ಡೈಲಿ ಯೋಗ: ಕುರ್ಚಿ ಸಹಾಯದಿಂದ ಏಕಪಾದ ಸೇತುಬಂದಾಸನ

ವಿವರಣೆ :- ಜಮಖಾನವನ್ನು ಬಿಡಿಸಿ ನೆಲದ ಮೇಲೆ ಹಾಸಿ ನಂತರ ಒಂದು ಕುರ್ಚಿಯನ್ನು ಜಮಖಾನದ ಒಂದು ತುದಿಯಲ್ಲಿ ಬಿಡಿಸಿ ಇಡಿ. ಈಗ ಕುರ್ಚಿಯ ಮುಂಭಾಗವನ್ನು ಮುಂದೆ ಬಾಗಿಸಿ ನೆಲಕ್ಕೆ ತಾಗಿಸಿ. ಕುರ್ಚಿಯ ಹಿಂಭಾಗದ ಕಾಲುಗಳು ಮೇಲಕ್ಕೆ ಬಂದಿರಲಿ. ಮುಂಭಾಗದ ಕಾಲುಗಳು ಹಿಂದೆ ಇರಲಿ. ಕುರ್ಚಿಯಲ್ಲಿ ಒರಗಿಕೊಳ್ಳಲು ಇರುವ ಭಾಗದ ಮೇಲೆ ಒಂದು ದಿಂಬನ್ನು ಇಡಿ. ಈಗ ಕುರ್ಚಿಯ ಹಿಂಭಾಗದಲ್ಲಿ ಬಂದು ಕುರ್ಚಿಯಲ್ಲಿನ ಮೇಲೆ ಇರುವ ಕಾಲುಗಳ ಮಧ್ಯದ ಭಾಗದ ಅಡ್ಡ ಪಟ್ಟಿಯ ಮೇಲೆ ಸೊಂಟವನ್ನು ಊರಿ ನಿಧಾನವಾಗಿ ಹಿಂದಕ್ಕೆ ಭಾಗಿ ಭುಜಗಳನ್ನು ದಿಂಬಿನ ಮೇಲೆ ಇಡಿ. ಪಾದಗಳು ಹಿಂದೆ ನೆಲದ ಮೇಲೆ ಇರಲಿ. ಈಗ ನೆಲದ ಮೇಲೆ ಇರುವ ಒಂದು ಕಾಲನ್ನು ಮೇಲೆ ಎತ್ತಿ 90 ಡಿಗ್ರಿ ತರಬೇಕು. ಮತ್ತೊಂದು ಕಾಲು ಕುರ್ಚಿಯ ಹಿಂಭಾಗದಲ್ಲಿ ನೆಲದ ಮೇಲಿರಲಿ. ಎರಡೂ ಕೈಗಳಿಂದ ಕುರ್ಚಿಯ ಮೇಲ್ಭಾಗದ ಕಾಲುಗಳನ್ನು ಹಿಡಿದಿರಬೇಕು. ಈ ಆಸನದಲ್ಲಿ ಸಹಜ ಉಸಿರಾಟ ಕ್ರಿಯೆ ಇರಲಿ. ಈ ರೀತಿ ಸ್ವಲ್ಪ ಸಮಯ ಇದ್ದು ನಂತರ ಕಾಲನ್ನು ಬದಲಾಯಿಸಿ ಮತ್ತೊಂದು ಕಡೆ ಆಸನ ಮಾಡಬೇಕು. ನಂತರ ಕುರ್ಚಿಯಿಂದ ಹಿಂದೆ ಜಾರಿ ವಿಶ್ರಾಂತಿ ಪಡೆಯಬೇಕು.

ಉಪಯೋಗ :- ಸಾಮಾನ್ಯವಾಗಿ ಏಕಪಾದ ಸೇತುಬಂದಾಸನದಲ್ಲಿ ಸೊಂಟದಭಾಗ ಕುಸಿಯುವುದು ಹಾಗೂ ಕಾಲು 90 ಡಿಗ್ರಿ ಬರಲು ಸಾಧ್ಯವಾಗುವುದಿಲ್ಲ. ಅಂತಹವರು ಈ ರೀತಿ ಕುರ್ಚಿ ಸಹಾಯದಿಂದ ಆಸನ ಮಾಡಿದಾಗ ಆಸನ ಸುಲಭವಾಗುವುದು. ಸೊಂಟದ ನೋವು ನಿವಾರಣೆ ಆಗುವುದು. ಉಸಿರಾಟ ತೊಂದರೆ, ಥೈರಾಯ್ಡ್‌ ಸಮಸ್ಯೆ ನಿವಾರಣೆಗೆ ಉತ್ತಮ ಆಸನ.