ಸೋಲೋ ವ್ಯಾಲಂಟೇನ್ಸ್ ಡೇಗೆ ಐಡಿಯಾ

ಯಾರೋ ಕೈ ಕೈ ಹಿಡಿದುಕೊಂಡು ಓಡಾಡುವಾಗ, ಇನ್ಯಾರೋ ರೊಮ್ಯಾಂಟಿಕ್‌ ಫೋಟೋವನ್ನು ಸೋಷಿಯಲ್‌ ಮೀಡಿಯಾದಲ್ಲಿ ಶೇರ್‌ ಮಾಡುವಾಗಲೆಲ್ಲ ಮನಸ್ಸು ತಲ್ಲಣಿಸುತ್ತದೆ. ಇಲ್ಲದ ಪ್ರೇಮಿಗೆ ಹಂಬಲಿಸುತ್ತದೆ. ಮುರಿದು ಬಿದ್ದ ಪ್ರೀತಿಯ ನೆನಪೊಂದು ಹನಿಯಾಗಿ ಕಾಡುತ್ತದೆ. ಒಂಟಿ ಎನ್ನುವ ಭಾವವೊಂದು ವಿನಾ ಕಾರಣ ಕಾಡುತ್ತದೆ. ಆದರೆ ಅದೆಲ್ಲವನ್ನೂ ಮೀರಿ ನಿಮ್ಮ ಸಿಂಗಲ್‌ಹುಡ್‌ ಎಂಜಾಯ್‌ ಮಾಡಿ. ಜೀವನದಲ್ಲಿಒಮ್ಮೆಯೂ ಪ್ರೀತಿಯೇ ಆಗಿಲ್ಲಅಂತಲೋ ಅಥವಾ ಕೈ ಕೊಟ್ಟ ಪ್ರೀತಿಯ ಬಗ್ಗೆ ಕೊರಗಬೇಡಿ.

ನಿಮ್ಮನ್ನು ನೀವೇ ಪ್ರೀತಿಸಿ. ಈ ಮೂಲಕ ವ್ಯಾಲಂಟೇನ್ಸ್‌ ದಿನವನ್ನು ನೀವೇ ನಿಮಗಾಗಿ ಆಚರಿಸಿಕೊಳ್ಳಿ. ಪ್ರೀತಿಯ ಬಣ್ಣ, ರುಚಿ ಎಲ್ಲವೂ ಬೇರೆಯೇ ಆಗಿರಬಹುದು. ಆದರೆ ತಮ್ಮನ್ನು ತಾವು ಉತ್ತೇಜಿಸಿಕೊಳ್ಳಲು ಸಿಂಗಲ್‌ಹುಡ್‌ ಅನ್ನು ಎಂಜಾಯ್‌ ಮಾಡುವುದು ಹೇಗೆ ಎಂಬುದರ ಬಗ್ಗೆ ಸ್ಪಷ್ಟ ಕಲ್ಪನೆ, ಯೋಜನೆಯೊಂದಿಗೆ ಈ ವಾರವನ್ನು ಖುಷಿಯಾಗಿ ಕಳೆಯಿರಿ. ನಿಮ್ಮನ್ನು ನೀವು ಪ್ರೀತಿಸಿಕೊಳ್ಳಬೇಕು ಎಂದರೆ ನಿಮ್ಮೊಳಗಿನ ಆತ್ಮವಿಶ್ವಾಸ ಮೊದಲು ಗರಿಗೆದರಬೇಕು. ಅಂತಹ ಆತ್ಮವಿಶ್ವಾಸವನ್ನು ಹೆಚ್ಚಿಸುವ ಸಕಾರಾತ್ಮಕ ಚಟುವಟಿಕೆಗಳಲ್ಲಿತೊಡಗಿಕೊಳ್ಳಿ.

ನಿಮ್ಮ ಆಸಕ್ತಿ ಅಥವಾ ಹವ್ಯಾಸವೇ ಸದಾ ನಿಮ್ಮನ್ನು ಖುಷಿಯಾಗಿಡುವಂಥದ್ದು. ಆದ್ದರಿಂದ ನಿಮ್ಮ ನೆಚ್ಚಿನ ಹವ್ಯಾಸಗಳಲ್ಲಿತೊಡಗಿಕೊಳ್ಳಿ. ಕ್ರೀಡೆ, ಸಂಗೀತ, ನೃತ್ಯ, ಚಿತ್ರಕಲೆ ಯಾವುದೇ ಕ್ಷೇತ್ರವಿರಲಿ ಈ ಸಮಯದಲ್ಲಿಅವುಗಳನ್ನು ವಿಭಿನ್ನವಾಗಿ ತೋರ್ಪಡಿಸಿ. ಚಾಕ್ಲೇಟ್‌, ಗಿಫ್ಟ್‌ ಅಥವಾ ಜತೆಗೆ ಕಳೆಯಲು ಪ್ರೇಮಿ ಇಲ್ಲದಿದ್ದರೆ ಏನಂತೆ? ನಿಮಗೆ ಬೇಕಾದ ವಸ್ತುವನ್ನು ನೀವು ಖರೀದಿಸಿ ಅಥವಾ ನೀವೇ ಇತರರಿಗೆ ಉಡುಗೊರೆ ನೀಡಿ. ಹಾಗೆ ಉಡುಗೊರೆ ಸ್ವೀಕರಿಸುವವರು ಅನಾಥ ಮಕ್ಕಳು, ಬಡವರು ಅಥವಾ ಇನ್ಯಾರೇ ಇರಬಹುದು.

ಸಮಾಜ ಸೇವೆ ಮಾಡಿದಾಗ ನಿಮ್ಮನ್ನು ಆವರಿಸುವ ತೃಪ್ತಿಗಿಂತ ಮೀಗಿಲಾದ್ದು ಬೇರೆ ಇಲ್ಲ. ನಿಮಗಾಗಿ, ನೀವೊಬ್ಬರೇ ಅಥವಾ ಸ್ನೇಹಿತರು, ಕುಟುಂಬದವರೊಂದಿಗೆ ಡಿನ್ನರ್‌ ಪಾರ್ಟಿ ಮಾಡಿ. ಪೋಷಕರು, ಸಹೋದರ, ಸಹೋದರಿಯರು ಇನ್ಯಾರೋ ಆಪ್ತ ಸಂಗಾತಿಗಳಿಗಾಗಿ ವ್ಯಾಲಂಟೇನ್‌ ಡೇ ಸೆಲೆಬ್ರೇಟ್‌ ಮಾಡಿ. ರೊಮ್ಯಾಂಟಿಕ್‌ ಡಿನ್ನರ್‌, ಕಪಲ್‌ ಗೇಮ್‌ ಮತ್ತಿತರ ಚಟುವಟಿಕೆಗಳಲ್ಲಿ ತೊಡಗಿಕೊಳ್ಳಲು ನೆರವಾಗಿ.