ಜುಲೈ 11ರಂದು 'ವಿಶ್ವ ಜನಸಂಖ್ಯಾ ದಿನ'ವೆಂದು ಕರೆಯಲಾಗುತ್ತಿದೆ. ಜಾಗತಿಕವಾಗಿ ಜನಸಂಖ್ಯೆ ಏರುತ್ತಿರುವ ವೇಗ ನೋಡಿ ವಿಶ್ವಸಂಸ್ಥೆ 1987ರ ವರ್ಷದಲ್ಲಿ ವಿಶ್ವ ಜನಸಂಖ್ಯಾ ದಿನಾಚರಣೆಗೆ ಮುನ್ನುಡಿ ಬರೆಯಿತು. ಆ ದಿನದಂದು ವಿಶ್ವ ಜನಸಂಖ್ಯೆ 5 ಬಿಲಿಯನ್‌ ತಲುಪಿತ್ತು ಎನ್ನಲಾಗಿದೆ. ವಿಶ್ವದಲ್ಲಿ ಜನಸಂಖ್ಯೆಯ ಕುರಿತಾದ ವಿವಿಧ ಸಮಸ್ಯೆಗಳ ಕುರಿತಾಗಿ ವಿಶ್ವ ಸಮುದಾಯದ ಗಮನ ಸೆಳೆಯುವುದೇ ಈ ಆಚರಣೆಯ ಪ್ರಮುಖ ಉದ್ದೇಶ.
ಈ ಹಿಂದೆ ಜನನ ಸಂಖ್ಯೆಯ ತೀವ್ರತೆಯ ಜತೆಗೆ ಮರಣ ಸಂಖ್ಯೆಯ ತೀವ್ರತೆಯೂ ಹೆಚ್ಚಿತ್ತು. ಮುಂದುವರಿದ ವಿಜ್ಞಾನ ಯುಗದಲ್ಲಿ ಮನುಷ್ಯನ ಆಯುಷ್ಯ ಹೆಚ್ಚಳದ ಜತೆಗೆ ಜನನ ಸಂಖ್ಯೆಯೂ ಹೆಚ್ಚುತ್ತಾ ಸಾಗಿದೆ. ಮನುಷ್ಯನ ವೈಜ್ಞಾನಿಕ ತಿಳಿವಳಿಕೆ ಹೆಚ್ಚಿದಂತೆಲ್ಲ ಈ ಕುರಿತು ಹಲವಾರು ವಿಚಿತ್ರ ಪರಿಸ್ಥಿತಿಗಳೂ ತಲೆದೋರತೊಡಗಿವೆ.
1986ರ ವರ್ಷದಲ್ಲಿ 500 ಕೋಟಿ, 1998ರಲ್ಲಿ 600 ಕೋಟಿ, 2011ರಲ್ಲಿ 700 ಕೋಟಿ ಇದ್ದು ಇದೀಗ 720ಕೋಟಿಗಳನ್ನು ದಾಟಿದೆ. ಇದೇ ಮುಂದುವರಿದರೆ 2024ರ ವೇಳೆಗೆ 800 ಕೋಟಿ, 2039ರ ವೇಳೆಗೆ 900 ಕೋಟಿ ತಲುಪಿ 2061ರ ವರ್ಷದಲ್ಲಿ 1000 ಕೋಟಿಯನ್ನು ತಲುಪುತ್ತದೆ ಎಂಬುದು ಸಂಖ್ಯಾಶಾಸ್ತ್ರಜ್ಞರ ಊಹೆಯಾಗಿದೆ.
ವಿಶ್ವದ ಹೆಚ್ಚು ಜನಸಂಖ್ಯೆಯುಳ್ಳ ದೇಶಗಳು ಇಂತಿವೆ: ಚೀನಾ 135 ಕೋಟಿ, ಭಾರತ 120 ಕೋಟಿ, ಅಮೆರಿಕ 32 ಕೋಟಿ, ಇಂಡೋನೇಷ್ಯಾ 25 ಕೋಟಿ, ಬ್ರೆಜಿಲ್‌ 20 ಕೋಟಿ, ಪಾಕಿಸ್ತಾನ 19 ಕೋಟಿ, ನೈಜೀರಿಯಾ 18 ಕೋಟಿ, ಬಾಂಗ್ಲಾದೇಶ 16 ಕೋಟಿ, ರಷ್ಯಾ 14 ಕೋಟಿ, ಜಪಾನ್‌ 13 ಕೋಟಿ.