ಮನೆಯ ಪ್ರತಿ ಮೂಲೆಯೂ ಸ್ವಚ್ಛವಾಗಿರಲಿ..

ಮನೆಯನ್ನು ಸ್ವಚ್ಛಗೊಳಿಸುವಾಗ ಮೇಲ್ನೋಟಕ್ಕೆ ಏನೇನೂ ಕಾಣುತ್ತದೋ ಅದರತ್ತ ಮಾತ್ರ ಬಹುತೇಕರು ಗಮನ ಹರಿಸುತ್ತಾರೆ. ಆದರೆ ಮೂಲೆ ಮೂಲೆಯನ್ನೂ ಗಮನವಿಟ್ಟು ಶುಚಿಗೊಳಿಸಬೇಕು. ಇಲ್ಲವಾದರೆ, ಬ್ಯಾಕ್ಟೀರಿಯಾಗಳು ಬೆಳೆದು ರೋಗಗಳ ಆವಾಸ ಸ್ಥಾನ ಆಗಬಹುದು.

ನಾವೇನೋ ಮನೆಯನ್ನು ಪೂರ್ತಿ ಸ್ವಚ್ಛ ಮಾಡಿದ್ದೇವೆ ಎಂದುಕೊಳ್ಳುತ್ತೇವೆ ನಿಜ. ಆದರೆ ನಮಗೆ ಅರಿವಿಲ್ಲದೆ ಕೊಳೆ ಉಳಿದು ಕೊಳ್ಳುವ ಹಲವಾರು ಜಾಗಗಳಿರುತ್ತವೆ. ಅವುಗಳಲ್ಲಿ ಐದು ಪ್ರಮುಖ ಜಾಗಗಳ ಬಗ್ಗೆ ಇಲ್ಲಿದೆ ಮಾಹಿತಿ. ಅದನ್ನು ಶುಚಿಯಾಗಿಟ್ಟುಕೊಂಡರೆ ಮಾತ್ರ ಇಡೀ ಮನೆ ಕ್ಲೀನ್‌ ಆಗಿದೆ ಎಂದು ಅರ್ಥ.

ಲೈಟ್‌ ಸ್ವಿಚ್‌: ನಿವಾಸವನ್ನು ಸ್ವಚ್ಛ ಮಾಡುತ್ತಿರುವಾಗ ಕೊನೆಯ ಬಾರಿ ಲೈಟ್‌ ಸ್ವಿಚ್‌ನ್ನು ಯಾವಾಗ ಶುಚಿಗೊಳಿಸಿದ್ದೀರಿ ಎಂದು ಜ್ಞಾಪಿಸಿಕೊಳ್ಳಿ. ಸಾಮಾನ್ಯವಾಗಿ ಪ್ರತಿಯೊಬ್ಬರೂ ಇದನ್ನು ನಿರ್ಲಕ್ಷಿಸುತ್ತಾರೆ. ಇದು ಕೂಡ ಕೀಟಾಣುಗಳ ಆವಾಸ ಸ್ಥಾನವಾಗಿ ಸಾಮಾನ್ಯ ನೆಗಡಿಯನ್ನು ಹರಡುವ ಮೂಲವಾಗಿ ಬದಲಾಗುತ್ತದೆ. ಆದ್ದರಿಂದ ಕೀಟನಾಶಕಗಳ ಬಳಸಿ ಈ ಸ್ವಿಚ್‌ಗಳನ್ನು ಕೂಡ ಶುಚಿಗೊಳಿಸಬೇಕು.

ಕಿಚನ್‌ ರಗ್‌: ಅಡುಗೆ ಪಾತ್ರೆಗಳು, ಕೌಂಟರ್‌ ಸ್ವಚ್ಛಗೊಳಿಸಲು ಉಪಯೋಗಿಸುವ ಸ್ಪಾಂಜು ಮತ್ತು ಕಿಚನ್‌ ರಗ್‌ನ್ನು ನಿಯಮಿತವಾಗಿ ತೊಳೆಯದಿದ್ದರೆ, ಅದು ಕೂಡ ಕೀಟ ಮತ್ತು ಬ್ಯಾಕ್ಟೀರಿಯಾಗಳ ಉತ್ಪಾದನೆಗೆ ಕಾರಣವಾಗುತ್ತದೆ. ಆದ್ದರಿಂದ ಕನಿಷ್ಠ 15 ದಿನಗಳಿಗೊಮ್ಮೆಯಾದರೂ ಪ್ರತ್ಯೇಕವಾಗಿ ಕೀಟನಾಶಕವನ್ನು ಬಕೆಟ್‌ ನೀರಿಗೆ ಹಾಕಿ ಅದರಲ್ಲಿ ಇವುಗಳನ್ನು ತೊಳೆಯಲೇಬೇಕು.

ಟ್ಯಾಪ್‌ ಮತ್ತು ಫಿಟ್ಟಿಂಗ್‌: ನಲ್ಲಿ ಮತ್ತು ಫಿಟ್ಟಿಂಗ್‌ಗಳ ಬಗ್ಗೆಯೂ ಯಾವಾಗಲೂ ಗಮನ ನೀಡಲೇಬೇಕು. ಕೇವಲ ದಿನ ಪೂರ್ತಿ ಅದರ ಮೇಲೆ ಆಗಾಗ ನೀರು ಚೆಲ್ಲುವುದರಿಂದ ಮಾತ್ರ ಅವುಗಳು ಕೀಟರಹಿತವಾಗಿ ಉಳಿಯುಯವುದಿಲ್ಲ. ಇವುಗಳಲ್ಲಿ ಕೂಡ ಬ್ಯಾಕ್ಟೀರಿಯಾ ಬೆಳೆಯುವುದನ್ನು ತಡೆಯಲು ನಿಯಮಿತವಾಗಿ ಶುಚಿಗೊಳಿಸಬೇಕು.

ಕಿಚನ್‌ ಸಿಂಕ್‌: ಅಧ್ಯಯನಗಳ ಪ್ರಕಾರ ಟಾಯ್ಲೆಟ್‌ ಸೀಟಿನಷ್ಟೇ ಪ್ರಮಾಣದಲ್ಲಿ ಇ-ಕೂಲಿ ಕಿಚನ್‌ ಸಿಂಕ್‌ನಲ್ಲೂ ಬೆಳೆಯುತ್ತವೆ. ಉಳಿದ ಆಹಾರದ ತುಣುಕುಗಳು, ಅಡುಗೆ ಸಾಮಗ್ರಿಗಳು ಮತ್ತು ನೀರು ಬ್ಯಾಕ್ಟೀರಿಯಾ ಬೆಳವಣಿಗೆಗೆ ಸಿಂಕ್‌ ಪೂರಕ ವಾತಾವರಣ ನಿರ್ಮಿಸುವಂತೆ ಮಾಡುತ್ತದೆ. ಆದ್ದರಿಂದ ದಿನ ನಿತ್ಯ ಸಿಂಕ್‌ನ್ನು ತೊಳೆದು ರೋಗರಹಿತಗೊಳಿಸಿಕೊಳ್ಳಬೇಕು.

ರಗ್‌ ಮತ್ತು ಕುಶನ್‌: ರಗ್‌ನಲ್ಲಿ ಸೇರಿಕೊಳ್ಳುವ ಚಿಕ್ಕ ಚಿಕ್ಕ ದೂಳಿನ ಕಣಗಳನ್ನು ಶುಚಿಗೊಳಿಸುವುದು ಅಷ್ಟೇನೂ ಸುಲಭವಲ್ಲ. ದಿನ ನಿತ್ಯ ದೂಳು ಸೇರಿಕೊಳ್ಳುತ್ತಲೇ ಇರುತ್ತದೆ. ಇವುಗಳು ಕಣ್ಣಿಗೆ ಕಾಣದಿದ್ದರೂ ಹಾಗೆಯೇ ಬಿಡಲೇಬಾರದು. ಇದಕ್ಕಾಗಿ ದಿನ ಬಿಟ್ಟು ದಿನ ಅವುಗಳನ್ನು ಕೊಡವಿ ಅಥವಾ ವ್ಯಾಕ್ಯೂಮ್‌ ಕ್ಲೀನರ್‌ನಿಂದ ಶುಚಿಗೊಳಿಸಬೇಕು. ಆಗ ಕಾಣಸಿಗುವ ದೂಳನ್ನು ನೋಡಿ ನಿಮಗೇ ಆಶ್ಚರ್ಯವಾಗಬಹುದು. ಒಟ್ಟಿನಲ್ಲಿ ಸಾಮಾನ್ಯವಾಗಿ ನಿರ್ಲಕ್ಷ್ಯಕ್ಕೆ ಈಡಾಗುವ ಮನೆಯಲ್ಲಿರುವ ಐದು ವಸ್ತುಗಳಲ್ಲಿ ಕೊಳೆ ಸೇರಿಕೊಳ್ಳದಂತೆ ಮಾಡಿ ಆರೋಗ್ಯ ಕಾಪಾಡಿಕೊಳ್ಳಿ.