ಡೈಲಿ ಯೋಗ: ಇಟ್ಟಿಗೆಗಳ ಸಹಾಯದಿಂದ ಉಷ್ಟ್ರಾಸನ

ವಿವರಣೆ :- ಜಮಖಾನವನ್ನು ನೆಲದ ಮೇಲೆ ಹಾಸಬೇಕು. ನಂತರ ಜಮಖಾನದ ಮಧ್ಯದ ಭಾಗದಲ್ಲಿ ವಜ್ರಾಸನದಲ್ಲಿ ಕುಳಿತುಕೊಳ್ಳಬೇಕು ಹಾಗೂ ಕಾಲಿನ ಮಣಿಗಂಟಿನ ಪಕ್ಕದಲ್ಲಿ ಎರಡು ಇಟ್ಟಿಗೆಗಳನ್ನು ಉದ್ದವಾಗಿ ಇಡಬೇಕು. ನಂತರ ನಿಧಾನವಾಗಿ ಪೃಷ್ಠವನ್ನು ಮೇಲೆ ಎತ್ತಿ ಮಂಡಿಗಳ ಮೇಲೆ ನಿಂತು ಎರಡೂ ಕೈಗಳನ್ನು ಹಿಂದೆ ತೆಗೆದುಕೊಂಡು ಇಟ್ಟಿಗೆಯ ಮೇಲೆ ಊರಬೇಕು. ಹಸ್ತವನ್ನು ಇಟ್ಟಿಗೆಯ ಮೇಲೆ ಒತ್ತುತ್ತ ಎದೆಯನ್ನು ಮೇಲೆ ಎತ್ತಬೇಕು. ಮೊಣಕಾಲುಗಳು ನೆಲದಲ್ಲಿರಲಿ. ಸೊಂಟದ ಭಾಗವನ್ನು ಮುಂದೆ ತಳ್ಳುತ್ತಿರಬೇಕು. ದೃಷ್ಟಿ ಮೇಲೆ ಇರಲಿ. ಈ ಆಸನದಲ್ಲಿ ಸಹಜ ಉಸಿರಾಟ ಕ್ರಿಯೆ ಇರಲಿ. ಈ ರೀತಿ ಸ್ವಲ್ಪ ಸಮಯವಿದ್ದು ನಂತರ ವಾಪಸ್‌ ಬರಬೇಕು.

ಉಪಯೋಗ:- ಕೆಲವರಿಗೆ ಉಷ್ಟ್ರಾಸನದಲ್ಲಿ ಕೈಗಳಿಗೆ ಹಿಮ್ಮಡಿ ಸಿಗುವುದಿಲ್ಲ ಅಂತಹವರು ಹಾಗೂ ಯಾರಿಗೆ ಬೆನ್ನಿನ ಭಾಗ ಕೆಳಗೆ ಕುಸಿಯುವುದೋ ಸೊಂಟದ ಭಾಗವನ್ನು ಮುಂದೆ ತಳ್ಳಲು ಸಾಧ್ಯವಾಗುವುದಿಲ್ಲವೋ ಅಂತಹವರು ಈ ರೀತಿ ಇಟ್ಟಿಗೆಗಳಿಂದ ಆಸನ ಮಾಡುವುದು ಪ್ರಯೋಜನಕಾರಿ. ಎದೆಯ ಭಾಗ ವಿಶಾಲವಾಗುವುದು. ಗೂನುಬೆನ್ನು ದೂರವಾಗಿ ಬೆನ್ನಿನ ಭಾಗಕ್ಕೆ ಚೈತನ್ಯ ಬರುವುದು. ಥೈರಾಯ್ಡ್‌, ಅಸ್ತಮ, ಹೃದ್ರೋಗ ಸಮಸ್ಯೆ ನಿವಾರಣೆಗೆ ಉತ್ತಮ ಆಸನ. ಮಂಡಿನೋವು ಇರುವವರು ಈ ಆಸನ ಮಾಡದಿರುವುದು ಸೂಕ್ತ.