ಬಳಸಿದ ಟೀ ಬ್ಯಾಗ್‌ನಿಂದಲೂ ಇದೆ ಉಪಯೋಗ

ಗ್ರೀನ್‌ ಟೀ ಕುಡಿಯುವುದು ಈಗ ಸಾಮಾನ್ಯ. ಟೀ ಸೇವನೆಯ ಬಳಿಕ ಟೀ ಬ್ಯಾಗನ್ನು ಬಿಸಾಕದಿರಿ, ಅದೂ ನಿಮ್ಮ ಆರೋಗ್ಯಕ್ಕೆ ಪೂರಕವಾಗಿ ಬಳಕೆಗೆ ಬರುತ್ತದೆ. ಹೇಗೆ ಗೊತ್ತೇ?

*ಟೀ ಬ್ಯಾಗನ್ನು ಡೀಪ್‌ ಫ್ರೀಜ್‌ ಮಾಡಿ ಅದನ್ನು ಬಾಯಿ ಹುಣ್ಣಿನ ಮೇಲಿಟ್ಟರೆ ತಂಪಾದ ಅನುಭವವಾಗಿ ಹಾಯೆನಿಸುತ್ತದೆ. ಸಹಿಸಲಸಾಧ್ಯ ಉರಿಯಾಗುವ ಸಂದರ್ಭದಲ್ಲಿ ಇದು ಕೊಂಚ ಮಟ್ಟಿನ ಶಮನ ನೀಡುತ್ತದೆ.

ಕೈಗೆ ಗಾಯವಾಗಿದ್ದಾಗ ರಕ್ತ ಸೋರುತ್ತಿದ್ದಲ್ಲಿ ಬಳಸಿದ ಟೀ ಬ್ಯಾಗ್‌ ಅನ್ನು ಬಿಸಿ ನೀರಿನಲ್ಲಿ ಅದ್ದಿ ತೆಗೆದು ಗಾಯದ ಮೇಲೆ ಇಡಿ. ಕೀಯಲ್ಲಿರುವ ಟ್ಯಾನಿನ್‌ ಅಂಶವು ರಕ್ತ ಸೋರುವುದನ್ನು ನಿಲ್ಲಿಸುತ್ತದೆ. ಬಳಿಕ ಗಾಯಕ್ಕೆ ಬ್ಯಾಂಡೇಜ್‌ ಮಾಡಬಹುದು. ಸಣ್ಣಪುಟ್ಟ ಗಾಯಗಳಾಗಿದ್ದಾಗ ಇದನ್ನು ಮಾಡಬಹುದು.

ಕೈಗೆ ಬಿಸಿನೀರು ಅಥವಾ ಇನ್ನಾವುದೇ ಖಾದ್ಯದ ಹನಿ ಬಿದ್ದು ಗುಳ್ಳೆಯಾಗಿದ್ದಲ್ಲಿ ಬಳಸಿದ ಟೀ ಬ್ಯಾಗ್‌ ಅನ್ನು ತೇವಗೊಳಿಸಿ ಇಡಬಹುದು. ಇದರಿಂದ ಬಿಸಿ ಬಿದ್ದ ಜಾಗವು ಉರಿಯುವುದಿಲ್ಲ. ಟೀ ಬ್ಯಾಗ್‌ನಲ್ಲಿ ಆ್ಯಂಟಿ ಬ್ಯಾಕ್ಟೀರಿಯಾ ಅಂಶವೂ ಇರುವುದರಿಂದ ಇದು ಬ್ಯಾಕ್ಟೀರಿಯಾ ಸೋಂಕು ಆಗದಂತೆಯೂ ತಡೆಯುತ್ತದೆ.

ಕೀಟಗಳು ಕಚ್ಚಿದಾಗಲೂ ತೇವ ಹೊಂದಿದ ಟೀ ಬ್ಯಾಗನ್ನು ಬಳಸಬಹುದು. ಇದರಿಂದ ಕೀಟ ಕಚ್ಚಿದ ಜಾಗವು ಊದಿಕೊಳ್ಳದಂತೆ ತಡೆಯಬಹುದು, ಸೋಂಕುಗಳಾಗದಂತೆಯೂ ನೋಡಿಕೊಳ್ಳಬಹುದು.

ತೀವ್ರ ಬಿಸಿಲಿಗೆ ಹೋದಾಗ ಸನ್‌ಬರ್ನ್‌ಗೆ ಒಳಗಾಗುವ ಅಪಾಯವಿದೆ. ಆದರೆ, ಟೀಯಲ್ಲಿರುವ ಇಜಿಸಿಜಿ ಅಂಶವು ಅತಿನೇರಳೆ ಕಿರಣಗಳಿಂದ ಚರ್ಮವನ್ನು ಕಾಪಾಡುತ್ತದೆ.

ಒಂದು ಬಕೆಟ್‌ ನೀರಿನಲ್ಲಿ ಬಳಸಿದ ಟೀ ಬ್ಯಾಗ್‌ ಹಾಕಿ ಅದರಲ್ಲಿ ನಿಮ್ಮ ಪಾದಗಳನ್ನು ಮುಳುಗಿಸಿ ಇಟ್ಟರೆ ಪಾದವು ಮೆತ್ತಗಾಗಿ ಮತ್ತೆ ಚೈತನ್ಯ ಪಡೆಯುತ್ತದೆ.