ಡೈಲಿ ಯೋಗ: ದಿಂಬಿನ ಸಹಾಯದಿಂದ ಏಕಪಾದ ಸರ್ವಾಂಗಾಸನ
ಜಮಖಾನವನ್ನು ನೆಲದ ಮೇಲೆ ಹಾಸಬೇಕು ನಂತರ ಜಮಖಾನದ ಮಧ್ಯದ ಭಾಗದಲ್ಲಿ ದಿಂಬನ್ನು ಅಡ್ಡವಾಗಿಡಬೇಕು.
Vijaya Karnataka 12 Apr 2018, 5:00 am
ವಿವರಣೆ :-ಜಮಖಾನವನ್ನು ನೆಲದ ಮೇಲೆ ಹಾಸಬೇಕು. ನಂತರ ಜಮಖಾನದ ಮಧ್ಯದ ಭಾಗದಲ್ಲಿ ದಿಂಬನ್ನು ಅಡ್ಡವಾಗಿಡಬೇಕು. ಈಗ ದಿಂಬಿನ ಒಂದು ತುದಿಯಲ್ಲಿ ಕುಳಿತು ಬೆನ್ನನ್ನು ದಿಂಬಿನ ಕಡೆಮಾಡಿ ಹಿಂದೆ ಮಲಗಬೇಕು. ಎರಡೂ ಭುಜಗಳು ದಿಂಬಿನ ಮೇಲಿರಲಿ. ಈಗ ಕೈಗಳನ್ನು ಹಿಂದೆ ಚಾಚಿ ಹಸ್ತಗಳನ್ನು ನೆಲಕ್ಕೆ ಒತ್ತುತ್ತ ಕಾಲುಗಳನ್ನು ಸೊಂಟದ ನೇರಕ್ಕೆ ಮೇಲೆ ತೆಗೆದುಕೊಳ್ಳಿ. ನಂತರ ಸೊಂಟವನ್ನು ಮೇಲೆ ಎತ್ತುತ್ತ ಕಾಲುಗಳನ್ನು ತಲೆಯ ಹಿಂಭಾಗದ ಕಡೆಗೆ ತೆಗೆದುಕೊಂಡು ಕಾಲಬೆರಳುಗಳನ್ನು ನೆಲಕ್ಕೆ ತಾಗಿಸಿ. ಈಗ ಒಂದು ಕಾಲನ್ನು ಸೊಂಟದ ನೇರಕ್ಕೆ ಮೇಲೆ ತೆಗೆದುಕೊಳ್ಳಬೇಕು. ತಲೆಯ ಹಿಂಭಾಗ ನೆಲದ ಮೇಲಿರಲಿ. ಮಂಡಿಗಳು ಬಿಗಿಯಾಗಿರಲಿ. ಕಾಲುಗಳು ನೇರವಾಗಿರಲಿ. ಪಕ್ಕೆಲುಬುಗಳು ಕುಸಿಯದಂತೆ ಮೇಲೆ ಎತ್ತಬೇಕು. ಹಿಂದೆ ಎರಡು ಕೈಗಳನ್ನು ಚಾಚಿ ಹಸ್ತಗಳನ್ನು ಒಂದಕ್ಕೊಂದು ಹಿಡಿದಿರಬೇಕು. ಈ ಆಸನದಲ್ಲಿ ಸಹಜ ಉಸಿರಾಟ ಕ್ರಿಯೆ ಇರಲಿ. ಈ ರೀತಿ ಸ್ವಲ್ಪ ಸಮಯವಿದ್ದು ನಂತರ ವಾಪಸ್ ಬರಬೇಕು. ಇದೇ ರೀತಿ ಮತ್ತೊಂದು ಕಡೆ ಆಸನ ಮಾಡಬೇಕು.
ಉಪಯೋಗ:- ಶರೀರ ಕುಸಿಯದಂತೆ ನೇರವಾಗುವುದು. ಸೊಂಟದ ನೋವು ದೂರವಾಗುವುದು. ತೊಡೆಯ ಸಂಧುಗಳಲ್ಲಿನ ಬಿಗಿತ ಮತ್ತು ಒತ್ತಡ ದೂರವಾಗುವವು. ಮನಸ್ಸಿಗೆ ಶಾಂತಿ ದೊರೆಯುವುದು.