ಕಿಚನ್‌ ಕೇರ್‌: ಕಿಚನ್‌ ಫ್ರೆಂಡ್ಲಿ ಬೇಕಿಂಗ್‌ ಸೋಡಾ

-ಗ್ಯಾಸ್‌ ಸ್ಟವ್‌ ತುಂಬಾ ಜಿಡ್ಡಿನಿಂದ ಕೂಡಿದ್ದರೆ ಅದನ್ನು ಉಜ್ಜಲು ಸಾಕಷ್ಟು ಸಮಯಬೇಕಾಗುತ್ತದೆ. ಬೇಕಿಂಗ್‌ ಸೋಡಾವನ್ನು ಗ್ಯಾಸ್‌ ಸ್ಟವ್‌ ಮೇಲೆ ಚೆನ್ನಾಗಿ ಉದುರಿಸಿ ಎಲ್ಲಾ ಕಡೆ ಸವರಿ. ನಂತರ ಒಂದು ಗಟ್ಟಿಯಾದ ಬಟ್ಟೆಯನ್ನು ನೀರಲ್ಲಿ ಅದ್ದಿ ಚೆನ್ನಾಗಿ ಹಿಂಡಿ. ಆ ಬಟ್ಟೆಯಿಂದ ಗ್ಯಾಸ್‌ಸ್ಟವ್‌ ಒರೆಸಿದರೆ ಜಿಡ್ಡು ಸುಲಭವಾಗಿ ಹೋಗುತ್ತದೆ.

-ಬಾಣಲೆ, ದೋಸೆ- ಚಪಾತಿ ಮಾಡುವ ತವಾ ಸದಾ ಬಳಸುವುದರಿಂದ ಅವು ಕಪ್ಪಗೆ ಕರೆ ಕಟ್ಟಿರುತ್ತವೆ. ಒಂದು ದೊಡ್ಡ ಪ್ಲಾಸ್ಟಿಕ್‌ ಟಬ್‌ನಲ್ಲಿ ನೀರು ತುಂಬಿಸಿ ಅದಕ್ಕೆ ಬೇಕಿಂಗ್‌ ಸೋಡಾ ಹಾಕಿ ಮಿಕ್ಸ್‌ ಮಾಡಿ. ಅದರಲ್ಲಿ ಕರೆಕಟ್ಟಿರುವ ಪಾತ್ರೆಗಳನ್ನು ನೆನೆಸಿ. ನಂತರ ಉಜ್ಜಿದರೆ ಪಾತ್ರೆಗಳು ಹೊಳೆಯುವುತ್ತವೆ.

-ಕಟ್ಟಿಂಗ್‌ ಬೋರ್ಡ್‌ನಲ್ಲಿ ತರಕಾರಿ, ಮಾಂಸ ಹಾಗೂ ಇನ್ನಿತರ ಪದಾರ್ಥಗಳನ್ನು ಕತ್ತರಿಸುವುದರಿಂದ ಅವುಗಳ ಕಲೆ ಹಾಗೂ ವಾಸನೆ ಬೋರ್ಡ್‌ನಲ್ಲಿ ಹಾಗೆ ಉಳಿದು ಕೊಂಡಿರುತ್ತದೆ. ಇದನ್ನು ನಿವಾರಿಸಲು ಬೋರ್ಡ್‌ ಮೇಲೆ ಬೇಕಿಂಗ್‌ ಸೋಡಾವನ್ನು ಉದರಿಸಿ ಎಲ್ಲಾ ಕಡೆ ಸವರಿ. ನಂತರ ಪಾತ್ರೆ ತೊಳೆಯುವ ಸ್ಕ್ರಬ್‌ನಿಂದ ಉಜ್ಜಿದರೆ ಕಲೆ, ವಾಸನೆ ಹೋಗುತ್ತವೆ.

-ಒಂದು ಬಟ್ಟಲಿಗೆ ನೀರು ಹಾಕಿ ಅದಕ್ಕೆ ಬೇಕಿಂಗ್‌ ಸೋಡಾ ಬೆರೆಸಿ. ಅದರಲ್ಲಿ ಬಟ್ಟೆಯನ್ನು ಅದ್ದಿ ಚೆನ್ನಾಗಿ ಹಿಂಡಿ. ಆ ಬಟ್ಟೆಯಿಂದ ಮೈಕ್ರೋ ಓವನ್‌ ಒರೆಸಿದರೆ ಓವನ್‌ನಲ್ಲಿರುವ ವಾಸನೆ, ಜಿಡ್ಡು ಎಲ್ಲಾ ಹೋಗುತ್ತದೆ.

-ಕಾಫಿ, ಚಹಾ ಕುಡಿಯುವ ಪಿಂಗಾಣಿ, ಸೆರಾಮಿಕ್‌ ಕಪ್‌ಗಳು ಕಾಫಿ, ಚಹಾದಿಂದ ಕಲೆಯಾಗಿದ್ದರೆ ಕಪ್‌ಗಳಿಗೆ ಬೇಕಿಂಡ್‌ ಸೋಡಾ ಹಾಕಿ ಪಾತ್ರೆ ತೊಳೆಯುವ ಸ್ಕ್ರಬ್‌ನಿಂದ ಉಜ್ಜಿದರೆ ಕಲೆ ನಿವಾರಣೆಯಾಗುತ್ತದೆ. -ಈರುಳ್ಳಿ, ಬೆಳ್ಳುಳ್ಳಿ ಹೆಚ್ಚಿ ಕೈಗಳು ವಾಸನೆ ಬರುತ್ತಿದ್ದರೆ. ಕೈಗಳಿಗೆ ಬೇಕಿಂಗ್‌ ಸೋಡಾ ಹಾಕಿ ಸವರಿ. ನಂತರ ನೀರಿನಿಂದ ತೊಳೆಯುವುದರಿಂದ ಕೈ ವಾಸನೆ ಹೋಗುತ್ತದೆ.