ಕಿಚನ್‌ ಕೇರ್‌: ಏಪ್ರನ್‌ ಸ್ವಚ್ಛತೆ ಹೀಗಿರಲಿ

ಅಡುಗೆ ಮಾಡುವಾಗ, ಪಾತ್ರೆ ತೊಳೆಯುವಾಗ, ಅಡುಗೆ ಮನೆ ಸ್ವಚ್ಚಗೊಳಿಸುವಾಗ ಬಳಸುವ ಏಪ್ರನ್‌ ಬಹಳ ಬೇಗ ಕೊಳೆಯಾಗುತ್ತದೆ. ಪದೇ ಪದೆ ಬಳಸುವ ಏಪ್ರನ್‌ಗಳನ್ನು ಸ್ವಚ್ಛಗೊಳಿಸುವುದು ತುಸು ಕಷ್ಟವೇ. ಇತರ ಬಟ್ಟೆಗಳೊಂದಿಗೆ ಇದನ್ನು ತೊಳೆಯಲು ಸಾಧ್ಯವಿಲ್ಲ. ಏಕೆಂದರೆ ಅದರ ಮೇಲೆ ಎಣ್ಣೆ, ಸಾಸ್‌ಗಳಂಥ ಜಟಿಲ ಕಲೆಗಳು ಅಂಟಿಕೊಂಡಿರುತ್ತವೆ. ಏಪ್ರನ್‌ ಸ್ಚಚ್ಛತೆಗಾಗಿ ಲಾಂಡ್ರಿಗೆ ಕೊಡುವ ಬದಲು ಮನೆಯಲ್ಲೇ ಕೆಲ ಸುಲಭ ವಿಧಾನದಿಂದ ಸ್ವಚ್ಛಗೊಳಿಸಬಹುದು.

-ಬಿಸಿ ಅಥವಾ ಬೆಚ್ಚಗಿನ ನೀರಿಗೆ ಡಿಟರ್ಜೆಂಟ್‌ ಸೇರಿಸಿ ಏಪ್ರನ್‌ ಅನ್ನು 20ರಿಂದ 30 ನಿಮಿಷ ನೆನೆಸಿ ನಂತರ ತೊಳೆದರೆ ಕೊಳೆ ಹೋಗುತ್ತದೆ.

-ಏಪ್ರನ್‌ನಲ್ಲಿ ಜಿಡ್ಡು , ಕಲೆಗಳು ಹೆಚ್ಚಾಗಿದ್ದರೆ 3 ಟೇಬಲ್‌ ಸ್ಪೂನ್‌ ಅಮೋನಿಯಾವನ್ನು ಅರ್ಧ ಬಕೆಟ್‌ ನೀರಿಗೆ ಹಾಕಿ 20 ನಿಮಿಷ ನೆನೆಸಿ ನಂತರ ತೊಳೆಯಿರಿ. ಅಗತ್ಯವಿದ್ದರೆ ಬ್ರಷ್‌ ಬಳಸಿ.

-ಏಪ್ರನ್‌ ಹೆಚ್ಚು ಕೆಟ್ಟ ವಾಸನೆಯಿಂದ ಕೂಡಿದ್ದರೆ ಹೈಡ್ರೋಜನ್‌ ಪೆರಾಕ್ಸೈಡ್‌ ಅನ್ನು ನೀರಿಗೆ ಹಾಕಿ 10-15 ನಿಮಿಷ ನೆನೆಸಿ ನಂತರ ನೀರಿನಲ್ಲಿ ಸ್ಚಚ್ಛಗೊಳಿಸಿ ಅಥವಾ ನೀರಿಗೆ ಬಿಳಿ ವಿನಿಗರ್‌ ಹಾಕಿ ನೆನೆಸಿ ಸ್ವಚ್ಛಗೊಳಿಸಿದರೆ ವಾಸನೆ ಹೋಗುತ್ತದೆ.

-ನಿಂಬೆ ಮತ್ತು ಉಪ್ಪು ಕೂಡ ಏಪ್ರನ್‌ ಸ್ವಚ್ಛಗೊಳಿಸಲು ಸಹಕಾರಿ. ನೀರಿಗೆ ಉಪ್ಪು ಮತ್ತು ನಿಂಬೆ ರಸ ಹಾಕಿ ಏಪ್ರನ್‌ ಅನ್ನು ನೆನೆಸಿ ನಂತರ ಸ್ವಚ್ಛಗೊಳಿಸಿ ಅಥವಾ ಕಲೆಯಿರುವ ಜಾಗದಲ್ಲಿ ಅರ್ಧ ಹೋಳು ನಿಂಬೆ ಹಣ್ಣಿಗೆ ಉಪ್ಪು ಸೇರಿಸಿ ಉಜ್ಜಿ. ನಂತರ ಬೆಚ್ಚಗಿನ ನೀರಲ್ಲಿ ತೊಳೆದು ಒಣಗಿಸಿ. ತಾಜಾ ಹಾಗೂ ಸುವಾಸಿತ ಏಪ್ರನ್‌ ಅನ್ನು ಪ್ರತಿ ದಿನ ಬಳಸಿ.