ಸುದೀರ್ಘ ಸಂಬಂಧದೊಳಗೆ ಇಡಬೇಕಾದ ಹೆಜ್ಜೆಗಳು

ಸುದೀರ್ಘ ಸಂಬಂಧದೊಳಗೆ ಇಡಬೇಕಾದ ಹೆಜ್ಜೆಗಳು

ಕೆಲವು ಸಂಬಂಧಗಳು ಹೀಗೆ ಬಂದು ಹಾಗೆ ಹೋಗುತ್ತವೆ. ಪದೇಪದೆ ಪ್ರೇಮ ವೈಫಲ್ಯ ಹಲವರ ಆತ್ಮವಿಶ್ವಾಸವನ್ನೇ ಕಿತ್ತುಕೊಳ್ಳಬಹುದು. ಸಂಬಂಧವೊಂದು ಹುಟ್ಟುವುದು ದೊಡ್ಡದಲ್ಲ. ಆದರೆ ಅದನ್ನು ದೀರ್ಘಕಾಲ ಖುಷಿಯಾಗಿ ಉಳಿಸಿಕೊಳ್ಳುವುದು ಸವಾಲಿನದ್ದು. ಏಕೆಂದರೆ ಕೆಲವು ಸಂಬಂಧ ಇದ್ದೂ ಇಲ್ಲದಂತೆ ಸೊರಗುತ್ತವೆ. ಅತೃಪ್ತಿ, ಅವಿಶ್ವಾಸ, ಅನುಮಾನಗಳಿಂದ ಕೂಡಿಕೊಂಡು ಉಸಿರುಗಟ್ಟಿಸುವ ವಾತಾವರಣ ಸೃಷ್ಟಿಸುತ್ತದೆ. ಆದ್ದರಿಂದ ಸಂಬಂಧವೊಂದು ಸುದೀರ್ಘ ಕಾಲ ಖುಷಿಯಾಗಿ ಇರಬೇಕು ಎಂದರೆ ಏನೆಲ್ಲಮಾಡಬೇಕು ಗೊತ್ತಾ?

ಸಂಬಂಧವೊಂದಕ್ಕೆ ಕಮೀಟ್‌ ಆಗುವ ಮುಂಚೆ ನಿಮ್ಮ ಅಗತ್ಯ, ಅನಿವಾರ‍್ಯಗಳ ಸ್ಪಷ್ಟ ಕಲ್ಪನೆ ಇರಲಿ. ಅದೇ ರೀತಿ ನಿಮ್ಮ ಸಂಗಾತಿಯಾಗುವವರು ನಿಮ್ಮಿಂದ ಏನನ್ನು ಬಯಸುತ್ತಿದ್ದಾರೆ ಎಂಬುದನ್ನು ತಿಳಿಯಿರಿ. ದೀರ್ಘಾವಧಿಯ ಸಂಬಂಧದೊಳಗೆ ಪ್ರವೇಶಿಸುವ ಮೊದಲ ಹೆಜ್ಜೆ ಇದು.

ನಿಮ್ಮ ಸಂಬಂಧದ ಆರೋಗ್ಯ ಕೆಡಬಾರದು ಎಂದರೆ ಹಲವು ಅನಗತ್ಯ ಸಂಗತಿಗಳು ನಿಮ್ಮ ಸಂಬಂಧದೊಳಗೆ ನುಸುಳಬಾರದು. ಅಂತಹ ಸಂಗತಿಗಳನ್ನು ಸಾಧ್ಯವಾದಷ್ಟು ದೂರವಿಡಿ. ಅವುಗಳೆಂದರೆ ಅನುಮಾನ, ಮೋಸ, ಸುಳ್ಳು ಪ್ರಮುಖವಾದದ್ದು.

ಸಂಬಂಧದಲ್ಲಿಕಲ್ಪನೆಗಳು, ಕನಸುಗಳು ರಾಶಿಗಟ್ಟಲೆ ಇರುತ್ತವೆ. ಆದರೆ ಅವುಗಳೇ ನಿಮ್ಮ ಇಡೀ ಸಂಬಂಧಕ್ಕೆ ಮಾರಕವಾಗಬಹುದು. ಆದ್ದರಿಂದ ವಾಸ್ತವದ ನೆಲೆಯಲ್ಲಿಇಡೀ ಸಂಬಂಧವನ್ನು ನೋಡುವ ಮನೋಭಾವ ಇಬ್ಬರಿಗೂ ಇರಲಿ.

ಯಾರೋ ದಂಪತಿಯನ್ನು ನೋಡಿ ಅವರಂತೆ ನಾವಿಲ್ಲ, ನಮ್ಮಲ್ಲೇನೊ ಕೊರತೆ ಇದೆ ಎಂದು ತಮ್ಮಷ್ಟಕ್ಕೆ ತಾವು ಕೊರಗುವುದು ಇಡೀ ಸಂಬಂಧದ ನೆಮ್ಮದಿ ಕೆಡಿಸುತ್ತದೆ. ಅತೃಪ್ತಿ ಕಾಡುವಂತೆ ಮಾಡುತ್ತದೆ. ಸಾಮಾಜಿಕ ತಾಣಗಳಲ್ಲಿಇಣುಕುವ ರೊಮ್ಯಾಂಟಿಕ್‌ ಫೋಟೋಗಳು ಯಥೇಚ್ಛವಾಗಿ ಸಂಬಂಧದ ಗಟ್ಟಿತನವನ್ನು ಪ್ರಶ್ನಿಸಿಕೊಳ್ಳುವಂತೆ ಮಾಡುತ್ತವೆ. ಅವರಷ್ಟು ಪ್ರವಾಸ ಮಾಡುವುದಿಲ್ಲಎಂದೋ, ಅವರಷ್ಟು ಸರಸ ನಮ್ಮ ನಡುವೆ ಇಲ್ಲಎಂಬೆಲ್ಲಭಾವನೆಗಳು ಬಂದು ಹೋಗುತ್ತವೆ. ಆದರೆ ಕಲ್ಪನೆಯಿಂದ ಹೊರ ಬರುವುದು ಒಳಿತು. ಏಕೆಂದರೆ ರೊಮ್ಯಾಂಟಿಕ್‌ ಫೋಟೋದಲ್ಲಿಎದುರಾದವರ ನೈಜ ಜೀವನ ಹಾಗೆ ಇರುತ್ತದೆ ಎನ್ನಲಿಕ್ಕಾಗದು. ಹೀಗಾಗಿ ಹೋಲಿಕೆ ಬೇಡವೇ ಬೇಡ.

ಜೀವನ ಸಂಗಾತಿಯಿಂದ ಅತಿಯಾದ ನಿರೀಕ್ಷೆ ಒಳ್ಳೆಯದಲ್ಲ. ನಿಮ್ಮ ನಿರೀಕ್ಷೆಗಳು ಹೆಚ್ಚಿದಷ್ಟು ಅಸಮಾಧಾನದ ಮಟ್ಟ ಹೆಚ್ಚುತ್ತದೆ. ಅದೇ ರೀತಿ ನಿಮ್ಮ ಸಂಗಾತಿ ಕೂಡ ನಿಮ್ಮಲ್ಲಿಒಂದಿಷ್ಟು ನಿರೀಕ್ಷೆಗಳನ್ನು ಇಟ್ಟುಕೊಂಡಿರಬಹುದು. ನೀವು ಅವುಗಳನ್ನು ಈಡೇರಿಸಲು ವಿಫಲವಾಗಬಹುದು. ಆದ್ದರಿಂದ ಪರಸ್ಪರರ ನಿರೀಕ್ಷೆಗಳ ಮಟ್ಟ ಕಮ್ಮಿ ಇದ್ದಷ್ಟು ಒಳ್ಳೆಯದು.