ಅಪ್ಪುಗೆಯಿಂದ ಹೆಚ್ಚುವುದು ಆರೋಗ್ಯ

ಕೆಲವರಿಗೆ ಅಪ್ಪಿಕೊಳ್ಳಲು ಮುಜುಗರ, ಮತ್ತೆ ಕೆಲವರಿಗೆ ಆತ್ಮೀಯರು ಸಿಕ್ಕ ತಕ್ಷಣ ಮೊದಲು ಅಪ್ಪಿಕೊಂಡು ನಂತರ ಮಾತನಾಡಿಸುತ್ತಾರೆ. ಇನ್ನು ಮುಂದೆ ಯಾರಾದರು ಸ್ನೇಹಿತರು ಅಪ್ಪಿಕೊಳ್ಳಲು ಮುಂದೆ ಬಂದರೆ ಸಂಕೋಚದಿಂದ ದೂರ ಸರಿಯಬೇಡಿ. ತಬ್ಬಿಕೊಳ್ಳುವ ಅಭ್ಯಾಸ ನಿಜಕ್ಕೂ ಆರೋಗ್ಯಕರ ಎನ್ನುತ್ತಾರೆ ತಜ್ಞರು. ತಬ್ಬಿಕೊಂಡರೆ ಆಗುವ ಪ್ರಯೋಜನಗಳು ಇವು:

ಒಂಟಿತನ ದೂರ: ತಬ್ಬಿಕೊಂಡರೆ ನಮ್ಮನ್ನು ಕಾಡುವ ಒಂಟಿತನ ದೂರವಾಗುತ್ತದಂತೆ. ಪರಸ್ಪರ ಅಪ್ಪಿಕೊಂಡಾಗ ಆಕ್ಸಿಟೋಸಿನ್‌ ಎಂಬ ಹಾರ್ಮೋನ್‌ ಬಿಡುಗಡೆಯಾಗುತ್ತದಂತೆ. ಇದು ಲವ್‌ ಹಾರ್ಮೋನ್‌ ಎಂದೇ ಖ್ಯಾತ. ಇದರ ಹೆಚ್ಚಳದಿಂದ ದೇಹ- ಮನಸ್ಸುಗಳು ಪ್ರಫುಲ್ಲಿತಗೊಳ್ಳುತ್ತವೆ.

ನೋವು ಕಡಿಮೆಯಾಗುತ್ತದೆ: ಯಾವುದಾದರೂ ದೈಹಿಕ, ಮಾನಸಿಕ ನೋವಿನಲ್ಲಿದ್ದಾಗ ಪ್ರೀತಿಯಿಂದ ಯಾರಾದರೂ ತಬ್ಬಿಕೊಂಡರೆ ಆ ನೋವು ಕಡಿಮೆಯಾಗುತ್ತದೆ. ಇಸ್ರೇಲ್‌ನ ಸಫಿಯಾ ವಿವಿ ಮಾಡಿದ ಸಂಶೋಧನೆಯಲ್ಲಿ ಈ ವಿಚಾರ ತಿಳಿದುಬಂದಿದೆ.

ಖಿನ್ನತೆಯಿಂದ ದೂರ: ವ್ಯಕ್ತಿ ಖಿನ್ನತೆಯಿಂದ ಬಳಲುತ್ತಿರುವಾಗ ಅದರಿಂದ ಹೊರಬರಲೂ ಈ ಅಪ್ಪುವಿಕೆ ಸಹಾಯ ಮಾಡುತ್ತದೆ. ತಬ್ಬಿಕೊಂಡಾಗ ವ್ಯಕ್ತಿಯಲ್ಲಿನ ಕಾರ್ಟಿಸೋಲ್‌ ಎಂಬ ಹಾರ್ಮೋನ್‌ ಬಿಡುಗಡೆ ಕಡಿಮೆಯಾಗಿ ಒತ್ತಡ, ಖಿನ್ನತೆಯ ಭಾವ ಕಡಿಮೆಯಾಗುತ್ತದೆ ಎನ್ನಲಾಗಿದೆ.