ಕೆರೆಗೆ ತಡೆ ಗೋಡೆ: 1.5 ಕೋಟಿ ಅನುದಾನ

ತೇರದಾಳ : ಪಟ್ಟಣದ ಜಿರಗೇರಿಗೆ ತಡೆಗೋಡೆ ಮತ್ತು ರಸ್ತೆ ಅಗಲೀಕರಣಕ್ಕಾಗಿ 1.5ಕೋಟಿ ಅನುದಾನ ಬಿಡುಗಡೆಯಾಗಿ ಟೆಂಡರ್‌ ಕೂಡ ಆಗಿದೆ. ಲೋಕೋಪಯೋಗಿ ಇಲಾಖೆ ಹಿರಿಯ ಅಧಿಕಾರಿಗಳು ಕಾಮಗಾರಿ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದರು.

ಈ ಸಂದರ್ಭದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಇಲಾಖೆ ಜಮಖಂಡಿ ವಿಭಾಗದ ಎಇಇ ಎಸ್‌.ಬಿ.ಚೌಡನ್ನವರ, 2017-18ನೇ ಸಾಲಿನಲ್ಲಿ ಈ ಯೋಜನೆ ಮಂಜೂರಾಗಿದ್ದು, ಹಿಂದಿನ ಮುಖ್ಯಮಂತ್ರಿ ಈ ಕಾಮಗಾರಿ ಯೋಜನೆಗೆ ಚಾಲನೆ ನೀಡಿದ್ದರು. ಕಾಮಗಾರಿಯ ಟೆಂಡರ್‌ ಕೂಡ ಆಗಿದ್ದು, ಕಾಮಗಾರಿ ಶೀಘ್ರದಲ್ಲಿ ಪ್ರಾರಂಭಗೊಳ್ಳಲಿದೆ ಎಂದು ತಿಳಿಸಿದರು. ಸುಮಾರು 150 ಮೀಟರ್‌ ತಡೆಗೋಡೆ ನಿರ್ಮಿಸಲಾಗುವುದು. ಜೊತೆಗೆ ಸಿಸಿ ರಸ್ತೆ ಮತ್ತು ರಸ್ತೆ ವಿಭಜಕ ಅಳವಡಿಸುವ ಕ್ರಮ ಕೈಗೊಳ್ಳಲಾಗುವುದು. ಜಮಖಂಡಿ-ಕಾಗವಾಡ ರಾಜ್ಯ ಹೆದ್ದಾರಿ ಮಾರ್ಗ ಆಗಿದ್ದರಿಂದ ಕೆರೆಯ ದಂಡೆ ಹತ್ತಿರ ಸಾಕಷ್ಟು ರಸ್ತೆ ಇಕ್ಕಟ್ಟಾಗಿತ್ತು. ಇದರಿಂದ ವಾಹನಗಳಿಗೆ ತೀವ್ರ ತೊಂದರೆ ಆಗುತ್ತಿತ್ತು. ಆದ್ದರಿಂದ ಈ ಯೋಜನೆ ಕೈಗೊಳ್ಳಲಾಗಿದೆ. ಕಾಮಗಾರಿ ಪೂರ್ಣಗೊಳ್ಳುವವರೆಗೆ ಸಾರ್ವಜನಿಕರು ಹಾಗೂ ವಾಹನಸವಾರರು ಸಹಕಾರ ನೀಡಬೇಕೆಂದು ಮನವಿ ಮಾಡಿದ್ದಾರೆ. ಇಲಾಖೆ ಜಿಲ್ಲಾ ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿ ಎಸ್‌.ಜಿ.ಪಾಟೀಲ, ಜೋಗಿ, ಎಇ ಬಿರಾದಾರ, ಶೆಟ್ಟೆಪ್ಪ ಸುಣಗಾರ, ರಾಜೇಸಾಬ ನಗಾರ್ಜಿ ಸೇರಿದಂತೆ ಇನ್ನಿತರು ಇದ್ದರು.