ಡೇ ಸ್ಪೆಷಲ್‌: ಜಂಕ್‌ ಫುಡ್‌ ಡೇ

ಅತಿಯಾದ ಕೊಬ್ಬಿನಂಶ, ಸಕ್ಕರೆ, ಉಪ್ಪು ಮತ್ತು ಕ್ಯಾಲೋರಿ ಇರುವ ಪದಾರ್ಥಗಳನ್ನು ಜಂಕ್‌ ಫುಡ್‌ ಎನ್ನಲಾಗುತ್ತದೆ. ಜಂಕ್‌ಫುಡ್‌ಗಳ ಅತಿಯಾದ ಸೇವನೆ ಆರೋಗ್ಯಕ್ಕೆ ಹಾನಿಕಾರಕ. ಇಂಥ ಆಹಾರಗಳನ್ನು ಪ್ರತಿದಿನ ತಿನ್ನಲು ಆಗುವುದಿಲ್ಲ. ಹಾಗಾಗಿ ಜಂಕ್‌ಫುಡ್‌ಗಳನ್ನು ಅತಿಯಾಗಿ ಇಷ್ಟಪಡುವ ಜನರಿಗಾಗಿಯೇ ಜಂಕ್‌ ಫುಡ್‌ ದಿನವನ್ನು ಮೀಸಲಿಡಲಾಗಿದೆ. ಪ್ರತಿವರ್ಷ ಜುಲೈ 21ರಂದು ಅಮೆರಿಕ ಮತ್ತು ಇತರ ದೇಶಗಳಲ್ಲಿ ಜಂಕ್‌ಫುಡ್‌ ಡೇ ಸೆಲಬ್ರೇಟ್‌ ಮಾಡಲಾಗುತ್ತದೆ. ಇಂದು ಜಂಕ್‌ಫುಡ್‌ ಪ್ರಿಯರು ತಮಗೆ ಇಷ್ಟವಾದ ಜಂಕ್‌ಫುಡ್‌ಗಳನ್ನು ಬೆಳಗ್ಗೆ ಬ್ರೇಕ್‌ಫಾಸ್ಟ್‌, ಮಧ್ಯಾಹ್ನದ ಲಂಚ್‌ ಮತ್ತು ರಾತ್ರಿಯ ಡಿನ್ನರ್‌ಗೆ ಸವಿದು ಮರುದಿನ ಡಯಟ್‌ ಮಾಡಲಿ ಎಂದು ಈ ದಿನವನ್ನು ಸೃಷ್ಟಿಸಲಾಗಿದೆ. ಈ ದಿನದ ಸೃಷ್ಟಿಕರ್ತರು ಯಾರೆಂದು ತಿಳಿದಿಲ್ಲ. ಆದರೆ ಜಂಕ್‌ಫುಡ್‌ಗಳನ್ನು ಅತಿಗಾಗಿ ಪ್ರೀತಿಸುವವರು ಈ ದಿನವನ್ನು ಸ್ಥಾಪಿಸಿದ್ದಾರೆ ಎಂದು ಹೇಳಲಾಗಿದೆ.

1800ರ ದಶಕದ ಅಂತ್ಯದಲ್ಲಿ ಪ್ಯಾಕ್‌ ಮಾಡಲಾದ ಆಹಾರಗಳ ಆಗಮನ ಅಮೆರಿಕ ಜನರ ಆಹಾರ ಶೈಲಿಯನ್ನೇ ಬದಲಾಯಿಸಿತು. 2ನೇ ಜಾಗತಿಕ ಯುದ್ಧದ ನಂತರ ಜಂಕ್‌ಫುಡ್‌ಗಳ ಉದ್ಯಮ ದೊಡ್ಡ ಪ್ರಮಾಣದಲ್ಲಿ ಬೆಳೆಯಿತು. ಫ್ರೋಜನ್‌ ಮತ್ತು ಫಾಸ್ಟ್‌ ಫುಡ್‌ಗಳ ಉತ್ಪನ್ನ ಗಣನೀಯವಾಗಿ ಏರಿತು. 1970ರ ಹೊತ್ತಿಗೆ ಜಂಕ್‌ಫುಡ್‌ ಆಹಾರಗಳಿಗೆ ಹೆಸರು ಬಂತು. ಇದನ್ನು ಅಮೆರಿಕನ್ನರು ಅಪಾಯಕಾರಿ ಪ್ರಮಾಣದಲ್ಲಿ ಸೇವಿಸುತ್ತಿದ್ದರು. ಜಂಕ್‌ಫುಡ್‌ಗಳನ್ನು ಪರೀಕ್ಷಿಸಿದ ಆಹಾರ ತಜ್ಞರು ಇದರ ಅತಿಯಾದ ಸೇವನೆ ಆರೋಗ್ಯಕ್ಕೆ ಹಾನಿಕಾರಕ ಎಂದು ತಿಳಿಸಿದರು. ಅತಿಯಾದ ಸಕ್ಕರೆ , ಉಪ್ಪು, ಖಾರ, ಕೊಬ್ಬಿನಂಶ ಇರುವ ಬರ್ಗರ್‌, ಪಿಜ್ಜಾ, ಚಿಫ್ಸ್‌, ಫ್ರೆಂಚ್‌ ಫೈಸ್‌, ಎಣ್ಣೆಯಲ್ಲಿ ಕರಿದ ಪದಾರ್ಥಗಳು, ಐಸ್‌ಕ್ರೀಮ್‌, ಡೋನಟ್‌ನಂಥ ಪದಾರ್ಥಗಳನ್ನು ಮಿತವಾಗಿ ಸೇವಿಸುವುದು ಕ್ಷೇಮ ಎನ್ನುತ್ತಾರೆ ತಜ್ಞರು.