ಡೈಲಿ ಯೋಗ: ಗೋಡೆ ಮತ್ತು ಇಟ್ಟಿಗೆಯ ಸಹಾಯದಿಂದ ತ್ರಿಕೋನಾಸನ

ವಿವರಣೆ :- ಬೆನ್ನನ್ನು ಗೋಡೆ ಕಡೆಗೆ ಮಾಡಿ ಸಮಸ್ಥಿತಿಯಲ್ಲಿ ನಿಂತುಕೊಳ್ಳಬೇಕು. ನಂತರ ಎರಡೂ ಪಾದಗಳನ್ನು ವಿಸ್ತರಿಸಿ ನಾಲ್ಕು ಅಡಿಯಷ್ಟು ಅಂತರದಲ್ಲಿ ಇಟ್ಟು ನಿಂತುಕೊಳ್ಳಿ. ಈ ಸ್ಥಿತಿಯಲ್ಲಿ ಬಲಪಾದವನ್ನು ಬಲ ಭಾಗಕ್ಕೆ ತಿರುಗಿಸಿ. ಬಲಪಾದವು ಹಿಂದೆ ಇರುವ ಎಡಪಾದದ ಒಳ ಅಂಚಿನ ಮಧ್ಯದ ಭಾಗಕ್ಕೆ ನೇರವಾಗಿರಲಿ. ಬಲಗಾಲಿನ ಮೀನಖಂಡ ಮತ್ತು ಗೋಡೆಯ ಮಧ್ಯದಲ್ಲಿ ಒಂದು ಇಟ್ಟಿಗೆಯನ್ನು ಉದ್ದವಾಗಿ ಇಡಬೇಕು. ಹಿಂದೆ ಇರುವ ಕಾಲಿನ ಹಿಮ್ಮಡಿ ಗೋಡೆಗೆ ತಾಗಿರಲಿ. ಎರಡೂ ಪೃಷ್ಠಗಳು ಹಾಗೂ ಬೆನ್ನಿನ ಮೇಲ್ಭಾಗ (ಭುಜಗಳ ಹಿಂದೆ) ಗೋಡೆಗೆ ತಾಗಿರಲಿ. ಈಗ ನಿಧಾನವಾಗಿ ಬಲಕ್ಕೆ ಬಾಗಿ ಬಲಹಸ್ತವನ್ನು ಇಟ್ಟಿಗೆಯ ಮೇಲೆ ಊರಿ. ಎಡಗೈಯನ್ನು ಮೇಲಕ್ಕೆ ಎಳೆಯುತ್ತಿರಿ. ದೃಷ್ಟಿ ಎಡಹಸ್ತದ ಕಡೆಗೆ ಇರಲಿ. ಬಲಪಕ್ಕೆಲುಬು ಕುಸಿಯದಂತೆ ಮೇಲಕ್ಕೆ ಎತ್ತುತ್ತಿರಬೇಕು. ಈ ಆಸನದಲ್ಲಿ ಸಹಜ ಉಸಿರಾಟ ಕ್ರಿಯೆ ಇರಲಿ. ಈ ರೀತಿ ಸ್ವಲ್ಪ ಸಮಯವಿದ್ದು ವಾಪಸ್‌ ಬಂದ ನಂತರ ಇದೇ ರೀತಿ ಮತ್ತೊಂದು ಕಡೆ ಆಸನ ಮುಂದುವರಿಸಬೇಕು.

ಉಪಯೋಗ :- ತ್ರಿಕೋನಾಸನದಲ್ಲಿ ಸಾಮಾನ್ಯವಾಗಿ ಯಾವಕಡೆ ಬಾಗುತ್ತೇವೆಯೋ ಆ ಭಾಗ ಕುಸಿಯುವುದು ಸಾಮಾನ್ಯವಾಗಿರುತ್ತದೆ. ಆದರೆ ಈ ರೀತಿ ಇಟ್ಟಿಗೆ ಮತ್ತು ಗೋಡೆ ಸಹಾಯದಿಂದ ಆಸನ ಮಾಡಿದಾಗ ಶರೀರದಲ್ಲಿನ ಕುಸಿಯುವಿಕೆ ತಪ್ಪುತ್ತದೆ. ಕಾಲುಗಳಿಗೆ ಶಕ್ತಿ ಬರುವುದು. ಸೊಂಟದ ಭಾಗ ಬಲಿಷ್ಠವಾಗುವುದು. ಬೆನ್ನು ನೋವು ದೂರವಾಗುವುದು. ಪಕ್ಕೆಲುಬುಗಳಲ್ಲಿನ ಕೊಬ್ಬಿನಂಶ ಕರಗುವುದು. ಥೈರಾಯ್ಡ್‌ ಮತ್ತು ದೃಷ್ಟಿ ದೋಷದ ಸಮಸ್ಯೆ ನಿವಾರಣೆಯಾಗುವುದು.