ಡೈಲಿ ಯೋಗ: ವಿಭಾಗೀಯ ಉಸಿರಾಟದಲ್ಲಿ ಉರಶ್ವಾಸ

ಉರಶ್ವಾಸ ಎಂದರೆ ಉಸಿರನ್ನು ತೆಗೆದುಕೊಳ್ಳುವಾಗ ಎದೆಯ ಭಾಗವನ್ನು ಹಿಗ್ಗಿಸುವ ಮತ್ತು ಉಸಿರನ್ನು ಬಿಡುವಾಗ ಕುಗ್ಗಿಸುವುದು.

ಮಾಡುವ ವಿಧಾನ: ಸುಖಾಸನದಲ್ಲಿ ನೇರವಾಗಿ ಕುಳಿತುಕೊಳ್ಳಬೇಕು. ಎರಡೂ ಹಸ್ತಗಳನ್ನು ಎದೆಯ ಮೇಲಿರಿಸಬೇಕು. ಕಣ್ಣುಗಳನ್ನು ಮುಚ್ಚಬೇಕು. ಎರಡು ಹಸ್ತಗಳ ಬೆರಳಿನ ತುದಿಯು ಪರಸ್ಪರ ತಾಗಿರಬೇಕು. ಎರಡು ತೋಳುಗಳು ಭುಜಕ್ಕೆ ಸಮವಾಗಿರಬೇಕು. ಈಗ ಪೂರ್ಣ ಉಸಿರನ್ನು ಬಿಡಬೇಕು(ರೇಚಕ). ಇದೇ ಸಮಯದಲ್ಲಿ ಎದೆಯ ಭಾಗವನ್ನು ಕುಗ್ಗಿಸಬೇಕು. ನಂತರ ಉಸಿರನ್ನು ತೆಗೆದುಕೊಳ್ಳುತ್ತಾ ಎರಡು ಹಸ್ತಗಳನ್ನು ಅಗಲಗೊಳಿಸುತ್ತ ಎದೆಯ ಭಾಗವನ್ನು ಮುಮ್ಮುಖವಾಗಿ ಹೊರ ಮುಖವಾಗಿ ಹಾಗೂ ಮೇಲ್ಮುಖವಾಗಿ ಹಿಗ್ಗಿಸಬೇಕು. ನಂತರ ಉಸಿರನ್ನು ಬಿಡುವಾಗ ಎದೆಯನ್ನು ಸಡಿಲಗೊಳಿಸಿ ಕುಗ್ಗಿಸಬೇಕು ಆಗ ಎರಡು ಹಸ್ತದ ಬೆರಳುಗಳನ್ನು ಪರಸ್ಪರ ತಾಕಿಸಬೇಕು. ಉಸಿರು ಬಿಡುವಾಗ ಎದೆಯಭಾಗ ಕುಗ್ಗಬೇಕು. ಉಸಿರು ತೆಗೆದುಕೊಳ್ಳುವಾಗ ಎದೆಯ ಭಾಗ ಹಿಗ್ಗಬೇಕು. ಈ ಸಮಯದಲ್ಲಿ ಉದರ ಭಾಗ ಸಡಿಲವಾಗಿರಬೇಕು. ಇದೇ ಕ್ರಮವನ್ನು 10ಬಾರಿ ಅಭ್ಯಾಸ ಮಾಡಬೇಕು.

ಉಪಯೋಗ: ಈ ಉಸಿರಾಟದ ಅಭ್ಯಾಸವು ಎದೆಯ ಗೂಡಿನ ಸಮಸ್ಯೆ ನಿವಾರಿಸುತ್ತದೆ. ಹೆಚ್ಚು ಶ್ರಮದ ಕೆಲಸವನ್ನು ಮಾಡುವಾಗ ಬರುವ ಏದುಸಿರನ್ನು ಹಾಗೂ ಕೆಲಸದ ಒತ್ತಡದಲ್ಲಿ ಆಗುವ ಆಯಾಸವನ್ನು ನಿವಾರಿಸುತ್ತದೆ.