ನೀತಿ ಸಂಹಿತೆ ಉಲ್ಲಂಘನೆ: ಮದ್ಯ ವಶ

ಬಾಗಲಕೋಟ: ಜಿಲ್ಲೆಯ ನಾನಾ ಕಡೆ ಅಬಕಾರಿ ಇಲಾಖೆ ಅಧಿಕಾರಿಗಳು ಅಕ್ರಮ ಮದ್ಯದ ಸಂಗ್ರಹ, ಕಳ್ಳಬಟ್ಟಿ ಸಾರಾಯಿ ಮೇಲೆ ದಾಳಿ ನಡೆಸಿ 29 ಲಕ್ಷ , 72 ಸಾವಿರ, 930 ರೂ. ಮೌಲ್ಯದ ಮದ್ಯವನ್ನು ವಶಕ್ಕೆ ಪಡೆದಿದ್ದಾರೆ.

ಜಿಲ್ಲೆಯ ಬೀಳಗಿ ಕ್ರಾಸ್‌ನಲ್ಲಿ ದ್ವಿಚಕ್ರ ವಾಹನದಲ್ಲಿ ಅಕ್ರಮವಾಗಿ ಮದ್ಯ ಮತ್ತು ಬೀರ್‌ ಸಾಗಾಟ ಮಾಡುತ್ತಿರುವುದನ್ನು ಪತ್ತೆಹಚ್ಚಿ 5.38 ಲೀ. ಮದ್ಯ ಮತ್ತು 6.5 ಲೀ. ಬೀರ್‌ ಹಾಗೂ ಒಂದು ದ್ವಿಚಕ್ರ ವಾಹನ ಜಪ್ತಿ ಮಾಡಲಾಗಿದೆ. ಬೀಳಗಿ ವಲಯದ ಸಿರಗುಪ್ಪಿ ಗ್ರಾಮದ ಹತ್ತಿರ ದ್ವಿಚಕ್ರ ವಾಹನದಲ್ಲಿ ಸಾಗಿಸುತ್ತಿದ್ದ 10 ಲೀ. ಕಳ್ಳಬಟ್ಟಿ ಸಾರಾಯಿ ಹಾಗೂ ಒಂದು ದ್ವಿಚಕ್ರ ವಾಹನ ವಶಕ್ಕೆ ಪಡೆಯಲಾಗಿದೆ.

ಹುನಗುಂದ ವಲಯದ ಕಮತಗಿ ಪಟ್ಟಣದಲ್ಲಿ ಅಕ್ರಮವಾಗಿ ಮಾರಾಟ ಮಾಡುತ್ತಿದ್ದ 6 ಲೀ. ಕಳ್ಳಬಟ್ಟಿ ಸಾರಾಯಿ ವಶಕ್ಕೆ ಪಡೆದು, ಆರೋಪಿಯನ್ನು ನ್ಯಾಯಾಂಗ ವಶಕ್ಕೆ ನೀಡಲಾಗಿದೆ. ಬೀಳಗಿ ಹಾಗೂ ಕಮತಗಿ ಸೇರಿ ಒಟ್ಟು 5,900 ರೂ. ಮೌಲ್ಯದ ಮದ್ಯ ವಶಪಡಿಸಿಕೊಳ್ಳಲಾಗಿದೆ.

ಜಮಖಂಡಿ ವಲಯದ ಕರ್ನಾಟಕ ಪಾನೀಯ ನಿಗಮದ ಉಗ್ರಾಣದಲ್ಲಿ ಬಾರ್‌ ಕೋಡ್‌ ಹೊಂದಾಣಿಕೆ ಇಲ್ಲದೆ ಸಂಗ್ರಹಿಸಿಡಲಾಗಿದ್ದ 14,86,980 ರೂ. ಮೌಲ್ಯದ 9,012 ಲೀ. ಬೀರ್‌ನ್ನು ಜಮಖಂಡಿ ಅಬಕಾರಿ ಅಧಿಕಾರಿಗಳು ವಶಕ್ಕೆ ಪಡೆದು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಬಾಗಲಕೋಟ ವಲಯದ ಕರ್ನಾಟಕ ಪಾನೀಯ ನಿಗಮದ ಉಗ್ರಾಣದಲ್ಲಿ ಬಾರ್‌ ಕೋಡ್‌ ಹೊಂದಾಣಿಕೆ ಇಲ್ಲದೇ ಸಂಗ್ರಹಿಸಲಾಗಿದ್ದ 14,80,050 ರೂ. ಮೌಲ್ಯದ 8,970 ಲೀ. ಬೀರನ್ನು ಬಾಗಲಕೋಟ ಉಪ ವಿಭಾಗದ ಅಬಕಾರಿ ಅಧಿಕಾರಿಗಳು ವಶಕ್ಕೆ ಪಡೆದು ಪ್ರಕರಣ ದಾಖಲಿಸಿದ್ದಾರೆ. ಒಟ್ಟು 29,72,930 ರೂ. ಮೌಲ್ಯದ ಮದ್ಯವನ್ನು ವಶಕ್ಕೆ ಪಡೆದುಕೊಳ್ಳಲಾಗಿದೆ ಎಂದು ಜಿಲ್ಲಾಧಿಕಾರಿ ಕಚೇರಿ ಪ್ರಕಟಣೆ ತಿಳಿಸಿದೆ.