ಡೈಲಿ ಯೋಗ: ಶೀತಳೀ ಪ್ರಾಣಾಯಾಮ

ಶರೀರವನ್ನು ತಂಪಾಗಿಸುವ ಪ್ರಾಣಾಯಾಮವನ್ನು ಶೀತಳೀ ಪ್ರಾಣಾಯಾಮ ಎನ್ನಲಾಗುತ್ತದೆ.

ಮಾಡುವ ವಿಧಾನ: ನೆಲದ ಮೇಲೆ ಹಾಸಿದ ಜಮಖಾನದ ಮೇಲೆ ಸ್ಥಿರವಾಗಿ, ನೇರವಾಗಿ ಕುಳಿತು ಕೊಳ್ಳಬೇಕು. ಎರಡೂ ಹಸ್ತಗಳು ತೊಡೆಯ ಮೇಲಿರಬೇಕು. ಭುಜಗಳು ಅಗಲವಾಗಿರಬೇಕು. ನೀವು ಅಭ್ಯಾಸ ಮಾಡುವ ಸ್ಥಳ ಸ್ವಚ್ಛ ಹಾಗೂ ನಿಶ್ಯಬ್ದವಾಗಿರಬೇಕು. ಮೂಗಿನ ಮೂಲಕ ಪೂರ್ಣ ಉಸಿರನ್ನು ಬಿಡಬೇಕು. ನಂತರ ನಾಲಿಗೆಯನ್ನು ಹೊರಗೆ ಚಾಚಿ ಸುರುಳಿಯಾಕಾರವಾಗಿ ಸುತ್ತಿ ತುಟಿಗಳಿಂದ ಬಿಗಿಗೊಳಿಸಿ(ಚಿತ್ರದಲ್ಲಿ ತೋರಿಸಿರುವಂತೆ). ನಾಲಿಗೆ ಮುಂಭಾಗದ ತುದಿಯ ರಂಧ್ರದಂತಿರುವ ಭಾಗದಿಂದ ಉಸಿರನ್ನು ತೆಗೆದುಕೊಳ್ಳಬೇಕು. ಉಸಿರು ತೆಗೆದುಕೊಳ್ಳುವಾಗ ಆಗುವ ತಂಪನ್ನು ಅನುಭವಿಸಬೇಕು. ಈಗ ನಾಲಿಗೆಯನ್ನು ಒಳಗಡೆ ತೆಗೆದುಕೊಳ್ಳಬೇಕು. ತುಟಿಗಳನ್ನು ಮುಚ್ಚಿ ಮೂಗಿನ ಮೂಲಕ ನಿಧಾನವಾಗಿ ಉಸಿರು ಬಿಡಬೇಕು. ಬಿಡುವಾಗ ಉಸಿರನ ಮೇಲೆ ಏಕಾಗ್ರತೆ ಇರಬೇಕು. ಪ್ರತಿದಿನ 9 ಬಾರಿ ಪುನಾರಾವರ್ತಿಸಿ ಅಭ್ಯಾಸ ಮಾಡಬೇಕು.

ಉಪಯೋಗ: ಈ ಪ್ರಾಣಾಯಾಮ ದೇಹವನ್ನು ತಂಪಾಗಿಸಿ, ಕಣ್ಣು ಕಿವಿಗಳನ್ನು ಶಾಂತವಾಗಿಡುತ್ತದೆ. ಸಣ್ಣ ಜ್ವರ ಇರುವಾಗ ಈ ಪ್ರಾಣಾಯಾಮ ಮಾಡಿದರೆ ಗುಣಮುಖವಾಗುವ ಸಾಧ್ಯತೆ ಹೆಚ್ಚು. ಪಿತ್ತವಿಕಾರ ರೋಗಗಳು ನಿವಾರಣೆಯಾಗುತ್ತವೆ. ಜೀರ್ಣಶಕ್ತಿಯನ್ನು ವೃದ್ಧಿಸುತ್ತದೆ. ದುರ್ಗಂಧ ಶ್ವಾಸ ಸಮಸ್ಯೆ ಇರುವವರಿಗೆ ಈ ಪ್ರಾಣಾಯಾಮ ಪ್ರಯೋಜನಕಾರಿ. ಮೂಗು ಕಟ್ಟಿದ್ದಾಗಲೂ ಈ ಪ್ರಾಣಾಯಾಮ ಅಭ್ಯಾಸ ಮಾಡಬಹುದು.

ಸೂಚನೆ: ಶೀತಕ್ಕೆ ಸಂಬಂಧಿಸಿದ ಸಮಸ್ಯೆಗಳಿದ್ದಾಗ ಶೀತಳೀ ಪ್ರಾಣಾಯಾಮ ಮಾಡಬಾರದು.