ಹೀಗೆ ಅರಿವಾಗಲು ಪ್ರಾರಂಭವಾದ ತಕ್ಷಣ ಸಂಗಾತಿಯ ಬಗ್ಗೆ ಇದ್ದ ಅಭಿಮಾನ ಪ್ರೀತಿಗಳು ಉಡುಗತೊಡಗುತ್ತದೆ. ವಿವಾಹಕ್ಕೂ ಮುನ್ನ ಇದ್ದ ಎಷ್ಟೋ ನಿರೀಕ್ಷೆಗಳು ಈ ಜನ್ಮದಲ್ಲಿ ಕೈಗೂಡಲು ಸಾಧ್ಯವಿಲ್ಲ ಎಂಬ ವಾಸ್ತವ ಅರಿವಾಗುತ್ತಲೇ ನಿರಾಶೆ ಮಡುಗಟ್ಟುತ್ತದೆ. ಆದರೆ ಈ ವಾಸ್ತವಗಳನ್ನು ಜೀವನದ ಭಾಗ ಎಂದು ಪರಿಗಣಿಸಿ ಎಷ್ಟು ಬೇಗನೇ ಈ ವಾಸ್ತವಗಳಿಗೆ ಹೊಂದಿಕೊಂಡು ಪಾಲಿಗೆ ಬಂದಿದ್ದೇ ಪಂಚಾಮೃತ ಎಂಬಂತೆ ಇರುವುದರಲ್ಲಿ ಸಂತೋಷಪಟ್ಟು ಜೀವನ ಮುಂದುವರೆಸಿದರೆ ಜೀವನ ಮತ್ತೊಮ್ಮೆ ಸುಂದರ ಹಾಗೂ ಸಾರ್ಥಕ ಎನಿಸುತ್ತದೆ.
ಆದರೆ ಒಂದು ವೇಳೆ, ಸಂಗಾತಿಯಲ್ಲಿ ಯಾವುದೋ ಕೊರತೆ ಕಂಡುಬಂದರೆ ಅಥವಾ ಬೇರಾವುದೇ ಕಾರಣದಿಂದ ವೈಮನಸ್ಯ ಉಂಟಾದರೆ, ಸಂಗಾತಿಯಿಂದ ದೂರ ಹೋಗಲೂ ಸಾಧ್ಯವಿಲ್ಲ, ಇಲ್ಲಿ ಇರಲೂ ಸಾಧ್ಯವಿಲ್ಲ ಎಂಬಂತಹ ದ್ವಂದ್ವ ಪರಿಸ್ಥಿತಿ ಎದುರಾಗುತ್ತದೆ. ಎಷ್ಟೋ ಬಾರಿ, ಸಂಗಾತಿಯ ಧೋರಣೆ ಮತ್ತು ವ್ಯಕ್ತಿತ್ವವೂ ಇನ್ನೊಬ್ಬರಿಗೆ ಇಷ್ಟವಾಗುವುದಿಲ್ಲ ಹಾಗೂ ಇವರು ತನಗಾಗಿ ಬದಲಾಗುವುದಿಲ್ಲ ಎಂದು ಅರಿವಾದ ತಕ್ಷಣ ಮಾನಸಿಕವಾಗಿ ಸಂಗಾತಿಯಿಂದ ದೂರವಿರತೊಡಗುತ್ತಾರೆ.
ಅಲ್ಲಿಗೆ ದಾಂಪತ್ಯದಲ್ಲಿ ಬಿರುಕು ಮೂಡಿದಂತೆ. ಹೊರಗಿನಿಂದ ಏನೂ ತಪ್ಪೇ ಇಲ್ಲದಂತೆ ಕಂಡುಬಂದರೂ ಮನಸ್ಸಿನಲ್ಲಿ ಏನೂ ಸರಿ ಇಲ್ಲ ಎಂಬ ಭಾವನೆ ಪ್ರಕಟಗೊಳ್ಳತೊಡಗುತ್ತದೆ. ವಾಸ್ತವದಲ್ಲಿ ಇದು ಅತಿ ಅಪಾಯಕಾರಿಯಾದ ಬಿರುಕಾಗಿದೆ ಹಾಗೂ ತಕ್ಷಣವೇ ಸರಿಪಡಿಸದಿದ್ದರೆ ದಾಂಪತ್ಯವನ್ನೇ ಬೇರ್ಪಡಿಸುವ ಅಪಾಯವಿದೆ.
ಓರ್ವ ವ್ಯಕ್ತಿ ತನ್ನ ಸಂಗಾತಿಯಿಂದ ಮಾನಸಿಕವಾಗಿ ಈಗಾಗಲೇ ಬೇರ್ಪಟ್ಟಿದ್ದು ಕೇವಲ ತೋರಿಕೆಗೆ ದಾಂಪತ್ಯ ಚೆನ್ನಾಗಿರುವಂತೆ ನಟಿಸುತ್ತಿದ್ದರೆ ಇದನ್ನು ಕೆಲವು ಸಂಜ್ಞೆಗಳು ಪ್ರಕಟಿಸುತ್ತವೆ. ಇಂದಿನ ಲೇಖನದಲ್ಲಿ ಇಂತಹ ಸೂಕ್ಷ್ಮ ಸೂಚನೆಗಳ ಬಗ್ಗೆ ವಿವರಿಸಲಾಗಿದ್ದು ದಂಪತಿಗಳು ತಕ್ಷಣವೇ ಇವುಗಳನ್ನು ಸರಿಪಡಿಸಿ ದಾಂಪತ್ಯವನ್ನು ಉಳಿಸಿಕೊಳ್ಳಲು ಸಾಧ್ಯವಾಗುತ್ತದೆ. ನೇರವಾಗಿ ಮಾತನಾಡಿ ಈ ತೊಂದರೆಗಳಿಗೆ ಸೂಕ್ತ ಪರಿಹಾರವನ್ನು ಹುಡುಕುವುದೇ ದಾಂಪತ್ಯ ಉಳಿಸಿಕೊಳ್ಳುವ ಏಕೈಕ ಮಾರ್ಗವಾಗಿದೆ.
ನಿಮಗೆ ಮುಖ್ಯವಾದ ವಿಷಯಗಳು ಅವರಿಗೆ ಮರೆತೇ ಹೋಗುತ್ತವೆ
ಒಂದು ವೇಳೆ ನಿಮ್ಮನ್ನು ಮೆಚ್ಚಿಸಲು ಓರ್ವ ವ್ಯಕ್ತಿ ಬಯಸಿದರೆ, ಅವರು ಮಾಡಬೇಕಾಗಿರುವ ಮೊದಲ ಕಾರ್ಯವೆಂದರೆ ನಿಮಗೆ ಏನು ಇಷ್ಟವಿದೆಯೋ ಆ ಕಾರ್ಯಗಳನ್ನು ನೆನಪಿಟ್ಟುಕೊಂಡು ನಿರ್ವಹಿಸುವುದು ಮತ್ತು ನಿಮಗೆ ಇಷ್ಟವಿಲ್ಲದ ಸಂಗತಿಗಳನ್ನೂ ನೆನಪಿಟ್ಟುಕೊಂಡು ಇವುಗಳು ನಿಮಗೆ ಎದುರಾಗದಂತೆ ಎಚ್ಚರ ವಹಿಸುವುದು. ನಿಮ್ಮ ನೆಚ್ಚಿನ ಬಣ್ಣ, ಕಾಫಿ, ಉಡುಗೆ, ಸ್ಥಳಗಳು ಎಲ್ಲವೂ ಇವರಿಗೆ ಸ್ಪಷ್ಟವಾಗಿ ನೆನಪಿರುತ್ತವೆ.
ಇವೆಲ್ಲಾ ಕತ್ತೆಮರಿಗಳು. ಆದರೆ ಕತ್ತೆ ದೊಡ್ಡದಾಗುತ್ತಾ ಹೋದಂತೆ ನಿಮ್ಮ ಸಂಗಾತಿಗೆ ಇವು ಯಾವುವೂ ನೆನಪಿರುವುದೇ ಇಲ್ಲ. ಅಷ್ಟೇ ಅಲ್ಲ, ನಿಮಗೆ ಅತಿ ಮುಖ್ಯ ಎನಿಸುವ ಯಾವುದೋ ವಿಷಯವನ್ನು ಪ್ರಜ್ಞಾಪೂರ್ವಕವಾಗಿ ಮರೆತುಬಿಡುವುದು ಮಾತ್ರ ನಿಮ್ಮ ಸಂಗಾತಿ ನಿಮ್ಮಿಂದ ಮಾನಸಿಕವಾಗಿ ದೂರವಾಗಿರುವ ಸ್ಪಷ್ಟ ಸಂಕೇತವಾಗಿದೆ.
ನೀವು ಕ್ಷಮೆ ಕೇಳಿದ ಬಳಿಕವೂ ನಿಮ್ಮ ಸಂಗಾತಿ ಬದಲಾಗದೇ ಇರುವುದು
ದಂಪತಿಗಳು ಎಂದ ಬಳಿಕ ಭಿನ್ನಾಭಿಪ್ರಾಯ ಬಂದೇ ಬರುತ್ತದೆ. ಇವುಗಳನ್ನು ಕೆದಕಿ ಕೋಳಿ ಜಗಳವಾಡುವುದು ಪ್ರತಿ ದಂಪತಿಗಳಲ್ಲೂ ಇರುವ ನಿತ್ಯದ ಸಂಗತಿಯಾಗಿದೆ. ವಾಸ್ತವದಲ್ಲಿ ಹೀಗೆ ಕೋಳಿ ಜಗಳವಾಡದ ದಂಪತಿಗಳೇ ಈ ಜಗತ್ತಿನಲ್ಲಿಲ್ಲ! ಮೂಕ ದಂಪತಿಗಳೂ ಕೈ ಸಂಜ್ಞೆಯಲ್ಲಿಯೇ ಜಗಳವಾಡುವುದನ್ನು ಗಮನಿಸಲಾಗಿದೆ. ಆದರೆ, ಈ ಜಗಳ ಊಟದಲ್ಲಿ ಉಪ್ಪಿನಕಾಯಿಯಂತೆ, ಗಂಡ ಹೆಂಡಿರ ಜಗಳ ಉಂಡು ಮಲಗುವ ತನಕ ಅಷ್ಟೇ.
ಮರುದಿನ ಮತ್ತೊಮ್ಮೆ ಎಲ್ಲವೂ ಮೊದಲಿನಂತೆ, ದಾಂಪತ್ಯ ನಿತ್ಯನೂತನ! ಇದಕ್ಕೆ ಬೇಕಾಗಿರುವುದು ಸಂಗಾತಿಯಲ್ಲಿ ಕೇಳಬೇಕಾದ ಚಿಕ್ಕ ಕ್ಷಮೆ ಅಷ್ಟೇ! ಸಮಾನ್ಯವಾಗಿ ಕ್ಷಮೆ ಕೇಳಿದ ಬಳಿಕ ತಮ್ಮಿಂದ ಈ ತಪ್ಪು ಮತ್ತೊಮ್ಮೆ ಆಗದಂತೆ ಹಾಗೂ ಸಂಗಾತಿಯ ಮನಕ್ಕೆ ನೋವಾಗದಂತೆ ಎಚ್ಚರ ವಹಿಸುತ್ತಾರೆ. ಆದರೆ ಹೀಗಾಗದೇ, ತನ್ನಿಂದ ಸಂಗಾತಿಗೆ ಇಷ್ಟವಾಗದ ದೊಡ್ಡ ತಪ್ಪಾಗಿದ್ದರೂ, ಕ್ಷಮೆ ಕೇಳಿಯೂ ಮುಂದಿನ ಬಾರಿ ಅದೇ ತಪ್ಪನ್ನು ನಿರ್ವಹಿಸಿದರೆ ಮಾತ್ರ ಇದು ಭಾವನಾತ್ಮಕವಾಗಿ ನಿಮ್ಮಿಂದ ಸಂಗಾತಿ ದೂರವಾಗುತ್ತಿರುವ ಸಂಜ್ಞೆಯಾಗಿದೆ.
ನಿಮ್ಮಿಬ್ಬರ ನಡುವೆ ಸಂಭಾಷಣೆ ಹಿಂದಿನಷ್ಟು ಇರುತ್ತಿಲ್ಲ
ದಂಪತಿಗಳು ತಮ್ಮ ನಡುವೆ ಸಂಭಾಷಣೆಯನ್ನು ಜೀವಂತ ಇರಿಸಿದಷ್ಟೂ ದಾಂಪತ್ಯ ಸೊಗಸಾಗಿರುತ್ತದೆ. ಈ ಮೂಲಕ ಪರಸ್ಪರರು ತಮ್ಮ ಸಂಗಾತಿಯಲ್ಲಿ ಬಯಸುವ ಗುಣಗಳು ಹಾಗೂ ಅಪೇಕ್ಷೆಗಳನ್ನು ತೋರ್ಪಡಿಸಿಕೊಳ್ಳಬಹುದು ಹಾಗೂ ಜೀವನವನ್ನು ಸ್ಪಷ್ಟವಾಗಿ ನಡೆಸಲು ಸಾಧ್ಯವಾಗುತ್ತದೆ.
ಸಂಬಂಧ ಪ್ರಾರಂಭಗೊಳ್ಳುವ ಮುನ್ನ ಇಬ್ಬರಿಗೂ ತಮ್ಮ ತಮ್ಮ ಸಂಗಾತಿಯೊಂದಿಗೆ ಮಾತನಾಡುವುದು ಬಹಳಷ್ಟಿತ್ತು. ಆದರೆ ಒಂದು ವೇಳೆ ನಿಮ್ಮಿಬ್ಬರ ನಡುವೆ ಮಾತನಾಡಲು ಯಾವುದೇ ವಿಷಯವೇ ಇಲ್ಲ ಎಂದು ಪರಿಗಣಿಸಲ್ಪಟ್ಟರೆ, ಅಥವಾ ವಿಷಯವನ್ನು ಪ್ರಾರಂಭಿಸಲೇ ಇಷ್ಟಪಡದಿದ್ದರೆ ನಿಮ್ಮಿಬ್ಬರ ನಡುವೆ ದಂಪತಿಗಳ ನಡುವೆ ಇರಬೇಕಾದ ಸಾಮರಸ್ಯ ಇಲ್ಲ ಎಂದೇ ತಿಳಿದುಕೊಳ್ಳಬೇಕಾಗುತ್ತದೆ.
ಜೊತೆಯಾಗಿ ಕಳೆಯುವ ಸಮಯ ನಿಮಗೆ ತ್ರಾಸದಾಯಕ ಎನಿಸತೊಡಗುತ್ತದೆ
ದಾಂಪತ್ಯದ ಹೊಸದರಲ್ಲಿ ಯಾವಾಗ ಸಂಗಾತಿಯ ಬಳಿ ತಲುಪುತ್ತೇನೋ, ಯಾವಾಗ ಆಕೆ/ಆತನೊಂದಿಗೆ ಮಾತನಾಡುತ್ತೇನೋ ಎಂಬ ತವಕ ಇದ್ದುದು ಈಗ ಜೊತೆಯಾಗಿ ಕಳೆಯುವ ಕ್ಷಣಗಳು ಭಾರಿ ಎನಿಸತೊಡಗುತ್ತವೆ. ದಾಂಪತ್ಯದಿಂದ ನಿಜವಾಗಿಯೂ ಬೇರ್ಪಡುವ ಮೊದಲು ನೀವು ಮಾನಸಿಕವಾಗಿ ನಿಮ್ಮ ಸಂಗಾತಿಯಿಂದ ದೂರಾಗುತ್ತೀರಿ.
ಜೊತೆಗಿದ್ದಾಗಲೂ ಕಡಿಮೆ ಮಾತು ಹಾಗೂ ನಿಮ್ಮಿಬ್ಬರ ನಡುವೆ ಇರುವ ತೊಂದರೆಯನ್ನು ಪ್ರಕಟಿಸಿ ಇದನ್ನು ಸರಿಪಡಿಸಲು ಯತ್ನಿಸಿದರೂ ಸಂಗಾತಿ ಇದನ್ನು ಅರ್ಥ ಮಾಡಿಕೊಳ್ಳುವುದೇ ಇಲ್ಲ. ಪರಿಣಾಮವಾಗಿ, ನೀವು ಈ ವಿಷಯದ ಬಗ್ಗೆ ಹೆಚ್ಚು ಹೆಚ್ಚಾಗಿ ಚಿಂತಿಸಬೇಕಾಗುತ್ತದೆ ಹಾಗೂ ಮಾನಸಿಕವಾಗಿ ಹೆಚ್ಚು ಒತ್ತಡ ಹೇರಬೇಕಾಗುತ್ತದೆ. ಇದರಿಂದ ಸಂಗಾತಿಯ ಜೊತೆ ಇರುವ ಕ್ಷಣಗಳು ತ್ರಾಸದಾಯಕ ಎನಿಸತೊಡಗುತ್ತವೆ.
ಇವುಗಳನ್ನು ಪಾಲಿಸಿದರೆ ನಿಮ್ಮ ವೈವಾಹಿಕ ಜೀವನ ಸುಖಕರ
ನಿಮ್ಮ ಜೀವನದ ಇತರ ಭಾಗಗಳ ಬಗ್ಗೆ ಇವರು ಆಸಕ್ತಿ ತೋರುವುದಿಲ್ಲ ಅಥವಾ ತೋರಿದಂತೆ ನಟಿಸುತ್ತಾರೆ
ಆರೋಗ್ಯಕರ ದಾಂಪತ್ಯ ಎಂದರೆ ಸಂಗಾತಿಳಿಬ್ಬರೂ ಪರಸ್ಪರರ ಆಸಕ್ತಿಗಳು, ಸಾಮರ್ಥ್ಯಗಳು, ಇಷ್ಟಗಳು ಇಷ್ಟವಿಲ್ಲದಿರುವುದು, ಹೋಗಲು ಇಚ್ಛಿಸುವ ಸ್ಥಳಗಳು ಮೊದಲಾದವುಗಳ ಬಗ್ಗೆ ತಿಳಿದುಕೊಳ್ಳುವುದು ಅಗತ್ಯವಾಗಿದೆ. ಈ ಮೂಲಕ ಮನಸ್ಸಿನ ಆಳದಲ್ಲಿ ಹುದುಗಿರುವ ಜೀವನದ ಉದ್ದೇಶವನ್ನೂ, ಇತರ ಸಂಕಲ್ಪಗಳನ್ನೂ ಪ್ರಕಟಿಸಬಹುದು. ಈ ಉದ್ದೇಶಗಳು, ಸಂಕಲ್ಪಗಳು ಪೂರ್ಣಗೊಳ್ಳಲು ಸಂಗಾತಿ ನೀಡುವ ಪ್ರತಿ ಸಹಕಾರವೂ ದಾಂಪತ್ಯವನ್ನು ಇನ್ನಷ್ಟು ಗಟ್ಟಿಗೊಳಿಸುತ್ತದೆ.
ಸಂಗಾತಿಯ ಯಾವುದೇ ಪ್ರಯತ್ನ ಫಲ ನೀಡಿದಾಗ ನೀವು ಪ್ರಕಟಿಸುವ ಸಂತೋಷ ಸಂಗಾತಿಗೆ ಯಾವ ಪಾರಿತೋಷಕವೂ ನೀಡದಷ್ಟು ಆತ್ಮತೃಪ್ತಿಯನ್ನು ನೀಡುತ್ತದೆ. ಆದರೆ, ಒಂದು ವೇಳೆ ನಿಮ್ಮ ಸಂಗಾತಿ ನಿಮ್ಮನ್ನು ಕೇವಲ ತನ್ನ ಅಗತ್ಯತೆ ಎಂದು ಮಾತ್ರವೇ ಪರಿಗಣಿಸಿ ನಿಮ್ಮ ಯಾವುದೇ ಆಕಾಂಕ್ಷೆಗಳಿಗೆ ನೀರೆರೆಯುವುದನ್ನು ತಪ್ಪಿಸಿದರೆ ಅಥವಾ ಈ ಬಗ್ಗೆ ಹೇಳಿದರೂ ತಲೆಕೆಡಿಸಿಕೊಳ್ಳದೇ ನಿಮ್ಮ ಜೀವನದ ಯಾವುದೇ ವಿಷಯದ ಬಗ್ಗೆ ನಿರಾಸಕ್ತಿ ತೋರಿದರೆ ನಿಮ್ಮ ಮನದಲ್ಲಿ ಸಂಗಾತಿಯ ಬಗ್ಗೆ ಇದ್ದ ಅಭಿಮಾನ ಕುಸಿಯತೊಡಗುತ್ತದೆ. ಪರಿಣಾಮವಾಗಿ ಮಾನಸಿಕವಾಗಿ ನೀವು ಸಂಗಾತಿಯಿಂದ ದೂರಾಗತೊಡಗುತ್ತೀರಿ.
To Read in English Click: Signs your partner has mentally disconnected with you, without officially breaking up