ಮಳೆಗಾಲಕ್ಕೆ ಮನೆಯಲ್ಲಿ ಅಲಂಕಾರ ಹೇಗಿರಬೇಕು?

ಮುಂಗಾರು ಮಳೆ ತಡವಾಗಿಯಾದರೂ ನಗರಕ್ಕೆ ಕಾಲಿಟ್ಟಿದೆ. ಕಿಟಕಿ ಬಳಿ ನಿಂತು ಮಳೆ ಹನಿಯುವುದನ್ನು ನೋಡುವ ಆನಂದವನ್ನು ಅನುಭವಿಸುವುದರ ಜತೆಗೆ ಈ ಸಂದರ್ಭದಲ್ಲಿ ಎದುರಾಗಬಹುದಾದ ಸಮಸ್ಯೆಗಳನ್ನು ನಿವಾರಿಸಲು ಅವಶ್ಯಕ ಕ್ರಮಗಳನ್ನು ಕೈಗೊಳ್ಳಬೇಕು.

ಬಣ್ಣಗಳು: ಚಿಕ್ಕ ಸರಳ ಡೆಕೊರೇಶನ್‌ ಕೂಡ ಮಳೆಗಾಲದಲ್ಲಿ ಸಾಕಷ್ಟು ನೆರವಿಗೆ ಬರುತ್ತದೆ. ಹಳದಿಯಂತಹ ಬ್ರೈಟ್‌ ಬಣ್ಣಗಳು ಮಳೆಗಾಲದ ನೀರವ ವಾತಾವರಣವನ್ನು ಹೋಗಲಾಡಿಸುವ ಶಕ್ತಿಯಿದೆ. ಸಿಂಥೆಟಿಕ್‌ ಬ್ಲೆಂಡ್‌ ಇರುವ ತೆಳು ಫ್ಯಾಬ್ರಿಕ್‌ ಯಾವಾಗಲೂ ಮಳೆಗಾಲಕ್ಕೆ ಉತ್ತಮ ಆಯ್ಕೆ. ಆದರೆ ಕುಶನ್‌ ಮತ್ತು ಕವರ್‌ಗಳು ಬ್ರೈಟ್‌ ಕಲರ್‌ನದ್ದಾಗಿರಬೇಕು. ಆದಾಗ್ಯೂ ನೀಲಿ ಮತ್ತು ಕೆಂಪಿಗೆ ಆದ್ಯತೆ ನೀಡದೆ ಹಳದಿ ಮತ್ತು ಹಸಿರಿಗೆ ಹೆಚ್ಚಿನ ಗಮನ ನೀಡಬೇಕು. ಯಾಕೆಂದರೆ ಹೊರಗಡೆ ಹಸಿರು ಕಂಗೊಳಿಸುತ್ತಿರುವಾಗ ಒಳಗಡೆಯೂ ಅದೇ ಬಣ್ಣವಿದ್ದರೆ ನಿಸರ್ಗವೇ ಇಲ್ಲಿ ಪ್ರತಿಫಲಿಸಿದಂತೆ ಭಾಸವಾಗುತ್ತದೆ.

ಪ್ರಿಂಟ್‌ಗಳು: ಬೆಟ್ಟ-ಗುಡ್ಡ, ಮರ-ಗಿಡಗಳ ಪ್ರಿಂಟ್‌ಗಳು ಈ ವರ್ಷದ ಟ್ರೆಂಡ್‌. ಅದರಲ್ಲೂ ನಿಬಿಡ ಎಲೆಗಳು, ಹೂವು ಇರುವ ಪ್ರಿಂಟ್‌ಗಳು ಹೆಚ್ಚು ಜನಪ್ರಿಯವಾಗಿವೆ. ಇದನ್ನು ವಾಲ್‌ಪೇಪರ್‌, ಫ್ಯಾಬ್ರಿಕ್‌, ಡ್ರಾಪ್‌ ಸೇರಿದಂತೆ ಬೇರೆ ಬೇರೆ ರೀತಿಯಲ್ಲಿ ಬಳಕೆ ಮಾಡಿಕೊಳ್ಳಬಹುದು. ಇವುಗಳು ನಾನಾ ಬಣ್ಣಗಳಲ್ಲೂ ಸಿಗುತ್ತವೆ. ಉದಾಹರಣೆಗೆ ಆಶಾವಾದ ಮತ್ತು ಭರವಸೆಯ ಸಂಕೇತವಾದ ಚಿಟ್ಟೆಯ ಪ್ರಿಂಟ್‌ ಈಗ ಹೆಚ್ಚು ಬೇಡಿಕೆ ಪಡೆಯುತ್ತಿದೆ. ಇದರ ಜೊತೆಗೆ ಬೋಲ್ಡ್‌ ಪ್ರಿಂಟ್‌ಗಳನ್ನು ಕೂಡ ಬಳಸಬಹುದು.

ಪ್ಯಾಟರ್ನ್‌ಗಳು: ಈ ವರ್ಷ ಚೌಕ, ಆಯತ, ತ್ರಿಕೋನ, ಷಟ್ಭುಜ, ವಜ್ರಕಾರ ಮೊದಲಾದ ಪ್ಯಾಟರ್ನ್‌ಗಳು ಹೆಚ್ಚು ಬಳಕೆಯಾಗುತ್ತಿವೆ. ಇವುಗಳು ತುಂಬಾ ಸ್ಟೈಲಿಶ್‌ ಕೂಡ ಆಗಿರುತ್ತವೆ. ಇವುಗಳು ಟ್ರೆಂಡಿ ಆಯ್ಕೆಯಾಗಿದ್ದು, ಈ ಆಕಾರಗಳು ಭ್ರಮೆಯನ್ನು ಕೂಡ ಸೃಷ್ಟಿಸುತ್ತವೆ. ವಾಲ್‌ ಡಿಸೈನ್‌ ಅಥವಾ ಬೆಡ್‌ ಶೀಟ್‌, ಕುಶನ್‌, ಕಾರ್ಪೆಟ್‌ಗಳಿಗೆ ಕೂಡ ಈ ಪ್ಯಾಟರ್ನ್‌ಗಳನ್ನು ಮಿಶ್ರಣ ಮಾಡಿಕೊಳ್ಳಬಹುದು. ತಜ್ಞರ ಪ್ರಕಾರ ಈ ರೇಖಾ ಗಣಿತದ ಆಕಾರಗಳು ಖಚಿತವಾಗಿಯೂ ಮೂಡ್‌ನ್ನು ಬದಲಾಯಿಸುವ ಸಾಮರ್ಥ್ಯವನ್ನು ಹೊಂದಿವೆ.

ಆಕ್ಸೆಸರಿ: ಫ್ಯಾಬ್ರಿಕ್‌ ಜೊತೆಗೆ ಲೈಟಿಂಗ್‌ ಮತ್ತು ಉತ್ತಮ ಆರೋಮೆಟಿಕ್‌ ಥೆರಪಿ ಲೈಟಿಂಗ್‌ ಅಂದರೆ ಸುವಾಸನೆ ಭರಿತ ಕ್ಯಾಂಡಲ್‌ ಕೂಡ ಬಳಕೆ ಮಾಡಬಹುದು. ಇದರಿಂದ ಗೋಡೆಯ ಬಣ್ಣಗಳೇ ಗಾಢವಾಗಿ ಕಣ್ಣಿಗೆ ರಾಚುವುದನ್ನು ತಪ್ಪಿಸಲು ಕೂಡ ಸಾಧ್ಯವಿದೆ. ಜೊತೆಗೆ ತೇವಾಂಶ ಭರಿತ ಹವಾಮಾನದಿಂದ ಕಾಣಿಸಿಕೊಳ್ಳುವ ಒಂದು ರೀತಿಯ ವಾಸನೆಯನ್ನು ಹೋಗಲಾಡಿಸುತ್ತದೆ. ಇನ್ನು ಅರೋಮೆಟಿಕ್‌ ಲೈಟಿಂಗ್‌ ಸಂಜೆ ವೇಳೆ ರೋಮಾಂಟಿಕ್‌ ಭಾವ ಕೂಡ ಮೂಡಿಸುತ್ತದೆ. ಜೊತೆಗೆ ಚಿಕ್ಕ ಚಿಕ್ಕ ಗಂಟೆಗಳು ಕೂಡ ಹಿತವಾಗಿ ಬೀಸುವ ಗಾಳಿಗೆ ಅಲ್ಲಾಡಿಸಿ ಆಹ್ಲಾದಕರ ಶಬ್ಧವನ್ನು ನೀಡಿ, ಶಾಂತಿಯುತ ವಾತಾವರಣ ಮನೆ ತುಂಬ ನಲಿದಾಡುವಂತೆ ಮಾಡುತ್ತದೆ.