ಲೋಕಲ್‌ ಪಾಲಿಟಿಕ್ಸ್‌ಗೆ ಸಿದ್ದರಾಮಯ್ಯ ಎಂಟ್ರಿ, 'ಕೈ'ಗೆ ಅಧಿಕಾರ ತಪ್ಪದಂತೆ ನೋಡಿಕೊಂಡ ಮಾಜಿ ಸಿಎಂ

ಬಾಗಲಕೋಟೆ: ಈವರೆಗೆ ರಾಜ್ಯದ ರಾಜಕಾರಣದಲ್ಲಿ ತಮ್ಮ ಪಟ್ಟುಗಳ ಮೂಲಕ ಗಮನ ಸೆಳೆದಿರುವ ಮಾಜಿ ಸಿಎಂ ಸಿದ್ದರಾಮಯ್ಯ ಈಗ ಲೋಕಲ್‌ ಪಾಲಿಟಿಕ್ಸ್‌ಗೂ ಎಂಟ್ರಿ ಕೊಟ್ಟಿದ್ದಾರೆ.

ಬಾದಾಮಿ ಕ್ಷೇತ್ರದ ಶಾಸಕರಾಗಿರುವ ಸಿದ್ದರಾಮಯ್ಯ ಭಾನುವಾರ ಹಾಗೂ ಸೋಮವಾರ ಲೋಕಲ್‌ ಪಾಲಿಟಿಕ್ಸ್‌ನಲ್ಲಿ ಬ್ಯುಸಿಯಾಗಿದ್ದರು. ಗುಳೇದಗುಡ್ಡ ಪುರಸಭೆ ಅಧ್ಯಕ್ಷ , ಉಪಾಧ್ಯಕ್ಷ ಸ್ಥಾನಗಳು ಕಾಂಗ್ರೆಸ್‌ ಕೈ ಸೇರುವಂತೆ ಮಾಡುವಲ್ಲಿ ಮಾಜಿ ಸಿಎಂ ಯಶಸ್ವಿಯಾಗಿದ್ದಾರೆ. 23 ಸ್ಥಾನ ಹೊಂದಿರುವ ಗುಳೇದಗುಡ್ಡ ಪುರಸಭೆಯಲ್ಲಿ ಕಾಂಗ್ರೆಸ್‌ 15 ಸ್ಥಾನದ ಮೂಲಕ ಬಹುಮತ ಹೊಂದಿದೆ. ಬಿಜೆಪಿ 2, ಜೆಡಿಎಸ್‌ 5 ಹಾಗೂ ಒಬ್ಬ ಪಕ್ಷೇತರರಿದ್ದಾರೆ. ಅಧ್ಯಕ್ಷ , ಉಪಾಧ್ಯಕ್ಷ ಹುದ್ದೆ ಕಾಂಗ್ರೆಸ್‌ ಕೈ ತಪ್ಪದಂತೆ ಎರಡು ದಿನ ಸಭೆ ನಡೆಸಿದ ಸಿದ್ದರಾಮಯ್ಯ ಸೋಮವಾರ ಗುಳೇದಗುಡ್ಡದಲ್ಲಿ ಆಯ್ಕೆ ಸಭೆಯಲ್ಲೂ ಇದ್ದರು.

ವಿನಯ್‌ ಕುಲಕರ್ಣಿ ಬಂಧನ ರಾಜಕೀಯ ಪ್ರೇರಿತ - ಸಿದ್ದರಾಮಯ್ಯ ಆರೋಪ
ಕಾಂಗ್ರೆಸ್‌ನ ಸದಸ್ಯರು ಈ ಮೊದಲು ಬೆಂಗಳೂರಿಗೆ ತೆರಳಿ ಸಿದ್ದರಾಮಯ್ಯ ಅವರನ್ನೂ ಭೇಟಿ ಮಾಡಿದ್ದರು. ಭಾನುವಾರ ಕೊನೆಯ ಹಂತದ ಸಭೆ ನಡೆಸಿದ ಸಿದ್ದರಾಮಯ್ಯ ಕೈ ಅಧಿಕಾರಕ್ಕೆ ತಂತ್ರ ರೂಪಿಸಿದರು. ಈ ಮಧ್ಯೆ ಚುನಾವಣೆ ನಡೆದು ಕಾಂಗ್ರೆಸ್‌ನ ಶಿಲ್ಪಾ ಹಳ್ಳಿ, ಉಪಾಧ್ಯಕ್ಷೆಯಾಗಿ ಷರೀಫಾ ಮಂಗಳೂರು ಆಯ್ಕೆಯಾದರು. ಆದರೆ, ಅಧ್ಯಕ್ಷ ಸ್ಥಾನದ ಆಕಾಂಕ್ಷಿಯಾಗಿದ್ದ ಷರೀಫಾ ಮುನಿಸಿಕೊಳ್ಳುತ್ತಿರುವಂತೆ ಸ್ಥಳಕ್ಕೆ ಕರೆಸಿದ ಸಿದ್ದರಾಮಯ್ಯ ಷರೀಫಾರನ್ನು ಸಮಾಧಾನಪಡಿಸಿದರು. ‘ಇನ್ನೂ 5 ವರ್ಷ ಅವಧಿಯಿದ್ದು ಚೆನ್ನಾಗಿ ಕೆಲಸ ಮಾಡು, ಅವಕಾಶ ನೀಡೋಣ’ ಎಂದರು.

ಬಾದಾಮಿ ಪುರಸಭೆ ಅಧ್ಯಕ್ಷ , ಉಪಾಧ್ಯಕ್ಷ ರ ಆಯ್ಕೆಗೆ ಮಂಗಳವಾರ ಚುನಾವಣೆ ನಡೆಯಲಿದೆ. 23 ಸ್ಥಾನಗಳ ಪೈಕಿ 13 ಸ್ಥಾನಗಳೊಂದಿಗೆ ಕಾಂಗ್ರೆಸ್‌ ಬಹುಮತ ಪಡೆದಿದೆ. ಒಟ್ಟಿನಲ್ಲಿ ಈವರೆಗೆ ರಾಜ್ಯ, ಜಿಲ್ಲಾಮಟ್ಟದ ರಾಜಕಾರಣದಲ್ಲಿ ತಂತ್ರಗಾರಿಕೆ ತೋರಿಸಿದ್ದ ಸಿದ್ದರಾಮಯ್ಯ ಸ್ವಕ್ಷೇತ್ರದಲ್ಲೂ ಅಧಿಕಾರ ಪಡೆಯಲು ಮುಖಂಡರಿಗೆ ಬೆನ್ನೆಲುಬಾಗಿದ್ದಾರೆ.