ಕಿಚನ್‌ ಕೇರ್‌: ತರಕಾರಿ ಸ್ವಚ್ಚತೆ ಹಾಗೂ ಸಂಗ್ರಹ ಹೀಗಿರಲಿ

-ಒಂದು ವಾರಕ್ಕೆ ಅಡುಗೆಗೆ ಬೇಕಾಗುವ ತರಕಾರಿಗಳನ್ನು ಒಟ್ಟಿಗೆ ತಂದಾಗ ಅವುಗಳನ್ನು ಸರಿಯಾದ ರೀತಿಯಲ್ಲಿ ಸ್ವಚ್ಚಗೊಳಿಸಿ ಸಂಗ್ರಹಿಸಿ ಫ್ರಿಜ್‌ನಲ್ಲಿ ಜೋಡಿಸಿದರೆ ಬೇಕಾದಾಗ ಸುಲಭವಾಗಿ ತೆಗೆದುಕೊಂಡು ಬಳಸಬಹುದು.

-ತರಕಾರಿಗಳನ್ನು ಫ್ರಿಜ್‌ನಲ್ಲಿಡುವ ಮೊದಲು ಚೆನ್ನಾಗಿ ನೀರಿನಲ್ಲಿ ತೊಳೆಯಬೇಕು. ತರಕಾರಿಗಳನ್ನು ಬೇರೆ ಬೇರೆಯಾಗಿ ಮೊದಲು ಜೋಡಿಸಬೇಕು. ಒಂದು ದೊಡ್ಡ ಪಾತ್ರೆಯಲ್ಲಿ ನೀರು ಹಾಕಿ ಅದಕ್ಕೆ ಅರ್ಧ ಕಪ್‌ ವಿನಿಗರ್‌ ಅಥವಾ 2ರಿಂದ 3 ಚಮಚ ಉಪ್ಪು ಹಾಕಿ. ನಂತರ ಬೆಂಡೆಕಾಯಿ, ತೊಂಡೆಕಾಯಿ, ಗೋರಿಕಾಯಿ, ಬದನೆಕಾಯಿ, ಹುರಳಿಕಾಯಿ, ಟೊಮೇಟೊ, ಕ್ಯಾರೆಟ್‌ ನಂಥ ತರಕಾರಿಗಳನ್ನು ಬೇರೆ ಬೇರೆಯಾಗಿ ಹಾಕಿ ತೊಳೆದು ನೀರು ಸೋರಿ ಹೋಗುವ ಜಾಲರಿ ಇರುವ ಪಾತ್ರೆಗಳಲ್ಲಿ ಹಾಕಿ. ಕ್ಯಾರೆಟ್‌ ತೊಳೆಯುವ ಮುಂಚೆ ಹಿಂದಿನ ಭಾಗ ಮತ್ತು ಮುಂದಿನ ಭಾಗವನ್ನು ಕತ್ತರಿಸಿ ತೆಗೆದು ನಂತರ ತೊಳೆಯಬೇಕು. ಕೊನೆಯಲ್ಲಿ ಹೆಚ್ಚು ಮಣ್ಣು ಇರುವ ಶುಂಠಿಗಳನ್ನು ನೀರಿಗೆ ಹಾಕಿ ಚೆನ್ನಾಗಿ ತೊಳೆಯಿರಿ.

-ತೊಳೆದ ತರಕಾರಿಗಳನ್ನು ಶುಭ್ರವಾದ ಕಿಚನ್‌ ಟವಲ್‌ ಮೇಲೆ ಹರಡಿ ನೀರನ್ನು ಇಂಗಿಸಿ. ನಂತರ ಏರ್‌ಟೈಟ್‌ ಕವರ್‌ನಲ್ಲಿ ಹಾಗೂ ಏರ್‌ಟೈಟ್‌ ಕಂಟೈನರ್‌ಗಳಲ್ಲಿ ಹಾಕಿ ಸರಿಯಾಗಿ ಫ್ರಿಜ್‌ನಲ್ಲಿ ಜೋಡಿಸಿ. ಹೀಗೆ ಸ್ವಚ್ಛಗೊಳಿಸಿ ಸಂಗ್ರಹಿಸಿದ ತರಕಾರಿಗಳು ತಾಜಾವಾಗಿರುತ್ತವೆ. ಬೇಕಾದಾಗ ಸುಲಭವಾಗಿ ಬಳಸಬಹುದು.