ಝೋನ್‌ನಲ್ಲೇ ಡ್ರೋನ್‌ ಹಾರಿಸಿ

ರವಿರಾಜ್‌ ಆರ್‌.ಗಲಗಲಿ ಬಾಗಲಕೋಟ

ದೇಶಾದ್ಯಂತ ಡ್ರೋನ್‌ ಕ್ಯಾಮೆರಾ ಬಳಸುವವರು ಇನ್ನು ಝೋನ್‌ ನೋಡಿ ಡ್ರೋನ್‌ ಹಾರಿಸಬೇಕಾಗುತ್ತದೆ, ಡೈರೆಕ್ಟರ್‌ ಜನರಲ್‌ ಆಫ್‌ ಸಿವಿಲ್‌ ಏವಿಯೇಶನ್‌ ವಲಯಗಳನ್ನು ಗುರುತಿಸುವ ಸಮೀಕ್ಷೆಗೆ ಚಾಲನೆ ನೀಡಿದೆ.

ದೇಶದಲ್ಲಿ ಡ್ರೋನ್‌ಗಳು ನಾನಾ ಕಾರಣಗಳಿಗಾಗಿ ವ್ಯಾಪಕವಾಗಿ ಬಳಕೆಯಾಗುತ್ತಿರುವ ಹಿನ್ನೆಲೆಯಲ್ಲಿ ಕೇಂದ್ರ ಸರಕಾರ ಡ್ರೋನ್‌ಗಳ ಬಳಕೆಯ ನಿಯಂತ್ರಣಕ್ಕಾಗಿ ಡಿ.1ರಿಂದ ಹೊಸ ನಿಯಮ ರೂಪಿಸಿತು. ಹೊಸ ನಿಯಮದ ಅನ್ವಯ ಸ್ಥಳೀಯ ಪೊಲೀಸ್‌ ಠಾಣೆಯಿಂದ ಅನುಮತಿ ಪಡೆದು ಡ್ರೋನ್‌ ಹಾರಾಟ ಕೈಗೊಳ್ಳಬಹುದಾಗಿದೆ. ಇದರೊಂದಿಗೆ ಯಾವ ಪ್ರದೇಶದಲ್ಲಿ ಡ್ರೋನ್‌ ಹಾರಿಸಬಹುದು ಎಂಬ ಬಗ್ಗೆ ಡೈರೆಕ್ಟರ್‌ ಜನರಲ್‌ ಆಫ್‌ ಸಿವಿಲ್‌ ಏವಿಯೇಶನ್‌(ಡಿಜಿಸಿಎ)ಸಮೀಕ್ಷೆ ಆರಂಭಿಸಿದೆ. ಕೇಂದ್ರ ಗೃಹ ಇಲಾಖೆಯಿಂದ ರಾಜ್ಯದ ಪೊಲೀಸ್‌ ಇಲಾಖೆ ಮೂಲಕ ಸಮೀಕ್ಷೆ ನಡೆಸಲಾಗಿದೆ.

ಏನಿದು ವಲಯಗಳು ?

ಸಾಮಾನ್ಯವಾಗಿ ಡ್ರೋನ್‌ಗಳನ್ನು ಮದುವೆ, ಸಾರ್ವಜನಿಕ ಸಮಾರಂಭಗಳು, ರಾಜಕೀಯ ಪಕ್ಷಗಳ ರಾರ‍ಯಲಿಗಳಲ್ಲಿ ಬಳಸಲಾಗುತ್ತಿದೆ. ಆದರೆ ಕೆಲವೊಮ್ಮೆ ಸೂಕ್ಷ್ಮ ಪ್ರದೇಶಗಳಲ್ಲೂ ಡ್ರೋನ್‌ ಹಾರಾಟ ನಡೆಸಲಾಗುತ್ತದೆ. ಹೀಗೆ ಸೂಕ್ಷ್ಮವಾದ ಪ್ರದೇಶಗಳಲ್ಲಿ ಡ್ರೋನ್‌ ಮೂಲಕ ಚಿತ್ರೀಕರಣ ನಡೆಸದಂತೆ ಎಚ್ಚರಿಕೆ ವಹಿಸಲು ಮೂರು ವಲಯಗಳನ್ನು ಗುರುತಿಸಲಾಗಿದೆ. ಕೆಂಪು ವಲಯ ಎಂದು ಗುರುತಿಸಲಾದ ವಲಯದಲ್ಲಿ ಸರಕಾರಿ ಕಚೇರಿಗಳು, ಪರಮಾಣು ಸ್ಥಾವರ, ಸೇನೆಯ ಪ್ರದೇಶ, ಪ್ರಮುಖ ಕಟ್ಟಡಗಳು ಇರಲಿವೆ. ಹಳದಿ ವಲಯದಲ್ಲಿ ಸ್ಮಾರಕಗಳು, ಸಂರಕ್ಷಿತ ಸ್ಥಳಗಳು ಇರಲಿವೆ. ಇನ್ನು ಹಸಿರು ವಲಯದಲ್ಲಿ ಇನ್ನುಳಿದ ಪ್ರದೇಶಗಳಿರಲಿವೆ. ಕೆಂಪು ವಲಯದ ವ್ಯಾಪ್ತಿಯಲ್ಲಿ ಬರುವ ಪ್ರದೇಶಗಳನ್ನು ಬಹುತೇಕ ಡ್ರೋನ್‌ ನಿಷೇಧಿತ ಪ್ರದೇಶಗಳೆಂದು ಘೋಷಿಸುವ ಸಾಧ್ಯತೆಯಿದೆ.

ಪೊಲೀಸರಿಂದ ವರದಿ

ಮೂರು ವಲಯಗಳ ಬಗ್ಗೆ ಆಯಾ ರಾಜ್ಯಗಳ ಪೊಲೀಸ್‌ ಇಲಾಖೆಗಳಿಂದ ಡಿಜಿಸಿಎಗೆ ಪಟ್ಟಿ ಸಲ್ಲಿಸಲಾಗುತ್ತದೆ. ನಂತರ ಆಯಾ ವಲಯಗಳಿಗೆ ಅನುಸಾರವಾಗಿ ಅನುಮತಿ ಪಡೆಯಬೇಕಾಗುತ್ತದೆ. ಈಗಾಗಲೇ ಪೊಲೀಸ್‌ ಇಲಾಖೆಯಿಂದ ಸಮೀಕ್ಷೆ ನಡೆಸಲಾಗುತ್ತಿದ್ದು, ರಾಜ್ಯದಲ್ಲಿ ಸೂಕ್ಷ್ಮ ಹಾಗೂ ಅತಿ ಸೂಕ್ಷ್ಮ ಪ್ರದೇಶಗಳ ಮಾಹಿತಿ ಸಂಗ್ರಹಿಸಲಾಗುತ್ತಿದೆ. ಡಿಜಿಸಿಎಗೆ ವರದಿ ಸಲ್ಲಿಕೆಯಾದ ನಂತರ ಕೇಂದ್ರ ಸರಕಾರದಿಂದ ಗೆಜೆಟ್‌ ಹೊರಡಿಸಿ ಡ್ರೋನ್‌ ನಿಷೇಧಿತ ಪ್ರದೇಶಗಳ ಬಗ್ಗೆ ಸಾರ್ವಜನಿಕರಿಗೆ ಮಾಹಿತಿ ನೀಡಲಾಗುತ್ತದೆ. ಸದ್ಯ ಡ್ರೋನ್‌ಗಳನ್ನು ಯಾವ ಪ್ರದೇಶದಲ್ಲಾದರೂ ಹಾರಿಸಲು ಪೊಲೀಸ್‌ ಇಲಾಖೆ ಅನುಮತಿ ಪಡೆಯಲೇಬೇಕು. ಮದುವೆ ಸಮಾರಂಭ ಹಾಗೂ ಒಳಾಂಗಣ ಸಮಾರಂಭಗಳಲ್ಲಿ ಡ್ರೋನ್‌ ಚಿತ್ರೀಕರಣ ನಡೆಸಲು ಅನುಮತಿ ಬೇಕಿಲ್ಲ. ಆದರೆ ಹೊರಾಂಗಣದಲ್ಲಿ ಚಿತ್ರೀಕರಣ ನಡೆಸುವುದಾದರೆ ಪೊಲೀಸರ ಅನುಮತಿ ಕಡ್ಡಾಯವಾಗಿದೆ. ಬಾಗಲಕೋಟ ಜಿಲ್ಲೆಯಲ್ಲಿ ಐತಿಹಾಸಿಕ ಸ್ಮಾರಕಗಳು, ವಿಶ್ವ ಪರಂಪರೆ ಪಟ್ಟಿಯಲ್ಲಿರುವ ಪಟ್ಟದಕಲ್ಲನಂತಹ ತಾಣಗಳಿವೆ. ಡಿಜಿಸಿಎ ವಲಯಗಳನ್ನು ಘೋಷಿಸಿದ ನಂತರ ಎಲ್ಲಿ ಡ್ರೋನ್‌ ಬಳಸಬಹುದು ಎಂಬ ಬಗ್ಗೆ ಸ್ಪಷ್ಟ ಮಾಹಿತಿ ದೊರೆಯಲಿದೆ.


ಡಿಜಿಸಿಎ ಮೂಲಕ ಮಾನದಂಡಗಳಿಗೆ ಅನುಗುಣವಾಗಿ ವಲಯಗಳನ್ನು ಗುರುತಿಸಿ ಪಟ್ಟಿ ಸಲ್ಲಿಸಲು ಸೂಚಿಸಲಾಗಿದೆ. ಈಗಾಗಲೇ ಜಿಲ್ಲೆಯಲ್ಲಿ ನಾನಾ ಪ್ರದೇಶಗಳನ್ನು ವಲಯಗಳ ವ್ಯಾಪ್ತಿಯಲ್ಲಿ ಗುರುತಿಸಿ ವರದಿ ಸಲ್ಲಿಸಲಾಗಿದೆ.
ಸಿ.ಬಿ.ರಿಷ್ಯಂತ್‌, ಎಸ್‌ಪಿ, ಬಾಗಲಕೋಟ.