ಡೈಲಿ ಯೋಗ: ಕುರ್ಚಿಸಹಾಯದಿಂದ ಉತ್ತಾನ ಮಯೂರಾಸನ

ವಿವರಣೆ :- ಜಮಖಾನವನ್ನು ನೆಲದ ಮೇಲೆ ಹಾಸಿ. ನಂತರ ಒಂದು ಕುರ್ಚಿಯನ್ನು ಜಮಖಾನದ ಒಂದು ತುದಿಯಲ್ಲಿ ಇಡಿ. ಕುರ್ಚಿಯ ಮುಂಭಾಗವನ್ನು ಮುಂದೆ ಬಾಗಿಸಿ ನೆಲಕ್ಕೆ ತಾಗಿಸಿ. ಕುರ್ಚಿಯ ಹಿಂಭಾಗದ ಕಾಲುಗಳು ಮೇಲಕ್ಕೆ ಬಂದಿರಲಿ. ಮುಂಭಾಗದ ಕಾಲುಗಳು ಹಿಂದೆ ಇರಲಿ. ಕುರ್ಚಿಯಲ್ಲಿ ಒರಗಿಕೊಳ್ಳಲು ಇರುವ ಭಾಗದ ಮೇಲೆ ಒಂದು ದಿಂಬನ್ನು ಇಡಿ. ಕುರ್ಚಿಯ ಹಿಂಭಾಗದಲ್ಲಿ ಬಂದು ಕುರ್ಚಿಯಲ್ಲಿನ ಮೇಲೆ ಇರುವ ಕಾಲುಗಳ ಮಧ್ಯದ ಭಾಗದ ಅಡ್ಡ ಪಟ್ಟಿಯ ಮೇಲೆ ಸೊಂಟವನ್ನು ಊರಿ ನಿಧಾನವಾಗಿ ಹಿಂದಕ್ಕೆ ಭಾಗಿ ಭುಜಗಳನ್ನು ದಿಂಬಿನ ಮೇಲೆ ಇಡಿ. ಪಾದಗಳು ಹಿಂದೆ ನೆಲದ ಮೇಲೆ ಇರಲಿ. ಈಗ ನೆಲದ ಮೇಲೆ ಇರುವ ಪಾದಗಳನ್ನು ಒಂದೊಂದಾಗಿ ಮೇಲಕ್ಕೆ ಎತ್ತಿ ಹಿಂದೆ ಚಾಚಿ ನೇರಮಾಡಿ. ಎರಡೂ ಹಸ್ತಗಳಿಂದ ಕುರ್ಚಿಯ ಮೇಲ್ಭಾಗದ ಕಾಲುಗಳನ್ನು ಹಿಡಿಯಿರಿ. ಈ ಆಸನದಲ್ಲಿ ಸಹಜ ಉಸಿರಾಟ ಕ್ರಿಯೆ ಇರಲಿ. ಸ್ವಲ್ಪ ಸಮಯ ಇದೇ ರೀತಿ ಇದ್ದು ನಂತರ ಕಾಲುಗಳನ್ನು ಕೆಳಗಿಳಿಸಿ ಹಿಂದೆ ಜಾರಿ ವಿಶ್ರಾಂತಿ ಪಡೆಯಬೇಕು.

ಉಪಯೋಗ :- ಉತ್ತಾನ ಮಯೂರಾಸನದಲ್ಲಿ ಕೈಗಳನ್ನು ಸೊಂಟದ ಕೆಳಗೆ ಹಿಡಿದು ಮೊಣಕಾಲಿಗೆ ತಾಗಿಸಿ ಕಾಲುಗಳನ್ನು ಮೇಲೆತ್ತಬೇಕು ಆದರೆ ಇದು ಎಲ್ಲರಿಗೂ ಸಾಧ್ಯವಾಗುವುದಿಲ್ಲ. ಅಂತಹವರು ಕುರ್ಚಿಯ ಸಹಾಯದಿಂದ ಈ ಆಸನ ಮಾಡಬಹುದು. ಈ ಆಸನದಿಂದ ಸೊಂಟದ ಭಾಗ ಸದೃಢವಾಗುವುದು. ದೊಡ್ಡ ಕರುಳಿನ ದುರ್ಬಲತೆ ದೂರವಾಗುವುದು. ಗುದಭಾಗದಲ್ಲಿ ಬರುವಂತಹ ನೊವು, ಊತ, ಪೈಲ್ಸ್‌ ನಂತಹ ಸಮಸ್ಯೆ ದೂರವಾಗುವವು.