ಡೇ ಸ್ಪೆಷಲ್‌: ನೆಲ್ಸನ್‌ ಮಂಡೇಲ ಇಂಟರ್‌ನ್ಯಾಷನಲ್‌ ಡೇ

ದಕ್ಷಿಣ ಆಫ್ರಿಕಾದ ಗಾಂಧಿ ಎಂದೇ ಪ್ರಸಿದ್ಧರಾಗಿದ್ದ ನೆಲ್ಸನ್‌ ಮಂಡೇಲ ಅವರ 100ನೇ ವರ್ಷದ ಜನ್ಮದಿನವನ್ನು ಇಂದು ವಿಶ್ವದಾದ್ಯಂತ ಆಚರಿಸಲಾಗುತ್ತದೆ. ಶಾಂತಿ, ವರ್ಣಭೇದ ನೀತಿ, ಪ್ರಜಾಪ್ರಭುತ್ವ, ಸ್ವಾತಂತ್ರ್ಯ, ಸಮಾನತೆ, ವೈವಿಧ್ಯತೆ, ಸಾಮರಸ್ಯಕ್ಕೆ ಮಂಡೇಲ ಅವರು ನೀಡಿದ ಕೊಡುಗೆಯನ್ನು ನೆನಪಿಸುವುದು ಹಾಗೂ ಇಂಥ ಉತ್ತಮ ಮೌಲ್ಯಗಳನ್ನು ಅಳವಡಿಸಿಕೊಳ್ಳಲು ಜನರನ್ನು ಪ್ರೇರೇಪಿಸುವುದು ಈ ದಿನದ ಆಶಯವಾಗಿದೆ.

ನೆಲ್ಸನ್‌ ಮಂಡೇಲ ಜುಲೈ 18, 1918ರಲ್ಲಿ ದಕ್ಷಿಣ ಆಫ್ರಿಕಾದ ಟ್ರಾನ್‌ ಸ್ಕೈನಲ್ಲಿ ಜನಿಸಿದರು. ದಕ್ಷಿಣ ಆಫ್ರಿಕಾದಲ್ಲಿ ವರ್ಣಭೇದ ನೀತಿ ವಿರುದ್ಧ ಹೋರಾಡಿ ಕಪ್ಪು ಜನಾಂಗದವರನ್ನು ಮುಖ್ಯವಾಹಿನಿಗೆ ತಂದು ನಿಲ್ಲಿಸುವಲ್ಲಿ ಯಶಸ್ಸಿಯಾದರು. ಇದಕ್ಕಾಗಿ ಅವರು ಜೈಲುವಾಸವನ್ನು ಅನುಭವಿಸಿದರು. ಕಪ್ಪು ಜನಾಂಗದ ಮೊದಲ ಅಧ್ಯಕ್ಷರಾಗಿ ನೊಬೆಲ್‌ ಶಾಂತಿ ಪ್ರಶಸ್ತಿ ಪಡೆದ ನೆಲ್ಸನ್‌ ಮಂಡೇಲ ಆ ಜನಾಂಗದವರ ಪಾಲಿನ ಪಿತಾಮಹರೆನಿಸಿದ್ದಾರೆ. ಕಪ್ಪುಜನರ ಸ್ವಾತಂತ್ರ್ಯಕ್ಕಾಗಿ ಹೋರಾಡಿದ ಅವರಿಗೆ 250ಕ್ಕೂ ಹೆಚ್ಚು ಪ್ರಶಸ್ತಿಗಳು ದೊರತಿವೆ. ಅವರು ಅನೇಕ ಪುಸ್ತಕಗಳನ್ನು ಬರೆದಿದ್ದಾರೆ. ಅವರ ವರ್ಣಭೇದ ನೀತಿ ವಿರುದ್ಧ ಹೋರಾಟವನ್ನು ಗುರುತಿಸಿ 1990ರಲ್ಲಿ ಭಾರತ ಅವರಿಗೆ ಭಾರತ ರತ್ನ ಪ್ರಶಸ್ತಿ ನೀಡಿ ಗೌರವಿಸಿತು. 2009ರಲ್ಲಿ ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯಲ್ಲಿ ನೆಲ್ಸನ್‌ ಮಂಡೇಲ ಅವರು ಹುಟ್ಟಿದ ದಿನವಾದ ಜುಲೈ 18ಅನ್ನು ನೆಲ್ಸನ್‌ ಮಂಡೇಲ ಇಂಟರ್‌ ನ್ಯಾಷನಲ್‌ ಡೇಯನ್ನಾಗಿ ಆಚರಿಸಬೇಕೆಂದು ಘೋಷಿಸಲಾಯಿತು. 2010 ಜುಲೈ 18ರಂದು ವಿಶ್ವಸಂಸ್ಥೆ ಮೊದಲ ಬಾರಿಗೆ ಈ ದಿನವನ್ನು ಆಚರಿಸಿತು.

ಎಲ್ಲರಿಗೂ ಸಾಮಾಜಿಕ ನ್ಯಾಯ ದೊರಕಿಸುವ ಸಲುವಾಗಿ ಬಡತನದ ವಿರುದ್ಧ ಹೋರಾಡಿದ ನೆಲ್ಸನ್‌ ಮಂಡೇಲ ಅವರ ಈ ವರ್ಷದ ಆಚರಣೆಯನ್ನು ಬಡತನದ ವಿರುದ್ಧ ಹೋರಾಟಕ್ಕೆ ಅರ್ಪಿಸಲಾಗಿದೆ ಎಂದು ನೆಲ್ಸನ್‌ ಮಂಡೇಲ ಫೌಂಡೇಷನ್‌ ಹೇಳಿದೆ. ಮಂಡೇಲ ಅವರು 2013 ಡಿಸೆಂಬರ್‌ 5 ರಂದು ನಿಧನರಾದರು.