ಡೇ ಸ್ಪೆಷಲ್‌: ಹೈ ಫೈವ್‌ ಡೇ

ಇತ್ತೀಚಿನ ದಿನಗಳ ಟ್ರೆಂಡ್‌ಗಳಲ್ಲಿ ಹೈ ಫೈವ್‌ ಕೂಡ ಒಂದು. ಇದು ಯುವಕರ ಅಚ್ಚುಮೆಚ್ಚು. ಪ್ರತಿದಿನ ನಡೆಯುವ ಗಮನಾರ್ಹ ಸನ್ನಿವೇಶಗಳನ್ನು, ಸಣ್ಣ ಸಣ್ಣ ಜೋಕ್ಸ್‌, ತರ್ಲೆ ವಿಷಯಗಳನ್ನು ಆಚರಿಸಲು ಹಾಗೂ ಒಬ್ಬರಿಗೊಬ್ಬರು ಭೇಟಿಯಾದಾಗ ಹೈ ಫೈವ್‌ ಮಾಡುತ್ತಾರೆ. ಚಿಕ್ಕಮಕ್ಕಳು ಸಹ ಚಪ್ಪಾಳೆಗಿಂತ ಹೈ ಫೈವ್‌ ಮಾಡುವುದನ್ನು ಬೇಗ ಕಲಿಯುತ್ತಾರೆ. ಹೈ ಫೈ ಮಾಡುವುದು ಜಗತ್ಪ್ರಸಿದ್ಧವಾಗಿದೆ ಹಾಗಾಗಿ ಇದಕ್ಕಾಗಿಯೇ ಒಂದು ದಿನ ಮೀಸಲಿಡಲಾಗಿದೆ. ಪ್ರತಿ ವರ್ಷ ಏಪ್ರಿಲ್‌ 19 ರಂದು ಅಮೆರಿಕ ಸೇರಿದಂತೆ ವಿಶ್ವದ ನಾನಾ ಭಾಗಗಳಲ್ಲಿ ಹೈ ಫೈವ್‌ ಡೇ ಅನ್ನು ಮೋಜಿನ ದಿನವಾಗಿ ಸೆಲೆಬ್ರೇಟ್‌ ಮಾಡಲಾಗುತ್ತದೆ.

ಹೈ ಫೈ ಮಾಡುವುದನ್ನು ಕ್ರೀಡೆಗಳಲ್ಲಿ ಹೆಚ್ಚಾಗಿ ಕಾಣಬಹುದು. ಬೌಲರ್‌ ಒಬ್ಬ ವಿಕೆಟ್‌ ತೆಗೆದಾಗ ತಂಡದ ಇತರ ಆಟಗಾರರು ಹೈ ಫೈ ಮಾಡುವ ಮೂಲಕ ಸಂಭ್ರವವನ್ನು ಆಚರಿಸುತ್ತಾರೆ. ಇತ್ತೀಚಿನ ದಿನಗಳಲ್ಲಿ ಹೈ ಫೈವ್‌ ಮಾಡುವುದು ಫ್ಯಾಷನ್‌ ಎಂದೇ ಪರಿಗಣಿಸಲಾಗಿದೆ. ಹೈ ಫೈವ್‌ ಅನ್ನು ಗೀವ್‌ ಮಿ ಫೈವ್‌, ಅಪ್‌ ಹೈ ಎಂಥಲೂ ಕರೆಯಲಾಗುತ್ತದೆ. ಹೈ ಫೈವ್‌ ಅನ್ನು ಡಸ್ಟಿ ಬೇಕರ್‌ ಮತ್ತು ಗ್ಲೆನ್‌ ಬರ್ಕ್‌ ಅವರು 1977 ರಲ್ಲಿ ಕಂಡುಹಿಡಿದರು. ಇವರು ಲಾಸ್‌ ಏಂಜಲೀಸ್‌ ಡಾಡ್ಜರ್ಸ್‌ ತಂಡದ ಬೇಸ್‌ಬಾಲ್‌ ಕ್ರೀಡಾ ಸದಸ್ಯರು. ಇವರು ಅಕ್ಟೋಬರ್‌ 2 ರಂದು ನಡೆದ ಬೇಸ್‌ ಬಾಲ್‌ ಪಂದ್ಯದ ಯಶಸ್ಸನ್ನು ಆಚರಿಸುತ್ತಿರುವ ವೇಳೆ ಒಬ್ಬರಿಗೊಬ್ಬರು ತಮ್ಮ ಎರಡೂ ಕೈಗಳ ಐದು ಬೆರಳುಗಳನ್ನು ಪರಸ್ಪರ ತಟ್ಟಿಕೊಂಡು ಆಚರಿಸಿದರು. ನಂತರ 2002ರಲ್ಲಿ, ವರ್ಜೀನಿಯಾ ವಿಶ್ವವಿದ್ಯಾಲಯದ ಕಾಲೇಜು ವಿದ್ಯಾರ್ಥಿಗಳು ಹೈ ಫೈವ್‌ ಡೇ ಅನ್ನು ರಚಿಸಿದರು.