ವೈವಾಹಿಕ ಬದುಕನ್ನು ಕಾಪಾಡುವ ಆ್ಯಪ್‌ಗಳು

ಆರೋಗ್ಯಪೂರ್ಣ ದಾಂಪತ್ಯವನ್ನು ನಿಮ್ಮದಾಗಿಸಿಕೊಳ್ಳಲು ಆ್ಯಪ್‌ಗಳು ನಿಮ್ಮ ಸಹಾಯಕ್ಕೆ ನಿಲ್ಲುತ್ತವೆ. ಸ್ಮಾರ್ಟ್‌ ಲೋಕದ ದಾಂಪತ್ಯವನ್ನು ಕಾಪಾಡುವ ಕೆಲಸವನ್ನು ಇವು ಮಾಡಲಿವೆ. ಅಂದರೆ ನಿಮ್ಮ ಹಾಗೂ ಸಂಗಾತಿ ನಡುವಿನ ಭಿನ್ನಾಭಿಪ್ರಾಯ, ಗೊಂದಲಗಳಿಗೆಲ್ಲ ಪರಿಹಾರ ಸೂಚಿಸುವ ಕೆಲಸ ಮಾಡುತ್ತವೆ. ಅದಕ್ಕಾಗಿ ಒಂದಿಷ್ಟು ಪ್ರಶ್ನಾವಳಿ, ಸೂಚನೆಗಳನ್ನು ನೀಡುತ್ತವೆ. ಇವುಗಳ ಸಹಾಯದಿಂದ ಪ್ರಾಥಮಿಕ ಹಂತದಲ್ಲೇ ಸಮಸ್ಯೆಗೆ ಪರಿಹಾರ ಪಡೆಯಬಹುದು. ಲಾಸ್ಟಿಂಗ್‌, ರೀಗೇನ್‌, ಕಪಲ್‌ ಥೆರಪಿ ಸೇರಿದಂತೆ ಹಲವಾರು ಆ್ಯಪ್‌ಗಳಿವೆ. ನಿಮ್ಮ ಅಗತ್ಯಕ್ಕೆ ತಕ್ಕಂತೆ ಅವುಗಳನ್ನು ಬಳಸಬಹುದು.

ಆನ್‌ಲೈನ್‌ ಆಪ್ತ ಸಲಹೆ

ನಿಮ್ಮ ವೈವಾಹಿಕ ಬದುಕು ಖುಷಿಯಾಗಿರಬೇಕು ಅಂದರೆ ಒಂದಿಷ್ಟು ಬದಲಾವಣೆಗಳಿಗೆ ನೀವೇ ಒಗ್ಗಿಕೊಳ್ಳಬೇಕು. ಅದು ಅಸಾಧ್ಯ ಎಂದಾಗ ಅಂಥದ್ದೊಂದು ಸಂಬಂಧದಿಂದ ಹೊರ ಬರುವ ಬದಲು ಸ್ನೇಹಿತರ, ತಜ್ಞರ ಆಪ್ತ ಸಲಹೆ ಪಡೆಯುತ್ತೀರ. ಆದರೆ ಕೆಲವೊಮ್ಮೆ ಖಾಸಗಿ ಸಂಗತಿಗಳನ್ನು ಇನ್ನೊಬ್ಬರ ಬಳಿ ಹೇಳಿಕೊಳ್ಳಲು ಮುಜುಗರ ಉಂಟಾಗುತ್ತದೆ. ವೃತ್ತಿಪರ ಆಪ್ತ ಸಲಹೆ ಪಡೆಯುವುದು ದುಬಾರಿ ಕೂಡ. ಅಂಥ ಸಂದರ್ಭದಲ್ಲಿ ನಿಮ್ಮ ಸಹಾಯಕ್ಕೆ ನಿಲ್ಲಲಿವೆ ಆನ್‌ಲೈನ್‌ ಆಪ್ತ ಸಲಹೆ. ಇತ್ತೀಚೆಗೆ ಆನ್‌ಲೈನ್‌ ಮೂಲಕ ದಾಂಪತ್ಯ ಸಮಸ್ಯೆಗಳಿಗೆ ಪರಿಹಾರ ನೀಡಲು ಸಾಕಷ್ಟು ವೆಬ್‌ಸೈಟ್‌ಗಳು ಕಾರ‍್ಯ ನಿರ್ವಹಿಸುತ್ತಿವೆ.