ಡೈಲಿ ಯೋಗ: ಭ್ರಮರಿ ಪ್ರಾಣಾಯಾಮ

ಭ್ರಮರ ಎಂದರೆ ಜೇನು ದುಂಬಿ. ಉಸಿರು ಹೊರ ಬಿಡುವಾಗ 'ಹಂ' ಎಂಬ ಜೇನು ನೊಣದ ಝೇಂಕಾರ ಶಬ್ಧವನ್ನು ಮಾಡುವ ಕಾರಣ ಈ ಪ್ರಾಣಾಯಾಮಕ್ಕೆ ಭ್ರಮರಿ ಎಂಬ ಹೆಸರು.

ಮಾಡುವ ವಿಧಾನ: ಈ ಪ್ರಾಣಾಯಾಮವನ್ನು ನಿಶ್ಯಬ್ದವಾದ ಸ್ಥಳದಲ್ಲಿ ಬೆಳಗ್ಗೆ ಅಥವಾ ರಾತ್ರಿ ಏಕಾಂತದಲ್ಲಿ ಅಭ್ಯಾಸ ಮಾಡಬಹುದು. ದೀರ್ಘವಾಗಿ ಉಸಿರನ್ನು ತೆಗೆದುಕೊಳ್ಳಿ ಹಾಗೆಯೆ ದೀರ್ಘವಾಗಿ ಉಸಿರನ್ನು ಬಿಡುವಾಗ ಹಂ ಎಂಬ ಝೇಂಕಾರ ಶಬ್ದ ಬರಬೇಕು. ಪುನಾರವರ್ತಿಸಿ ಈ ಕ್ರಿಯೆಯನ್ನು ಅಭ್ಯಾಸ ಮಾಡಬೇಕು. ಇದನ್ನು ಷಣ್ಮುಖಿ ಮುದ್ರೆಯಲ್ಲಿಯೇ ಮಾಡಬೇಕು.

ಷಣ್ಮುಖಿ ಮುದ್ರೆ ಧರಿಸುವ ವಿಧಾನ: ಎರಡು ಹಸ್ತಗಳನ್ನು ಮುಖದ ಕಡೆಗೆ ತಂದು, ಎರಡು ಮೊಣಕೈಗಳನ್ನು ಭುಜಗಳ ನೇರಕ್ಕೆ ತನ್ನಿ. ಹೊರಗಿನ ಶಬ್ದ ಕೇಳದಂತೆ ಹೆಬ್ಬೆರಳುಗಳಿಂದ ಕಿವಿಯ ರಂಧ್ರಗಳನ್ನು ಮುಚ್ಚಿ. ತೋರು ಬೆರಳನ್ನು ಮುಚ್ಚಿದ ಕಣ್ಣುಗಳ ರೆಪ್ಪೆಯ ಮೇಲೆ ತಾಗಿಸಿ. ಮಧ್ಯದ ಬೆರಳನ್ನು ಮೂಗಿನ ಹೊಳ್ಳೆಗಳ ಮೇಲೆ ತಾಗಿಸಿ ಆದರೆ ಮುಚ್ಚಬಾರದು. ಉಂಗುರದ ಬೆರಳನ್ನು ಮೇಲೆ ತುಟಿಯ ಮೇಲೆ ತಾಗಿಸಿ. ಕಿರುಬೆರಳನ್ನು ಕೆಳ ತುಟಿಯ ಮೇಲೆ ತಾಗಿಸಿ. ಹೀಗೆ 4 ರಿಂದ 8 ಬಾರಿ ಅಭ್ಯಾಸ ಮಾಡಬೇಕು.

ಉಪಯೋಗ: ಭ್ರಮರೀ ಪ್ರಾಣಾಯಾಮ ಮಾಡುವುದರಿಂದ ನಿದ್ರಾ ಹೀನತೆ ನಿವಾರಣೆಯಾಗುತ್ತದೆ. ಮನಸ್ಸಿಗೆ ಮತ್ತು ಮೆದುಳಿಗೆ ಶಾಂತಿ ದೊರೆಯುತ್ತದೆ.

ಎಂ. ಗಣೇಶ್‌, ದೀರ್ಘಾಯು