ಸಿದ್ದರಾಮಯ್ಯ ಮತಾಂಧ ಹೇಳಿಕೆ: ಈಶ್ವರಪ್ಪ ಸಮರ್ಥನೆ

ಬಾಗಲಕೋಟೆ: ಸಿದ್ದರಾಮಯ್ಯ ಓರ್ವ ಮತಾಂಧ ಎಂಬ ಮಂಗಳೂರು ಸಂಸದ ನಳಿನ್ ಕುಮಾರ್ ಕಟೀಲ್ ಹೇಳಿಕೆಯನ್ನು ಮಾಜಿ ಡಿಸಿಎಂ, ಬಿಜೆಪಿ ನಾಯಕ ಕೆ. ಎಸ್‌. ಈಶ್ವರಪ್ಪ ಸಮರ್ಥಿಸಿಕೊಂಡಿದ್ದಾರೆ. ಬಾಗಲಕೋಟೆಯಲ್ಲಿ ಹೇಳಿಕೆ ನೀಡಿದ ಅವರು, ಸಿದ್ದರಾಮಯ್ಯ ಒಬ್ಬ‌ ಮತಾಂಧ ಅನ್ನೋದ್ರಲ್ಲಿ ಅನುಮಾನವಿಲ್ಲ. ಆದ್ರೆ ಸಿದ್ದರಾಮಯ್ಯರನ್ನು ಟಿಪ್ಪುಗೆ ಹೋಲಿಸಿರೋದು ಎಷ್ಟರಮಟ್ಟಿಗೆ ಸರಿಯಿದೆ ಅನ್ನೋದು ನನಗೆ ಗೊತ್ತಿಲ್ಲ ಎಂದಿದ್ದಾರೆ.

ಕಣ್ಣೆದುರು 21 ಜನ ಯುವಕರ ಕಗ್ಗೊಲೆಯಾಯ್ತು. ಆಗ ಸಿದ್ದರಾಮಯ್ಯ ಕೊಲೆಗಡುಕರ ವಿರುದ್ಧ ಕ್ರಮಕೈಗೊಂಡಿದ್ರೆ ಸಿದ್ದರಾಮಯ್ಯರನ್ನು ಸರಿಯಾದ ಮುಖ್ಯಮಂತ್ರಿ ಎಂದು ಒಪ್ಪುತ್ತಿದ್ದೆ. ಆದರೆ ಅದು ಬಿಟ್ಟು ಕೊಲೆಗಡುಕರನ್ನು ಬಿಟ್ಟು ಕೋಮುವಾದಿಗಳನ್ನು ಹತ್ತಿಕ್ಕುತ್ತೇವೆಂದು ಸಪೋರ್ಟ್ ನೀಡಿದ್ದಾರೆ. ಹಾಗಾಗಿ ಸಿದ್ದರಾಮಯ್ಯ ಒಬ್ಬ ಮತಾಂಧ ಅನ್ನೋದನ್ನು ಒಪ್ಪುತ್ತೇನೆ ಎಂದಿದ್ದಾರೆ.

ಸಚಿವ ಜಮೀರ್ ಹೇಳಿಕೆಗೆ ಟಾಂಗ್ ನೀಡಿದ ಈಶ್ವರಪ್ಪ, ಹಿಂದೂ ಮುಸ್ಲಿಂ ದೂರ ದೂರ ಹೋಗೋಕೆ ಕಾಂಗ್ರೆಸ್ ಕಾರಣ. ಬಿಜೆಪಿ ಅಧಿಕಾರದಲ್ಲಿದ್ದಾಗ ಹಿಂದೂ ಮುಸ್ಲಿಂ ಗಲಭೆ ಆಗಿಲ್ಲ. ಇತಿಹಾಸವೇ ಹೇಳ್ತಿದೆ ಟಿಪ್ಪು ಒಬ್ಬ ಕೊಲೆಗಾರ ಎಂದು. ಬಿಜೆಪಿ 104 ಸೀಟ್ ಪಡೆದಿದ್ರೆ ಕಾಂಗ್ರೆಸ್ 78 ಪಡೆದಿದೆ, ಇದನ್ನು ನೋಡಿ ಜಮೀರ್ ಮಾತನಾಡಬೇಕು. ಕುಮಾರಸ್ವಾಮಿ ದೂರ ಉಳಿದಿರೋದಕ್ಕೆ ಕಾರಣ ಏನು. ಇದಕ್ಕೆ ಸಿಎಂ ಸ್ಪಷ್ಟನೆ ನೀಡಲಿ ಎಂದು ಈಶ್ವರಪ್ಪ ಆಗ್ರಹಿಸಿದ್ದಾರೆ.