ಡೇ ಸ್ಪೆಷಲ್‌: ಚಾಕೊಲೇಟ್‌ ಐಸ್‌ಕ್ರೀಮ್‌ ಡೇ

ಐಸ್‌ಕ್ರೀಮ್‌ ಎಂದರೆ ಯಾರಿಗೆ ತಾನೆ ಇಷ್ಟವಿರುವುದಿಲ್ಲ ಹೇಳಿ. ಚಿಕ್ಕ ಮಕ್ಕಳಿಂದ ಹಿಡಿದು ದೊಡ್ಡವರಿಗು ಸಹ ಐಸ್‌ಕ್ರೀಮ್‌ ಎಂದರೆ ಬಹಳ ಇಷ್ಟ. ಐಸ್‌ಕ್ರೀಮ್‌ಗಳಲ್ಲಿ ಹಲವಾರು ಫ್ಲೇವರ್ಸ್‌ಗಳಿವೆ. ವೆನ್ನಿಲ್ಲಾ ಐಸ್‌ಕ್ರೀಮ್‌ ನಂತರ ಹೆಚ್ಚು ಜನಪ್ರಿಯ ಹಾಗೂ ಬೇಡಿಕೆ ಇರುವ ಐಸ್‌ಕ್ರೀಮ್‌ ಎಂದರೆ ಚಾಕೊಲೇಟ್‌ ಐಸ್‌ಕ್ರಿಮ್‌. ಚಾಕೊಲೇಟ್‌ ಐಸ್‌ಕ್ರೀಮ್‌ ನೂರು ವರ್ಷಗಳಿಗೂ ಹೆಚ್ಚು ಕಾಲ ಅಸ್ತಿತ್ವದಲ್ಲಿದೆ ಹಾಗೂ 19ನೇ ಶತಮಾನದ ಉತ್ತರಾರ್ಧದಲ್ಲಿ ಇದಕ್ಕೆ ಅಮೆರಿಕದಲ್ಲಿ ಹೆಚ್ಚು ಬೇಡಿಕೆಯಿತ್ತು ಎಂದು ಹೇಳಲಾಗಿದೆ.

ಜಗತ್ತಿನಾದ್ಯಂತ ಚಾಕೊಲೇಟ್‌ ಐಸ್‌ಕ್ರೀಮ್‌ ಅಭಿಮಾನಿಗಳು ಸಾಕಷ್ಟು ಮಂದಿ ಇದ್ದಾರೆ. ಹಾಗಾಗಿ ಪ್ರತಿವರ್ಷ ಜೂನ್‌ 7ರಂದು ಅಮೆರಿಕ ಸೇರಿದಂತೆ ವಿಶ್ವದ ನಾನಾ ಭಾಗಗಳಲ್ಲಿ ಚಾಕೊಲೇಟ್‌ ಐಸ್‌ಕ್ರೀಮ್‌ ಡೇ ಸೆಲಬ್ರೇಟ್‌ ಮಾಡಲಾಗುತ್ತದೆ. ಚಾಕೊಲೇಟ್‌ ಐಸ್‌ಕ್ರೀಮ್‌ ಡೇಯ ಸೃಷ್ಟಿಕರ್ತರು ಯಾರೆಂದು ಈವರೆಗೂ ತಿಳಿದು ಬಂದಿಲ್ಲ. ಆದರೆ ಚಾಕೊಲೇಟ್‌ ಐಸ್‌ಕ್ರೀಮ್‌ ಪ್ರಿಯರು ಈ ದಿನವನ್ನು ಸೃಷ್ಟಿಸಿದರು ಎಂದು ಹೇಳಲಾಗಿದೆ.

ಮೊಟ್ಟೆ, ಕ್ರೀಮ್‌, ವೆನಿಲಾ ಮತ್ತು ಸಕ್ಕರೆಯೊಂದಿಗೆ ಕೋಕೋ ಪೌಡರ್‌ಅನ್ನು ಮಿಕ್ಸ್‌ಮಾಡಿ ಚಾಕೊಲೇಟ್‌ ಐಸ್‌ಕ್ರೀಮ್‌ ತಯಾರಿಸಲಾಗತ್ತದೆ. ಕೋಕೋ ಪೌಡರ್‌ ಐಸ್‌ಕ್ರೀಮ್‌ಗೆ ಕಂದು ಬಣ್ಣವನ್ನು ನೀಡುತ್ತದೆ. ಮೊಟ್ಟ ಮೊದಲ ಹೆಪ್ಪು ಗಟ್ಟಿದ ಚಾಕೊಲೇಟ್‌ ಪಾಕವಿಧಾನವನ್ನು 1693ರಲ್ಲಿ ಇಟಲಿಯ ನೇಪಲ್ಸ್‌ನ ಆಂಟೋನಿಯೊ ಲ್ಯಾಟಿನ್‌ನ ದಿ ಮಾರ್ಡನ್‌ ಸ್ಟೀವರ್ಡ್‌ನಲ್ಲಿ ಪ್ರಕಟಿಸಲಾಯಿತು. ಚಾಕೊಲೇಟ್‌ ಐಸ್‌ಕ್ರೀಮ್‌ಗಳಲ್ಲಿ ಕೋನ್‌, ಕಪ್‌, ಕ್ಯಾಂಡಿ ಮುಂತಾದ ವಿಧದ ಬಗೆಯ ಐಸ್‌ಕ್ರೀಮ್‌ಗಳಿವೆ. ಈ ದಿನವನ್ನು ಕೆಲವರು ಮನೆಯಲ್ಲೇ ಚಾಕೊಲೇಟ್‌ ಐಸ್‌ಕ್ರೀಮ್‌ ತಯಾರಿಸಿ ಬಂಧುಗಳು, ಸ್ನೇಹಿತರೊಂದಿಗೆ ಸವಿದು ಸೆಲಬ್ರೇಟ್‌ ಮಾಡುತ್ತಾರೆ.