ಪ್ರಧಾನಿ ಸಾಯಲಿ ಎನ್ನಲಿಲ್ಲ: ರಾಯರೆಡ್ಡಿ

ಕೊಪ್ಪಳ: ಪ್ರಧಾನಿ ನರೇಂದ್ರ ಮೋದಿ ಬಗ್ಗೆ ನನಗೆ ಅಪಾರ ಗೌರವ ಇದೆ. ಅವರು ಸಾಯಲಿ ಎಂದು ಹೇಳಲಿಲ್ಲ ಎಂದು ಉನ್ನತ ಶಿಕ್ಷಣ ಸಚಿವ ಬಸವರಾಜ ರಾಯರೆಡ್ಡಿ ಹೇಳಿದ್ದಾರೆ.

ಪ್ರಧಾನಿ ಬಗ್ಗೆ ನೀಡಿದ್ದ ಹೇಳಿಕೆ ವಿಚಾರವಾಗಿ ಟೀಕೆ ವ್ಯಕ್ತವಾದ ನಂತರ, ತುರ್ತು ಸುದ್ದಿಗೋಷ್ಠಿ ಕರೆದು ರಾಯರೆಡ್ಡಿ ಸ್ಪಷ್ಟೀಕರಣ ನೀಡಿದ್ದಾರೆ.

'ಪ್ರಧಾನಿ ಸಾಯಲಿ ಎಂದು ಹೇಳಿಲ್ಲ. ಅಧಿಕಾರದಲ್ಲಿ ಇರುವವರು ತ್ಯಾಗಕ್ಕೆ ಸಿದ್ಧರಾಗಬೇಕು ಎಂಬುದನ್ನು ಮಾರ್ಮಿಕವಾಗಿ ಹೇಳಿದ್ದೆ. ತಿಳಿವಳಿಕೆ ಮಟ್ಟ ಕಡಿಮೆ ಇರುವ ಕೆಲವರು ತಪ್ಪಾಗಿ ಅರ್ಥೈಸಿದ್ದಾರೆ,' ಎಂದು ಬಸವರಾಜ ರಾಯರೆಡ್ಡಿ ಹೇಳಿದರು.

'ನಾನು ಮಾನಸಿಕ ಸ್ಥಿಮಿತ ಕಳೆದುಕೊಂಡಿದ್ದರೆ ಬೆಂಗಳೂರಿನ ಮೆಂಟಲ್ ಆಸ್ಪತ್ರೆಗೆ ಹೋಗಲು ಸಿದ್ಧನಿದ್ದೇನೆ. ಆಗಲಾದರೂ, ನಾನು ಮಾನಸಿಕವಾಗಿ ಫಿಟ್ ಆಗಿದ್ದೇನೆ ಎಂಬುದನ್ನು ಮಧುಸೂದನ್ ತಿಳಿದುಕೊಳ್ಳಲಿ,' ಎಂದರು.

'ವಿಐಪಿ ಸಂಸ್ಕೃತಿ ದೇಶದಿಂದ ತೊಲಗಬೇಕಿದೆ. ಈ ಬಗ್ಗೆ ರಾಷ್ಟ್ರಮಟ್ಟದಲ್ಲಿ ಚರ್ಚೆ ನಡೆಯಬೇಕಿದೆ.ಮಾಧ್ಯಮ ಸ್ವಾತಂತ್ರ್ಯದ ಬಗ್ಗೆ ನನಗೆ ಗೌರವ ಇದೆ. ನಾನು ಉದ್ದೇಶಪೂರ್ವಕವಾಗಿ ಯಾವುದನ್ನು ಹೇಳಿಲ್ಲ,'ಎಂದು ರಾಯರೆಡ್ಡಿ ಹೇಳಿದ್ದಾರೆ.

'ನನ್ನ ಮಾತಿನ ಅರ್ಥ ಉದ್ದೇಶ ಪ್ರಧಾನಮಂತ್ರಿ ಸಾಯಲಿ ಎಂದಲ್ಲ. ಭಯದ ವಾತಾವರಣದಲ್ಲಿ ರಾಜಕಾರಣಿಗಳು ಕೆಲಸ ಮಾಡಬಾರದು. ರಾಜಕಾರಣಿ ಹಾಗೂ ವಿಐಪಿಗಳಿರುವ ಭದ್ರತೆ ತೆಗೆಯಬೇಕು. ಇದರಿಂದ ಅನಾವಶ್ಯಕ ವೆಚ್ಚಕ್ಕೆ ಕಡಿವಾಣ ಹಾಕಿದಂತಾಗುತ್ತದೆ. ಸಾಮಾನ್ಯ ಭದ್ರತೆ ಒದಗಿಸಲಿ. ಆದರೆ, ಅತಿಯಾದ ಭದ್ರತೆಯಿಂದ ಹಣ ವ್ಯಯವಾಗುತ್ತಿದೆ,'ಎಂದಿದ್ದಾರೆ.