ಗರ್ಭಿಣಿ ತಾಯಿ ಎದೆ ಹಾಲುಣಿಸಬಹುದಾ?

ಮಕ್ಕಳಿಗೆ ತಾಯಿಯ ಎದೆ ಹಾಲಿನಷ್ಟು ಪೌಷ್ಠಿಕ ಆಹಾರ ಮತ್ತೊಂದಿಲ್ಲ. ಮಕ್ಕಳ ದೈಹಿಕ ಬೆಳವಣಿಗೆಗೆ, ಮಕ್ಕಳಲ್ಲಿ ರೋಗ ನಿರೋಧಕ ಶಕ್ತಿ ಹೆಚ್ಚಿಸುವಲ್ಲಿ ಎದೆ ಹಾಲು ಅವಶ್ಯಕ.

ಮೊದಲನೇ ಮಗುವಿಗೆ ವರ್ಷ ತುಂಬುವುದರೊಳಗೆ ಎರಡನೇಯ ಬಾರಿ ಗರ್ಭಿಣಿಯಾದರೆ ಮೊದಲನೇ ಮಗುವಿಗೆ ಎದೆ ಹಾಲುಣಿಸಬಹುದೇ ಎಂಬ ಮಾಹಿತಿ ನೋಡಿ ಇಲ್ಲಿದೆ:

ಗರ್ಭಿಣಿಯಾಗಿದ್ದಾಗಲೂ ದೇಹವು ಹಾಲು ಉತ್ಪತ್ತಿ ಮಾಡುವುದರಿಂದ ಎದೆಹಾಲು ಕೊಡಬಹುದು. ನೀವು ಮಗುವಿಗೆ ಎದೆ ಹಾಲು ನೀಡಿದರೂ ಗರ್ಭದಲ್ಲಿರುವ ಮಗುವಿಗೆ ಯಾವುದೇ ಪೋಷಕಾಂಶದ ಕೊರತೆ ಉಂಟಾಗುವುದಿಲ್ಲ. ಆದರೆ ಆರೋಗ್ಯಕರ ಆಹಾರಕ್ರಮ, ವಿಟಮಿನ್‌ ಡಿ ಹಾಗೂ ಫಾಲಿಕ್‌ ಆಮ್ಲದ ಸಪ್ಲಿಮೆಂಟ್‌ ತೆಗೆದುಕೊಳ್ಳುವುದನ್ನು ಮಿಸ್‌ ಮಾಡಬಾರದು.

ಗರ್ಭಿಣಿಯಾಗಿದ್ದಾಗ ಆಕ್ಸಿಟೋಸಿನ್‌ ಹಾರ್ಮೋನ್‌ ಬಿಡುಗಡೆ ಮಾಡುವುದರಿಂದ ಹಾಲಿನ ಪ್ರಮಾಣ ಕಡಿಮೆಯಾಗುವುದು, ಆದರೆ ಯಾವುದೇ ತೊಂದರೆ ಉಂಟಾಗುವುದಿಲ್ಲ.

ಎರಡನೇಯ ಬಾರಿ ಗರ್ಭಿಣಿಯಾಗಿದ್ದಾಗ ಅವಳಿ ಮಕ್ಕಳ ನಿರೀಕ್ಷೆಯಲ್ಲಿದ್ದರೆ ಅಥವಾ ಈ ಹಿಂದೆ ಗರ್ಭಪಾತ ಆಗಿದ್ದರೆ ನಿಮ್ಮ ವೈದ್ಯರು ಎದೆಹಾಲುಯುಣಿಸುವುದು ನಿಲ್ಲಿಸಲು ಸಲಹೆ ನೀಡಬಹುದು.

ಇನ್ನು ಗರ್ಭಿಣಿಯಾಗಿದ್ದಾಗ ಮೊಲೆತೊಟ್ಟು ತುಂಬಾ ಸೂಕ್ಷ್ಮವಾಗುವುದರಿಂದ ಹಾಲುಣಿಸುವಾಗ ನೋವು ಉಂಟಾಗಬಹುದು. ಕೆಲವು ತಾಯಿಂದಿರಿಗೆ ಈ ನೋವು ತುಂಬಾ ದಿನ ಇರುವುದಿಲ್ಲ, ಆದ್ದರಿಂದ ಅವರು ಹಾಲುಣಿಸುವುದನ್ನು ಮುಂದುವರೆಸುತ್ತಾರೆ.

ಗರ್ಭಧರಿಸಿ 5 ತಿಂಗಳು ತುಂಬುವಾಗ ಸ್ತನಗಳು ಕೊಲೊಸ್ಟ್ರಮ್‌ ಉತ್ಪತ್ತಿ ಮಾಡುತ್ತವೆ, ಇದು ಹೆರಿಗೆಗೆ ದೇಹ ಸಿದ್ಧವಾಗುತ್ತಿರುವ ಲಕ್ಷಣವಾಗಿದೆ. ಈ ಸಮಯದಲ್ಲಿ ಹಾಲಿನ ಉತ್ಪತ್ತಿ ಕಡಿಮೆಯಾಗುವುದು, ಈ ಸಂದರ್ಭದಲ್ಲಿ ಹಾಲು ಸರಿಯಾಗಿ ಸಿಗದೆ ಮಗುವೇ ಹಾಲು ಕುಡಿಯವುದನ್ನು ನಿಲ್ಲಿಸುವ ಸಾಧ್ಯತೆ ಇದೆ.

ಒಂದು ವೇಳೆ ನಿಲ್ಲಿಸದಿದ್ದರೆ ಹಾಲು ಕೊಡುವುದನ್ನು ಮುಂದುವರೆಸಬಹುದು. ನಿಮ್ಮ ಮಗು ಒಂದು ವರ್ಷದೊಳಗಿದ್ದರೆ ಮಗುವಿನ ತೂಕ ಹೆಚ್ಚಾಗುತ್ತಿದೆಯೇ ಎಂಬುವುದನ್ನು ಗಮನಿಸಬೇಕಾಗಿರುವುದು ಅವಶ್ಯಕ.

ಮಗು ಹುಟ್ಟಿದ ಮೇಲೂ ದೊಡ್ಡ ಮಗುವಿಗೆ ಹಾಲುಣಿಸ ಬಯಸುವುದಾದರೆ ಕೊಡಬಹುದು, ಅದು ಆ ತಾಯಿಯ ವೈಯಕ್ತಿಕ ವಿಚಾರ. ಇಲ್ಲಿ ಬೇರೆಯವರು ಅಭಿಪ್ರಾಯ ಹೇಳಲು ಅವಕಾಶ ಕೊಡಬೇಡಿ.