ರೊಮ್ಯಾಂಟಿಕ್‌ ಕ್ಷಣ ಕೊಲ್ಲುತ್ತಿರುವ ಫಬ್ಬಿಂಗ್‌

ಮೊಬೈಲ್‌ ಮುಕ್ತ ಪರಿಸರ ನಿಮ್ಮ ಸುತ್ತವಿದ್ದರೆ ಅದು ನಿಮ್ಮಿಬ್ಬರ ಬಂಧವನ್ನು ಹೆಚ್ಚಿಸುತ್ತದೆ. ಆದರೆ ಇತ್ತೀಚೆಗೆ ರೊಮ್ಯಾಂಟಿಕ್‌ ಕ್ಷಣವನ್ನು ಕೊಲ್ಲುತ್ತಿರುವುದು ಫಬ್ಬಿಂಗ್‌. ಇದು ಸಂಬಂಧ ಕೊಲ್ಲುವ ಹೊಸ ಮೊಬೈಲ್‌ ಟ್ರೆಂಡ್‌ ಎಂದೆನಿಸಿದೆ.

ಇದರಿಂದ ಆತ್ಮೀಯರನ್ನು ದೂರ ಮಾಡಿಕೊಳ್ಳುವುದಷ್ಟೇ ಅಲ್ಲ. ಮೊಬೈಲ್ ಗೀಳಿನಿಂದ ಆತ್ಮೀಯರಿಗೆ ಬಹಳ ಘಾಸಿಯಾಗುತ್ತದೆ. ಅವರ ಜೊತೆಗೆ ಫಬ್ಬಿಂಗ್ ಮಾಡುವವರಿಗೂ ಹಲವು ಮಾನಸಿಕ ಸಮಸ್ಯೆ ಬರುತ್ತೆ.

ಪರಸ್ಪರ ಇಬ್ಬರು ಮಾತನಾಡುವಾಗ ಅಥವಾ ಏಕಾಂತದ ಕ್ಷಣ ಕಳೆಯಬೇಕು ಎಂದಾಗ ಇಬ್ಬರಲ್ಲಿ ಒಬ್ಬರು ಫೋನ್‌ನಲ್ಲಿ ನಿರತರಾದಾಗ ಅದು ಸಂಬಂಧದಲ್ಲಿ ಕಿರಿಕಿರಿ ಉಂಟು ಮಾಡಬಹುದು. ಆಸಕ್ತಿ ಇಲ್ಲ ಎಂದೆನಿಸಬಹುದು. ಇಬ್ಬರ ನಡುವೆ ವೈಮನಸ್ಸಿಗೂ ಇದೇ ಕಾರಣವಾಗಬಹುದು. ಅಂದಹಾಗೆ ಈ ಫಬ್ಬಿಂಗ್‌ ಅಂದರೇನು ಗೊತ್ತಾ? ಇಬ್ಬರು ಪರಸ್ಪರ ಮಾತನಾಡುತ್ತಿರುವಾಗ ವ್ಯಕ್ತಿಯೊಬ್ಬ ತನ್ನ ಫೋನ್‌ನಲ್ಲಿ ಮಗ್ನರಾಗಿರುವ ನಡುವಳಿಕೆ. ಅಂದರೆ ಮೊಬೈಲ್‌ನಿಂದ ಇನ್ಯಾರ ಜತೆಯೋ ಮಾತನಾಡುವುದು, ಮೆಸೇಜ್‌ ಕಳುಹಿಸುವ ಮೂಲಕ ಎದುರಿಗಿರುವ ವ್ಯಕ್ತಿಯನ್ನು ಕಡೆಗಣಿಸುವಿಕೆಯನ್ನು ಫಬ್ಬಿಂಗ್‌ ಎನ್ನುತ್ತಾರೆ.

ನೆನಪಿಡಿ

ಆತ್ಮೀಯರ ಮಾತಿಗೆ ಕಿವಿಯಾಗಿ. ಇಲ್ಲದಿದ್ದರೆ ನಾಳೆಯ ದಿನ ನಮ್ಮ ನೋವಿಗೆ ಕಿವಿಯಾಗಲು ಯಾರೂ ಇರುವುದಿಲ್ಲ.

* ಸದಾಕಾಲವೂ ಫೋನಿಗೆ ಅಂಟಿಕೊಂಡು ಬಾಹ್ಯ ಸಂವೇದನೆ ಇಲ್ಲದ ವಸ್ತುವಿನ ಹಾಗಿದ್ದರೆ ನಾಳೆ ನಾವು ಸತ್ತಾಗ ಅಳಲು ಸಹ ಯಾರೂ ಇರುವುದಿಲ್ಲ. ನೆನಪಿಟ್ಟುಕೊಳ್ಳಿ.

* ಪೋನಿನಲ್ಲಿ ನಮಗೆ ಸಾಂತ್ವನ ಹೇಳುವವರು, ಸಮಾಧಾನ ಮಾಡುವವರು ನಿಜ ಜೀವನದಲ್ಲಿ ನಮಗೆ ತೊಂದರೆಯಾದಾಗ ನಮಗೆ ಸಹಾಯ ಮಾಡುವುದಿಲ್ಲ. ಅವರು ಫೋನಿಗಷ್ಟೇ ಸೀಮಿತ. ಅಂತಹ ಸಂದರ್ಭದಲ್ಲಿ ನಮಗೆ ಸಹಾಯ ಮಾಡುವವರು ನಮ್ಮ ಮನೆಯವರು ಮತ್ತು ನಮ್ಮ ಸುತ್ತಮುತ್ತ ಇರುವವರು ಮಾತ್ರ.

*ಮನಸ್ಸಿಗೆ ತೀವ್ರ ದುಃಖವಾದಾಗ ನಮ್ಮ ಪರಿಸ್ಥಿತಿಯನ್ನು ಫೇಸ್ಬುಕ್ಕಿನಲ್ಲಿ ಅಪ್ಡೇಟ್‌ ಮಾಡುವುದರಿಂದ ನಮಗೆ ಶಾಂತಿ ಸಿಗೋಲ್ಲ. ತಂತ್ರಜ್ಞಾನ ಎಷ್ಟೇ ಮುಂದುವರಿದಿದ್ದರೂ
ಆತ್ಮೀಯರಿಂದ ನೇರವಾದ ಸಮಾಧಾನ ಸಿಕ್ಕಾಗಲೇ ನಮ್ಮ ಮನಸ್ಸಿಗೆ ನೆಮ್ಮದಿ.