ಡೈಲಿ ಯೋಗ: ನಾಡಿ ಶುದ್ಧಿ ಕ್ರಿಯೆ ಪ್ರಾಣಾಯಾಮ

ಶರೀರದಲ್ಲಿ ಒಟ್ಟು 3,50,000 ನಾಡಿಗಳಿವೆ. ಅವುಗಳಲ್ಲಿ 72, 000 ನಾಡಿಗಳು ಪ್ರಮುಖವಾದವು ಇದರಲ್ಲಿ 14 ನಾಡಿಗಳು ಶ್ರೇಷ್ಠವಾದವು. ಇದರಲ್ಲಿ 4 ನಾಡಿಗಳು ಸೂಕ್ಷವಾದವು. ಅವುಗಳೆಂದರೆ ಚಂದ್ರ, ಸೂರ್ಯ, ಸುಶಮ್ನ ಮತ್ತು ಸರಸ್ವತಿ. ಈ ಎಲ್ಲಾ ನಾಡಿಗಳನ್ನು ಶುದ್ಧಿಗೊಳಿಸುವುದೇ ನಾಡಿ ಶುದ್ಧಿ ಕ್ರಿಯೆ ಪ್ರಾಣಾಯಾಮ.

ಮಾಡುವ ವಿಧಾನ: ಸಮತಟ್ಟವಾದ ನೆಲದ ಮೇಲೆ ದಪ್ಪನೆ ಬಟ್ಟೆ ಹಾಸಿ ಅದರ ಮೇಲೆ ಸ್ಥಿರವಾದ ಸ್ಥಿತಿಯಲ್ಲಿ ಕುಳಿತುಕೊಳ್ಳಿ. ಬಲ ಹಸ್ತದಲ್ಲಿ ಸೂರ್ಯ ಮುದ್ರೆ, ಎಡ ಹಸ್ತದಲ್ಲಿ ಆದಿ ಮುದ್ರೆ ಧರಿಸಬೇಕು. ಬಲಹಸ್ತದ ಹೆಬ್ಬೆರಳನ್ನು ಬಲ ಹೊಳ್ಳೆ ಮೇಲೆ ತಾಕೀಸಿ ಮುಚ್ಚಬೇಕು. ಎಡ ಹಸ್ತದಲ್ಲಿ ಮೊದಲು ಹೆಬ್ಬೆರಳನ್ನು ಮಡಚಿ ಉಳಿದ ನಾಲ್ಕು ಬೆರಳುಗಳನ್ನು ಹೆಬ್ಬೆರಳಿನ ಮೇಲೆ ಮಡಚಬೇಕು. ನಂತರ ಎಡಗಾಲಿನ ಮಂಡಿಯ ಮೇಲೆ ಹಸ್ತವನ್ನು ಮೇಲ್ಮುಖವಾಗಿ ಇರಿಸಬೇಕು. ಎಡಹೊಳ್ಳೆಯಿಂದ ಉಸಿರನ್ನು ಬಿಟ್ಟು ಉಸಿರನ್ನು ತೆಗೆದುಕೊಂಡು ಎಡಹೊಳ್ಳೆಯನ್ನು ಮುಚ್ಚಬೇಕು. ತೆಗೆದುಕೊಂಡ ಉಸಿರನ್ನು ಬಲಹೊಳ್ಳೆಯಿಂದ ಬಿಡಬೇಕು. ನಂತರ ಬಲ ಹೊಳ್ಳೆಯಿಂದ ಉಸಿರನ್ನು ತೆಗೆದುಕೊಂಡು ಎಡಹೊಳ್ಳೆಯಿಂದ ಬಿಡಬೇಕು. ಇದೇ ಕ್ರಮವನ್ನು ನಿಧಾನವಾಗಿ ನಿಶ್ಥವಾಗಿ ಒತ್ತಡವಿಲ್ಲದೆ ಏಕಾಗ್ರತೆಯಿಂದ 15 ರಿಂದ 20 ಸುತ್ತು ಅಭ್ಯಾಸ ಮಾಡಬೇಕು. ನಂತರ ಮುಚ್ಚಿದ ಕಣ್ಣು ಹಾಗೆ ಇರಬೇಕು. ಬಲಗೈಯನ್ನು ವಿಶ್ರಾಂತಿ ಗೊಳಿಸಿ ಬಲ ಗಾಲಿನ ಮಂಡಿಯ ಮೇಲೆ ತಾಕಿಸಬೇಕು. 2 ಹಸ್ತದಲ್ಲಿ ಧ್ಯಾನ ಮುದ್ರೆ ಇರಬೇಕು. ಇದೇ ಸ್ಥಿತಿಯಲ್ಲಿ ಒಂದು ನಿಮಿಷ ಸಾಮಾನ್ಯ ಉಸಿರಾಟ ಮಾಡಿ ನಂತರ 2 ಹಸ್ತಗಳನ್ನು ಉಜ್ಜಿ ಮುಚ್ಚಿದ ಕಣ್ಣುಗಳ ಮೇಲೆ ಮೃದುವಾಗಿ ತಾಕಿಸಬೇಕು. ಕಣ್ಣುಗಳನ್ನು ಬಿಟ್ಟು ಸಹಜ ಸ್ಥಿತಿಗೆ ಬರಬೇಕು.

ಉಪಯೋಗ: ಹೃದಯ ಒತ್ತಡ ನಿವಾರಣೆಯಾಗುತ್ತದೆ. ಶ್ವಾಸಕೋಶಗಳಿಗೆ ಧಾರಣ ಶಕ್ತಿ ಹೆಚ್ಚುತ್ತದೆ. ಶರೀರದ 72 ಸಾವಿರ ನಾಡಿಗಳು ಶುದ್ಧಿಯಾಗುತ್ತದೆ. ಉದರದ ಮಾಂಸ ಖಂಡಗಳಿಗೆ ಶಕ್ತಿ ಬರುತ್ತದೆ. ಮಲಬದ್ಧತೆ ನಿವಾರಣೆಯಾಗುತ್ತದೆ. ಹಸಿವು ಹೆಚ್ಚುತ್ತದೆ. ಶ್ವಾಸಕೋಶಕ್ಕೆ ಸಬಂಧಿಸಿದ ರೋಗಗಳು ನಿವಾರಣೆಯಾಗುತ್ತದೆ.