್ಮ ಸಂಗಾತಿಯ ಮನಸ್ಥಿತಿ ಅರಿಯುವುದರ ಜತೆ ಸಂಬಂಧ ಉಳಿಸಿಕೊಳ್ಳುವ ಮಾರ್ಗ ಹುಡುಕಿ.

ಸಂಗಾತಿಗೆ ಸಮಯ ಕೊಡಿ
ನೀವು ಎಷ್ಟೇ ಬಿಜಿಯಾಗಿದ್ದರೂ ನಿಮ್ಮ ಸಂಗಾತಿಗಾಗಿ ಸ್ಪಲ್ಪ ಸಮಯ ಮೀಸಲಿಡಿ. ಅವರೊಂದಿಗೆ ಸಿನಿಮಾ, ಹೋಟೆಲ್‌ಗಳಿಗೆ ಹೋಗಿ ಜತೆಯಲ್ಲಿ ಕಾಲ ಕಳೆಯಿರಿ. ಸಂಗಾತಿಯ ಬರ್ತ್‌ಡೇ, ನೀವು ಮೊದಲ ಭೇಟಿಯಾದ ದಿನ, ಮದುವೆಯಾದ ದಿನ ಹೀಗೆ ಕೆಲವು ನೆಪ ಮಾಡಿಕೊಂಡು ಒಬ್ಬರನ್ನೊಬ್ಬರು ಖುಷಿಪಡಿಸಿ. ಸಾಧ್ಯವಾದಲ್ಲಿ ಗಿಫ್ಟ್‌ಗಳನ್ನು ಕೊಡಿ. ಸಂಗಾತಿಯ ಇಷ್ಟ ಕಷ್ಟ, ಆಸಕ್ತಿಗಳನ್ನು ಅರ್ಥ ಮಾಡಿಕೊಂಡು ಜೀವನ ಸಾಗಿಸಿ.

ಹೊಂದಾಣಿಕೆ ಇರಲಿ
ದಾಂಪತ್ಯದ ಖುಷಿ ಅಡಗಿರುವುದೇ ಹೊಂದಾಣಿಕೆಯಲ್ಲಿ. ಸಣ್ಣ ಪುಟ್ಟ ವಿಷಯಗಳನ್ನು ದೊಡ್ಡದಾಗಿಸಿ ಜಗಳ ಮಾಡಬೇಡಿ. ಅನಗತ್ಯ ತಪ್ಪು ಕಲ್ಪನೆ, ಅಸಮಾಧಾನ ನಿಮ್ಮ ನಡುವೆ ಇಣುಕುವುದು ಬೇಡ. ಒಬ್ಬರನ್ನೊಬ್ಬರು ಅರ್ಥ ಮಾಡಿಕೊಂಡು ಜೀವನ ಸಾಗಿಸಿ. ತಪ್ಪುಗಳನ್ನು ಮಾಡಿದಾಗ ಅದನ್ನು ಗಮನಕ್ಕೆ ತನ್ನಿ. ನೀವು ಆದಷ್ಟು ಮೌನವಾಗಿದ್ದಲ್ಲಿ ಅವರೇ ತಿದ್ದುಕೊಳ್ಳುತ್ತಾರೆ.

ನಿಮ್ಮ ಬುದ್ಧಿವಂತಿಕೆ ಮುಖ್ಯ
ನಿಮ್ಮ ವೈವಾಹಿಕ ಜೀವನದಲ್ಲಿ ಎಲ್ಲೊ ಬಿರುಕು ಬಿಡುತ್ತದೆ ಎಂದು ಸ್ಪಲ್ಪ ಮನಸ್ಸಿಗೆ ಎನಿಸಿದರೂ ನೀವು ಜಾಗರೂಕರಾಗಬೇಕು. ಒಬ್ಬರಿಗೊಬ್ಬರು ಕೂಗಾಡುವುದು ತರವಲ್ಲ. ಇಂತಹ ಸಮಯದಲ್ಲಿ ಸಂಗಾತಿಯನ್ನು ಹೇಗೆ ಹಿಡಿದಿಟ್ಟುಕೊಳ್ಳಬಹುದು ಎಂದು ಯೋಚಿಸಿ. ಅವರಿಗಿಷ್ಟವಾದ ರೀತಿಯಲ್ಲಿ ನಡೆದುಕೊಳ್ಳಲು ಪ್ರಯತ್ನ ಪಡಿ. ನೀವು ಎಷ್ಟೇ ಮಾಡರ್ನ್‌ ಆಗಿದ್ದರೂ ನಿಮ್ಮ ಸಂಗಾತಿಗೆ ಯಾವ ರೀತಿ ಇಷ್ಟವೋ ಹಾಗೆ ಇರಲು ಪ್ರಯತ್ನ ಮಾಡಿ. ಇಂತಹ ಸಂದರ್ಭದಲ್ಲಿ ನಿಮ್ಮ ವೇಷ ಭೂಷಣಕ್ಕಿಂತ ನಿಮ್ಮ ಬುದ್ಧಿವಂತಿಕೆಗೆ ಹೆಚ್ಚು ಕೆಲಸ ಕೊಡಿ. ಸಂಗಾತಿಯ ಮನಸ್ಸು ಬೇರೆಡೆ ಜಾರದಂತೆ ಜಾಗರೂಕತೆ ವಹಿಸಿ.

ಅಪ್‌ಡೇಟ್‌ ಆಗಿ
ನಿಮ್ಮ ಸಂಗಾತಿ ನಿಮ್ಮಿಂದ ಏನನ್ನು ಬಯಸುತ್ತಾರೆ, ಅವರಿಗೇನು ಇಷ್ಟ ಎಂಬುದನ್ನು ತಿಳಿದುಕೊಳ್ಳಿ. ಬದಲಾದ ಜೀವನಶೈಲಿಗೆ ತಕ್ಕಂತೆ ನೀವು ಅಪ್‌ಡೆಟ್‌ ಆಗಿ. ಸಾಮಾನ್ಯಜ್ಞಾನದಿಂದ ಹಿಡಿದು ಡ್ರೆಸ್‌ ಸೆನ್ಸ್‌ವರೆಗೂ ಮುಖ್ಯ. ನೀವು ಹಿಂದೆ ಉಳಿದಷ್ಟು ಅವರು ಇನ್ನೊಬ್ಬರತ್ತ ಆಕರ್ಷಣೆಗೆ ಒಳಗಾಗುವ ಸಾಧ್ಯತೆ ಇದೆ.

ಆರೋಗ್ಯಕರ ಅನುಮಾನವಿರಲಿ
ಸಂಬಂಧದಲ್ಲಿ ಅನುಮಾನ ಮೂಡಲೇಬಾರದು ಅಂತೇನೂ ಇಲ್ಲ. ನಿಮ್ಮ ಅನುಮಾನ ಆರೋಗ್ಯಕರವಾಗಿರಲಿ. ಸಂಗಾತಿಯ ನಡತೆ ಬಗ್ಗೆ ಗಮನ ಇರಲಿ. ಏಕೆಂದರೆ ಕೆಲವೊಮ್ಮೆ ನಿಮ್ಮ ಅಮಾಯಕತೆಯೇ ದುರುಪಯೋಗಕ್ಕೆ ಒಳಗಾಗಬಹುದು.

ಸಂಬಂಧ ಹಳಸಲು ಬಿಡಬೇಡಿ
ಮದುವೆಯಾಗಿ ಸ್ವಲ್ಪ ಸಮಯ ಕಳೆದ ಮೇಲೆ ಒಬ್ಬರಿಗೊಬ್ಬರು ಆಸಕ್ತಿ ಕಳೆದುಕೊಳ್ಳುವುದು ಸಾಮಾನ್ಯ. ಆದರೆ ಹಾಗೆ ಹಾಗದಂತೆ ಎಚ್ಚರ ವಹಿಸಿ. ಒಬ್ಬರಿಗೊಬ್ಬರು ಇಷ್ಟವಾಗುವಂತೆ ನಡೆದುಕೊಳ್ಳಿ. ಅವರಿಗಿಷ್ಟವಾದ ಅಡುಗೆ ಮಾಡಿ ಬಡಿಸಿ. ಅವರ ಆಸಕ್ತಿಗಳನ್ನು ಪೂರೈಸಿ. ಲೈಂಗಿಕ ಬದುಕು ಹಸನಾಗಿರುವಂತೆ ನೋಡಿಕೊಳ್ಳಿ.

ಕ್ಷಮಾ ಗುಣ ಬೆಳೆಸಿಕೊಳ್ಳಿ
ಸಂಬಂಧದಲ್ಲಿ ಒಮ್ಮೊಮ್ಮೆ ತಪ್ಪುಗಳು ನಡೆಯುತ್ತವೆ. ತಪ್ಪು ಮಾಡಿದಾಗ ಅವರನ್ನು ಹೀಯಾಳಿಸಿ, ದೂರವಿರುಡುವುದು ತಪ್ಪು. ಕ್ಷಮಿಸುವುದನ್ನು ಮರೆಯಬೇಡಿ. ಆದರೂ ಸಂಸಾರ ಹಳಿ ತಪ್ಪುತ್ತಿರುವಾಗ ಸ್ವಲ್ಪ ಗಮನಹರಿಸಿ. ಹೆಚ್ಚು ಪ್ರೀತಿ ತೋರಿಸಿ. ಈ ಸಂದರ್ಭದಲ್ಲಿ ಒಬ್ಬರಿಗೊಬ್ಬರು ದೂರುವುದರ ಬದಲು, ಇಬ್ಬರೂ ತಮ್ಮ ಕೊರತೆ, ಅಸಮಾಧಾನದ ಬಗ್ಗೆ ಮುಕ್ತವಾಗಿ ಮಾತನಾಡಿ.