ಬಸ್‌ ರಿವರ್ಸ್‌: ಮಗು ಸಾವು

ಬಾಗಲಕೋಟ: ಶಾಲಾ ವಾಹನದಡಿಗೆ ಬಿದ್ದು ನಾಲ್ಕು ವರ್ಷದ ಹೆಣ್ಣುಮಗುವೊಂದು ಮೃತಪಟ್ಟ ಘಟನೆ ಹುನಗುಂದ ತಾಲೂಕಿನ ಹಾವರಗಿಯಲ್ಲಿ ನಡೆದಿದೆ.

ಅಂಜಲಿ ಗೌಡರ (೪) ಮೃತ ಬಾಲಕಿ. ಮಲ್ಲಿಕಾರ್ಜುನ ಶಾಲೆಯ ವಿದ್ಯಾರ್ಥಿನಿಯಾಗಿದ್ದ ಮಗು ಶಾಲೆಯ ಬಸ್‌ನಿಂದ ಕೆಳಗಿಳಿದು ತೆರಳುತ್ತಿದ್ದಾಗ ಘಟನೆ ನಡೆದಿದೆ.

ವಿದ್ಯಾರ್ಥಿನಿ ಬಸ್ ಹಿಂಭಾಗದಲ್ಲಿರುವುದನ್ನು ಗಮನಿಸದ ಚಾಲಕ ರಿವರ್ಸ್‌ ತೆಗೆದುಕೊಂಡಾಗ ಬಾಲಕಿಯ ತಲೆಗೆ ಬಡಿದಿದೆ. ತೀವ್ರವಾಗಿ ಗಾಯಗೊಂಡ ಬಾಲಕಿಯನ್ನು ಆಸ್ಪತ್ರೆಗೆ ದಾಖಲಿಸಿದರೂ ಪ್ರಯೋಜನವಾಗದೆ ಮೃತಪಟ್ಟಿದ್ದಾಳೆ. ಹುನಗುಂದ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಬಸ್ ಚಾಲಕ ಸಂಗಯ್ಯ ವಿರುದ್ಧ ದೂರು ದಾಖಲಿಸಲಾಗಿದೆ.