ಡೈಲಿ ಯೋಗ: ದೇಹದ ತೂಕ ಕಡಿಮೆ ಮಾಡುವ ವ್ಯಾಯಾಮ 3

ವಿವರಣೆ: ಜಮಖಾನವನ್ನು ನೆಲದ ಮೇಲೆ ಹಾಸಿ. ನಂತರ ಆ ಜಮಖಾನದ ಮೇಲೆ ಸುಖಾಸನದಲ್ಲಿ ಕುಳಿತುಕೊಳ್ಳಿ. ಈಗ ಎರಡೂ ಕೈಗಳನ್ನು ತಲೆಯ ಹಿಂದೆ ತೆಗೆದುಕೊಂಡು(ಕೈ ಬೆರಳುಗಳು ಒಂದಕ್ಕೊಂದು ಸೇರಿರಲಿ) ಮೊಣಕೈಗಳನ್ನು ಭುಜದ ನೇರದಲ್ಲಿ ಹಿಂದೆ ತೆಗೆದುಕೊಳ್ಳಿ. ಬೆನ್ನು ನೇರವಾಗಿರಲಿ. ಈಗ ಉಸಿರನ್ನು ತೆಗೆದುಕೊಳ್ಳುತ್ತ ಬಲ ಭಾಗಕ್ಕೆ ಹಿಂದೆ ತಿರುಗಿ ಬಲಮೊಣಕೈಯನ್ನು ಹಿಂದೆ ತೆಗೆದುಕೊಂಡು ಎಡ ಮೊಣಕೈಯನ್ನು ಮುಂದೆ ತೆಗೆದುಕೊಳ್ಳಿ. ಈಗ ಉಸಿರನ್ನು ಹೊರ ಹಾಕುತ್ತ ಮುಂದೆ ಬಾಗಿ ಎರಡೂ ಮೊಣಕಾಲುಗಳ ಮಧ್ಯದಲ್ಲಿ ನೆಲಕ್ಕೆ ಎಡಮೊಣಕೈಯನ್ನು ತಾಗಿಸಿ. ಐದು ಬಾರಿ ದೀರ್ಘ ಉಸಿರಾಟ ಮಾಡಿ. ನಂತರ ಉಸಿರನ್ನು ತೆಗೆದು ಕೊಳ್ಳುತ್ತ ಮೇಲೆ ಬನ್ನಿ ನಂತರ ಇದೇ ರೀತಿ ಮತ್ತೊಂದು ಕಡೆ ಆಸನ ಮುಂದುವರಿಸಬೇಕು ಹಾಗೂ ಒಂದೊಂದು ಕಡೆ ಮೂರು ಮೂರು ಬಾರಿ ಇದೇ ರೀತಿ ಮಾಡಬೇಕು.

ಉಪಯೋಗ: ಬೆನ್ನಿನ ಭಾಗ ಹುರುಪುಗೊಳ್ಳುವುದು. ನಾಭಿ ಮತ್ತು ಪಕ್ಕೆಲುಗಳಲ್ಲಿನ ಅಧಿಕ ಕೊಬ್ಬಿನಂಶ ಕರಗುವುದು. ಹೊಟ್ಟೆ ಭಾಗದ ಸುತ್ತಳತೆ ಕಡಿಮೆಯಾಗುವುದು. ಗ್ಯಾಸ್ಟ್ರಿಕ್‌, ಡಯಾಬೀಟಿಸ್‌, ಅಜೀರ್ಣ ಸಮಸ್ಯೆ ನಿವಾರಣೆಗೆ ಉತ್ತಮ ವ್ಯಾಯಾಮ.