ಡೈಲಿ ಯೋಗ: ಇಟ್ಟಿಗೆ ಸಹಾಯದಿಂದ ಕ್ರೌಂಚಾಸನ

ವಿವರಣೆ :- ಜಮಖಾನವನ್ನು ನೆಲದ ಮೇಲೆ ಹಾಸಬೇಕು. ನಂತರ ಕಾಲುಗಳನ್ನು ಮುಂದೆ ಚಾಚಿ ಜಮಖಾನದ ಮೇಲೆ ನೇರ ಕುಳಿತು ಕೊಳ್ಳಬೇಕು. ಈಗ ಎಡಗಾಲನ್ನು ಹಿಂದೆ ಮಡಚಿ ವೀರಾಸನ ಸ್ಥಿತಿಗೆ ಬರಬೇಕು ಹಾಗೂ ಬಲಪೃಷ್ಠದ ಕೆಳಗೆ ಒಂದು ಇಟ್ಟಿಗೆಯನ್ನು ಇಡಬೇಕು. ನಂತರ ಬಲಗಾಲನ್ನು ಸ್ವಲ್ಪ ಹಿಂದಕ್ಕೆ ಮಡಚಿ ಎರಡೂ ಹಸ್ತಗಳಿಂದ ಬಲಪಾದವನ್ನು ಹಿಡಿದು ನಿಧಾನವಾಗಿ ಸೊಂಟದ ನೇರಕ್ಕೆ ಮೇಲೆ ತೆಗೆದುಕೊಳ್ಳಬೇಕು. ಬಲತೊಡೆಯನ್ನು ನಾಭಿಗೆ ತಾಗಿಸಬೇಕು. ಬಲ ಮಂಡಿಯ ಭಾಗ ಎದೆಗೆ ತಾಗಿಸಬೇಕು ಹಾಗೂ ಹಣೆಯನ್ನು ಮೊಣಕಾಲಿಗೆ ತಾಗಿಸಿರಬೇಕು. ಈ ಆಸನದಲ್ಲಿ ಸಹಜ ಉಸಿರಾಟ ಕ್ರಿಯೆ ಇರಲಿ. ಈ ರೀತಿ ಸ್ವಲ್ಪ ಸಮಯವಿದ್ದು ವಾಪಸ್‌ ಬಂದ ನಂತರ ಇದೇ ರೀತಿ ಮತ್ತೊಂದು ಕಡೆ ಆಸನ ಮುಂದುವರಿಸಬೇಕು.

ಉಪಯೋಗ:- ಸಾಮಾನ್ಯವಾಗಿ ಕ್ರೌಂಚಾಸನವನ್ನು ನೇರ ನೆಲದ ಮೇಲೆ ಕುಳಿತು ಮಾಡಲು ಹೋದಾಗ ಯಾವ ಕಾಲನ್ನು ಮೇಲೆ ತೆಗೆದುಕೊಂಡಿರುತ್ತೇವೆಯೋ ಆ ಕಡೆ ಪೃಷ್ಠದ ಮೇಲೆ ಭಾರಬಿದ್ದು ನಿಯಂತ್ರಣ ತಪ್ಪುತ್ತದೆ ಅಂತಹವರು ಈ ರೀತಿ ಪೃಷ್ಠದ ಕೆಳಗೆ ಇಟ್ಟಿಗೆ ಇಟ್ಟು ಮಾಡುವುದರಿಂದ ಆಸನ ಸುಲಭವಾಗುವುದು. ಕಾಲುಗಳಿಗೆ ಶಕ್ತಿ ಬರುವುದು. ನಾಭಿಯಲ್ಲಿನ ಕೊಬ್ಬಿನಂಶ ಕರಗುವುದು. ಬೆನ್ನು ಮೂಳೆ ಹುರುಪು ಪಡೆಯುವುದು.