ಡೇ ಸ್ಪೆಷಲ್‌: ಹೊಲಿಗೆ ಯಂತ್ರದ ದಿನ

ಬಟ್ಟೆ ಮತ್ತು ಇನ್ನಿತರ ಹಲವು ಬಗೆಯ ವಸ್ತುಗಳನ್ನು ಹೊಲಿಯಲು ಬಳಸುವ ಹೊಲಿಗೆ ಯಂತ್ರದ ಆವಿಷ್ಕಾರವನ್ನು ಗೌರವಿಸುವ ಸಲುವಾಗಿ ಪ್ರತಿವರ್ಷ ಜೂನ್‌ 13ರಂದು ಅಮೆರಿಕ ಸೇರಿದಂತೆ ವಿಶ್ವದ ಹಲವು ಭಾಗಗಳಲ್ಲಿ ಹೊಲಿಗೆ ಯಂತ್ರದ ದಿನವನ್ನು ಆಚರಿಸಲಾಗುತ್ತದೆ. ಪರಿಣತ ಕ್ಯಾಬಿನೆಟ್‌ ತಯಾರಕ ಮತ್ತು ಸಂಶೋಧಕ ಥಾಮಸ್‌ ಸೇಂಟ್‌ 1790ರಲ್ಲಿ ಲೆದರ್‌ ಮತ್ತು ಕ್ಯಾನ್ವಾಸ್‌ ಹೊಲಿಯುವ ಉದ್ದೇಶಕ್ಕಾಗಿ ಹೊಲಿಗೆ ಯಂತ್ರದ ವಿನ್ಯಾಸಕ್ಕೆ ಮೊದಲ ಪೇಟೆಂಟ್‌ ಪಡೆದರು ಎನ್ನಲಾಗಿದೆ.

ಹೊಲಿಗೆ ಯಂತ್ರ ಬೆಳಕಿಗೆ ಬಂದು ನೂರಾರು ವರ್ಷಗಳಾಗಿದೆ. ಕಾಲ ಬದಲಾದಂತೆ ಹೊಸ ಹೊಸ ಹೊಲಿಗೆ ಯಂತ್ರಗಳನ್ನು ಆವಿಷ್ಕರಿಸಲಾಗಿದೆ. ಇಂದು ಕೈಗಾರಿಕೆಯಲ್ಲಿ ಸುಮಾರು ಎರಡು ಸಾವಿರ ಬಗೆಯ ಹೊಲಿಗೆಯಂತ್ರಗಳು ಬಳಕೆಯಲ್ಲಿವೆ. ಬಟ್ಟೆ ಹರಿದರೂ ಹೊಲಿಗೆ ಬಿಡದಂಥ, ನಿಮಿಷಕ್ಕೆ 5ಸಾವಿರಕ್ಕೂ ಹೆಚ್ಚು ಹೊಲಿಗೆಗಳನ್ನು ಹಾಕುವ ಯಂತ್ರಗಳಿವೆ. ಮನೆಗಳಲ್ಲಿ ಬಳಸುವ ಯಂತ್ರ ನಿಮಿಷಕ್ಕೆ 1.500 ಹೊಲಿಗೆಗಳನ್ನು ಹಾಕುತ್ತದೆ. ಉಕ್ಕಿನ ತಂತಿಯನ್ನೇ ದಾರದಂತೆ ಬಳಸುವ ಹೊಲಿಗೆ ಯಂತ್ರಗಳಿವೆ. ಮನಮೋಹಕ ಕಸೂತಿ ಕೆಲಸಗಳೂ ಇದರಲ್ಲಿ ಸುಲಭವಾಗುತ್ತದೆ. ಇಂದಿಗೂ ಎಷ್ಟೋ ಮನೆಗಳಲ್ಲಿ ಹೊಲಿಗೆ ಯಂತ್ರಗಳಿವೆ. ಹಲವು ಬಗೆಯ, ಹಲವು ವಿನ್ಯಾಸದ , ಹಲವು ಬಣ್ಣದ ಸುಂದರ ಹೊಲಿಗೆಯಂತ್ರಗಳು ಇಂದು ಮಾರುಕಟ್ಟೆಯಲ್ಲಿ ಲಭ್ಯ. ಬಟ್ಟೆಗಳಿಗೆ ತೇಪೆ ಹಾಕುವ, ಅಂಚುಕಟ್ಟುವ, ಬಟ್ಟೆ ರಿಪೇರಿ ಮಾಡುವ, ಗುಂಡಿ ಹಾಕುವ, ತಾನಾಗಿಯೇ ಬಟ್ಟೆ ಮಡಿಸುವ, ನೆರಿಗೆ ಕೊಟ್ಟು ಹೊಲಿಯುವ, ಪುಸ್ತಕ, ಪರ್ಸ್‌, ಹಾಸಿಗೆ, ಹ್ಯಾಟ್‌, ಕಾಲ್ಚೀಲ, ಕೈಗವಸು, ಛತ್ರಿಗಳನ್ನು ಹೊಲಿಯುವ ವಿಶೇಷ ಬಗೆಯ ಹೊಲಿಗೆ ಯಂತ್ರಗಳಿವೆ. ವಿದೇಶಗಳಲ್ಲಿ ಪೊರಕೆ ಹೊಲಿಯುವುದಕ್ಕೂ ಯಂತ್ರವಿದೆ. ಹೊಲಿಗೆ ಯಂತ್ರದ ಉಪಯೋಗ ಹಲವು. ಹಾಗಾಗಿ ವಿಶ್ವದಾದ್ಯಂತ ಹೊಲಿಗೆ ಯಂತ್ರದ ಉದ್ಯಮ ಬೃಹತ್ತಾಗಿ ಬೆಳೆದಿದೆ. ಎಷ್ಟೋ ಜನರ ಜೀವನಾಧರವಾಗಿದೆ.